មេដឹកនាំកំពូលរបស់ក្រុមរដ្ឋអ៊ីស្លាមបានលេចមុខធ្លោមកវិញ
មេដឹកនាំកំពូលរបស់ក្រុមជីហាតរដ្ឋអ៊ីស្លាម ដែលអាជ្ញាធររុស្ស៊ី បានអះអាងថា ស្លាប់ នៅក្នុងប្រតិបត្តិការវាយប្រហាររបស់យន្តហោះចម្បាំងរុស្ស៊ី កាលពីចុងខែឧសភា កន្លងទៅ ទើបបានបញ្ចេញសំឡេង នៅក្នុងខ្សែអាត់មួយ ដែលអំពាវនាវឲ្យក្រុមជីហាត នៅស៊ីរី និងអ៊ីរ៉ាក់ នៅបន្តក្រាញននៀល ប្រយុទ្ធតទល់នឹងសត្រូវ។ នៅក្នុងខ្សែអាត់សំឡេង ដែលត្រូវបានចាក់ផ្សព្វផ្សាយ នៅថ្ងៃ ព្រហស្បតិ៍ ដោយវិបសៃតិ៍របស់ក្រុមរដ្ឋអ៊ីស្លាម មេដឹកនាំរបស់ក្រុមភេរវនិយម រដ្ឋអ៊ីស្លាម លើកទឹកចិត្តផងដែរ ឲ្យសមាជិក អ្នកគាំទ្ររបស់ខ្លួន វាយប្រហារមជ្ឈមណ្ឌលផ្សព្វផ្សាយព័ត៌មានរបស់ប្រទេស ដែលកំពុងធ្វើប្រតិបត្តិការប្រយុទ្ធប្រឆាំងនឹងក្រុមជីហាត នៅស៊ីរី អ៊ីរ៉ាក់ និងលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ជាមួយនឹងសារជាសំឡេង នៅក្នុងខ្សែអាត់ ចាក់ផ្សាយ នៅថ្ងៃម្សិលមិញ នៅក្នុងវិបសៃតិ៍ឃោសនារបស់ក្រុមជីហាត (Al Fourkan) ក្រុមជីហាត រដ្ឋអ៊ីស្លាមបានបង្ហាញថា មេកើយធំរបស់ខ្លួន នៅមិនទាន់ស្លាប់នោះទេ។ អាប៊ូ បាក់ អាល់បាក់ដាឌី មេដឹកនាំកំពូលរបស់ក្រុមជីហាត រដ្ឋអ៊ីស្លាម ធ្លាប់ត្រូវបានរុស្ស៊ីអះអាងរួចហើយថា បានស្លាប់ នៅក្នុងការវាយប្រហាររបស់យន្តហោះចម្បាំងរុស្ស៊ី ទៅលើក្រុងរ៉ាកា ប្រទេសស៊ីរី កាលពីខែឧសភា។
អង្គការការពារសិទ្ធិមនុស្សស៊ីរី ធ្លាប់បានបញ្ជាក់ការអះអាងរបស់រុស្ស៊ី ប៉ុន្តែ ក្រសួងការពារជាតិអាមេរិកឯណោះវិញ ធ្លាប់វាយតម្លៃថា មេដឹកនាំរបស់ក្រុមជីហាតអង្គការរដ្ឋអ៊ីស្លាមអាចនៅមានជីវិតនៅឡើយ។ នៅក្នុងខ្សែអាត់ សំឡេង ចាក់ផ្សាយ នៅថ្ងៃម្សិលមិញ គេមិនដឹងណាស់ តើមេដឹកនាំក្រុមជីហាតបានថតសំឡេងនៅពេលណានោះទេ ប៉ុន្តែ នៅក្នុងសារ រយៈពេល ៤៦នាទី អាប៊ូ បាក់ អាល់បាក់ដាឌីបាននិយាយយោងដល់ កូរ៉េខាងជើង ដែលគំរាមចង់វាយប្រហារជប៉ុន ហើយនិងអាមេរិក ហើយនិងការធ្លាក់ទីក្រុងមូស៊ូល ទៅក្នុងដៃ របស់កងទ័ពសម្ព័ន្ធមិត្តរបស់អាមេរិក។
នៅក្នុងខ្សែអាត់ សារ សំខាន់របស់អាល់បាក់ដាឌីគឺអំពាវនាវឲ្យក្រុមទាហាន និងអ្នកគាំទ្រអង្គការរដ្ឋអ៊ីស្លាម អត់ធ្មត់ និងតស៊ូ ប្រយុទ្ធ ធ្វើសង្រ្គាម ប្រឆាំងសត្រូវ នៅគ្រប់ទីកន្លែង។ អាមេរិក រុស្ស៊ី និងអ៊ីរ៉ង់ ស្ថិតនៅលើបញ្ជីរឈ្មោះ ប្រទេស មិនស្មោះត្រង់ ដែលមេដឹកនាំកំពូលក្រុមជីហាតអង្គការរដ្ឋអ៊ីស្លាម ស្រែកប្រាប់ឲ្យកូនទាហានរបស់ខ្លួន សម្រុកវាយប្រហារ កុំខ្លាចស្លាប់។
ចាប់តាំង ពីក្រុមជីហាតអង្គការរដ្ឋអ៊ីស្លាម បើកការប្រយុទ្ធហិង្សា ទន្ទ្រានកាន់កាប់ទឹកដីស៊ីរី និងអ៊ីរ៉ាក់ អាប៊ូ បាក់ អាល់បាក់ដាឌី មេដឹកនាំ របស់រដ្ឋអ៊ីស្លាម ធ្លាប់បានបង្ហាញមុខតែមួយលើកតែប៉ុណ្ណោះ គឺនៅឆ្នាំ ២០១៤ ដើម្បី ប្រកាសបង្កើតអ៊ីស្លាម កាលីហ្វា នៅស៊ីរី និងនៅអ៊ីរ៉ាក់។ អាមេរិកធ្លាប់បានប្រកាសផ្តល់ប្រាក់២៥លានដុល្លារ ដល់អ្នកណាដែលអាចផ្តល់ព័ត៌មាន ដើម្បីឲ្យគេចាប់បានមេដឹកនាំរបស់ក្រុមអង្គការរដ្ឋអ៊ីស្លាមរូបនេះ។
នៅពីរឆ្នាំចុងក្រោយនេះ ក្រុមជីហាតអង្គការរដ្ឋអ៊ីស្លាមបានបរាជ័យ និងបាត់បង់ទឹកដីកាន់កាប់របស់ខ្លួន ជាបន្តបន្ទាប់ នៅស៊ីរី អ៊ីរ៉ាក់ និងលីប៊ី។ បន្ទាប់ពីបាត់បង់ទីក្រុងស៊ៀរតិ៍ របស់លីប៊ី នៅចុងឆ្នាំ ២០១៦ ក្រុមជីហាតបានបាត់បង់ទីក្រុងមូស៊ូលនៅអ៊ីរ៉ាក់។ រដ្ឋធានីរបស់ក្រុមនេះ នៅរ៉ាកា ក្នុងទឹកដីស៊ីរី ក៏កំពុងត្រូវឡោមព័ទ្ធ និងរងការវាយប្រហារពីគ្រប់ទិស ដែលរៀបចំឡើងដោយសម្ព័ន្ធអន្តរជាតិ ដឹកនាំ ដោយអាមេរិក ហើយនិងរុស្ស៊ី ដែលគាំទ្រ រដ្ឋាភិបាលស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ