តុលាការអ៊ីរ៉ាក់ចេញដីកាចាប់ខ្លួន អ្នករៀបចំបោះឆ្នោតទាមទារឯករាជ្យឲ្យ គួឌីស្ថាន
តុលាការមួយ នៅទីក្រុងបាដាដ របស់ប្រទេសអ៊ីរ៉ាក់ នៅថ្ងៃពុធម្សិលមិញ បានចេញដីកា បញ្ជាឲ្យគេចាប់ខ្លួន មនុស្សសំខាន់បីនាក់ ដែលបានផ្តួចផ្តើមគំនិត រៀបចំការបោះឆ្នោតប្រជាមតិ ទាមទារឯករាជ្យឲ្យតំបន់ស្វយ័ត គួឌីស្ថាន នៅអ៊ីរ៉ាក់។ នេះបើតាមអ្នកនាំពាក្យរបស់ឧត្តមក្រុមប្រឹក្សានៃអង្គចៅក្រមអ៊ីរ៉ាក់ ដែលបាននិយាយប្រាប់ដល់ទីភ្នាក់ងារព័ត៌មានបារាំង AFP។
ចុះផ្សាយនៅថ្ងៃ៖
ក្នុងចំណោមមនុស្សទាំង៣នាក់ ដែលតុលាការអ៊ីរ៉ាក់ចេញបញ្ជាឲ្យចាប់ខ្លួន មានម្នាក់ ជាប្រធាន គណៈកម្មការ រៀបចំការបោះឆ្នោតប្រជាមតិ ទាមទារឯករាជ្យ នៅគួឌីស្ថាន កាលពីថ្ងៃទី ២៥កញ្ញាកន្លងទៅ។ លោកHendren Saleh ត្រូវប្រឈមនឹងការចាប់ខ្លួនជាមួយសមាជិកពីររូបផ្សេងទៀតរបស់គណៈកម្មការបោះឆ្នោត។
តុលាការអ៊ីរ៉ាក់ ចេញដីកាឲ្យចាប់ខ្លួនអ្នករៀបចំការបោះឆ្នោតប្រជាមតិ នៅគួឌីស្ថាន ទៅតាមបណ្តឹងរបស់ក្រុមប្រឹក្សាសន្តិសុខជាតិ ដែលដឹកនាំដោយនាយករដ្ឋមន្រ្តីអ៊ីរ៉ាក់។ ដីការបស់តុលាការអ៊ីរ៉ាក់ មានសុពលភាពតែនៅលើក្រដាស តែគ្មានសុពលភាពនៅតំបន់ស្វយ័ត គួឌីស្ថាន ជាទី ទាហានអ៊ីរ៉ាក់ គ្មានវត្តមាន ឬគ្មានអំណាចអ្វីសោះឡើយ។
តំបន់ស្វយ័ត គួឌីស្ថានគ្រប់គ្រងដោយរដ្ឋាភិបាល និងទាហានប្រយុទ្ធ គួដ ឈ្មោះPeshmergasតែប៉ុណ្ណោះ។ អាចនិយាយបានថា ដីការបស់តុលាការអ៊ីរ៉ាក់ អាចមានប្រសិទ្ធិភាពចាប់ជនចោទប្រកាន់ទាំងបី បានតែនៅពេលពួកគេធ្វើដំណើរនៅក្រៅតែតំបន់ស្វយ័ត គួឌីស្ថានតែប៉ុណ្ណោះ ពោលគឺខណៈពេលដែលពួកគេធ្វើដំណើរចេញចូលទៅពិគ្រោះយោបល់ជាមួយរដ្ឋាភិបាលអ៊ីរ៉ាក់តែប៉ុណ្ណោះ។
រដ្ឋាភិបាលអ៊ីរ៉ាក់ដែលប្រកាសចាត់ទុក លទ្ធផល និងការបោះឆ្នោតប្រជាមតិ ទាមទារឯករាជ្យនៅគួឌីស្ថាន ថា ខុសនឹងច្បាប់រដ្ឋធម្មនុញ្ញអ៊ីរ៉ាក់ បានចាត់វិធានការគ្រប់វិធីដើម្បីដាក់គំនាបទាំងផ្នែកសេដ្ឋកិច្ច និងនយោបាយលើអាជ្ញាធរគ្រប់គ្រងតំបន់ស្វយ័ត គួឌីស្ថាន។ នៅថ្ងៃចន្ទ ដើមសប្តាហ៍នេះ រដ្ឋាភិបាលក្រុងបាដាដបានប្រកាសទាមទារយកមកវិញ ប្រាក់ចំណូលដែលបានមកពីការនាំចេញប្រេង និងការបង់ពន្ធរបស់ក្រុមហ៊ុនទូរស័ព្ទចល័ត ដែល រហូតមក គ្រប់គ្រង ដោយរដ្ឋាភិបាលតំបន់ស្វយ័ត គួឌីស្ថាន។ នាយករដ្ឋមន្រ្តីអ៊ីរ៉ាក់បានទាមទារផងដែរ ឲ្យប្រទេសក្នុងតំបន់ផ្តាច់ទំនាក់ទំនងសេដ្ឋកិច្ចជាមួយគួឌីស្ថាន ក្នុងគោលដៅ បិទខ្ទប់ដង្ហើមសេដ្ឋកិច្ចតំបន់នេះទាំងស្រុង។ ក្រៅតែពីអ៊ីរ៉ង់ដែលសន្យាផ្អាកពាណិជ្ជកម្មទិញដូរប្រេង ជាមួយ អាជ្ញាធរគួឌីស្ថាននៅអ៊ីរ៉ាក់នៅថ្ងៃទី ៣០កញ្ញាកន្លងទៅ រដ្ឋាភិបាលតួកគីឯណោះ វិញ ដែលបារម្ភខ្លាច ប្រជាជនគួដ នៅតួកគី យកគំរូ តាមការបោះឆ្នោតប្រជាមតិទាមទារឯករាជ្យ នៅគួឌីស្ថាន បានគំរាម បិទខ្ទប់ លែងឲ្យមានការនាំចេញប្រេងពីគួកឌីស្ថានទៅប្រទេសតួកគី។
ការប្រកាសទាមទារឯករាជ្យឲ្យតំបន់ស្វយ័ត កំពុងក្លាយជាជម្ងឺ រាតត្បាត មិនថា នៅអ៊ីរ៉ាក់ និងនៅអេស្ប៉ាញ។ នៅអេស្ប៉ាញ លោកCarles Puigdemont មេដឹកនាំកាតាឡូញ៉ា ដែលបានដឹកនាំឲ្យមានការបោះឆ្នោតប្រជាមតិទាមទារឯករាជ្យឲ្យតំបន់ស្វយ័ត កាតាឡូញ៉ា ក៏អាចប្រឈមផងដែឬ នឹងការចាប់ខ្លួនពីសំណាក់រដ្ឋាភិបាលអេស្ប៉ាញ ដែលបានចាត់ទុកការបោះឆ្នោតប្រជាមតិ នៅកាតាឡូញ៉ាថា ខុសនឹងច្បាប់ រដ្ឋធម្មនុញ្ញអេស្ប៉ាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ