ហេតុអ្វីបានជាអ៊ីរ៉ង់ចង្អុលមុខបស្ចិមលោកពីបទនៅពីក្រោយភេរវកម្មក្នុងទីក្រុងអាវ៉ា?
នៅក្នុងប្រទេសអ៊ីរ៉ង់ មួយថ្ងៃក្រោយភេរវកម្មក្នុងទីក្រុងអាវ៉ាដែលបានសម្លាប់មនុស្សយ៉ាងតិច ២៩នាក់ និងរបួសជិត ៦០នាក់មក ទីក្រុងតេហេរ៉ង់បានចោទបស្ចិមលោក អាមេរិក និងប្រទេសអារ៉ាប៊ីសាអូឌីតពីបទបានគាំទ្រ ឬមានសមានចិត្តចំពោះភេរវនិយម។ ទន្ទឹមនឹងការចោទប្រកាន់នេះ រដ្ឋាភិបាលអ៊ីរ៉ង់ក៏បានសន្យាធ្វើការសងសឹកឲ្យសក្តិសមវិញដែរ។ គួររម្លឹកជូនថា ទោះបីជាភេរវកម្មនោះត្រូវបានអង្គការរដ្ឋអ៊ីស្លាមប្រកាសទទួលស្គាល់ជាស្នាដៃរបស់ខ្លួនក៏ដោយ ក៏ទីក្រុងតេហេរ៉ង់បានទម្លាក់កំហុសលើចលនាទាមទារផ្តាច់ទឹកដីនិយមអារ៉ាប់ក្នុងស្រុកមួយឈ្មោះ « អាល់ អាវ៉ាហ្ស៊ី » (Al-Ahvazieh) ដែលគាំទ្រដោយបរទេស។
ចុះផ្សាយនៅថ្ងៃ៖
ស្តាប់ - ០៦:៣១
នៅល្ងាចថ្ងៃសៅរ៍ ទី២២ កញ្ញា ពោលប៉ុន្មានម៉ោងក្រោយភេរវកម្ម ក្រសួងការបរទេសអ៊ីរ៉ង់បានកោះហៅឯកអគ្គរាជទូតនៃប្រទេសអឺរ៉ុបចំនួន ៣ គឺដាណឺម៉ាក ហូឡង់ និងអង់គ្លេសទៅសួរនាំ។ បើយោងតាមសម្តីរបស់អ្នកនាំពាក្យក្រសួងការបរទេសអ៊ីរ៉ង់ដែលចុះផ្សាយដោយទីភ្នាក់ងារផ្លូវការអ៊ីរ៉ង់ឈ្មោះ អៀណា ប្រទេសអឺរ៉ុបទាំង ៣ នេះបានផ្តល់ទីជម្រកឲ្យសមាជិកមួយចំនួននៃចលនាទាមទារផ្តាច់ទឹកដីនិយមអារ៉ាប់ក្នុងទឹកដីអ៊ីរ៉ង់ឈ្មោះ « អាល់ អាវ៉ាហ្ស៊ី » (Al-Ahvazieh)។ ក្រោមភ្នែក ច្រមុះរបស់ទីក្រុងតេហេរ៉ង់ ពួកនេះបានរៀបចំភេរវកម្មប្រឆាំងលើក្បួនព្យុះហយាត្រាកងទ័ពអ៊ីរ៉ង់ក្នុងទីក្រុងអាវ៉ានាថ្ងៃសៅរ៍ ទី២២ កញ្ញាដោយបានផ្តាច់ជីវិតមនុស្សយ៉ាងតិច ២៩នាក់ ក្នុងនោះមានស្រ្តី និងកូនក្មេង រួមទាំងមានអ្នករបួសធ្ងន់ ស្រាល់ជិត ៦០នាក់ផ្សេងទៀត។
នៅចំពោះមុខឯកអគ្គរាជទូតនៃប្រទេសដាណឺម៉ាក ហូឡង់ និងមន្រ្តីទូតអង់គ្លេស ក្រសួងការបរទេសអ៊ីរ៉ង់បានសម្តែងការតវ៉ា និងការមិនសប្បាយចិត្តចំពោះរដ្ឋាភិបាលនៃប្រទេសអឺរ៉ុបទាំង ៣ ដែលបន្តគាំទ្រ និងមានសមានចិត្តចំពោះភេរវនិយម។ ទន្ទឹមគ្នានេះ ក្រសួងការបរទេសអ៊ីរ៉ង់ក៏បានវាយប្រហារលើសហភាពអឺរ៉ុបដែលមិនបានដាក់ឈ្មោះសមាជិករបស់ចលនា« អាល់ អាវ៉ាហ្ស៊ី » ទៅក្នុងបញ្ជីខ្មៅជាក្រុមភេរវជន។ អ៊ីរ៉ង់បានចោទជាសំណួរដោយដាក់ផ្លៃផ្កាឲ្យអឺរ៉ុបថា អឺរ៉ុបបានចុះក្នុងបញ្ជីខ្មៅតែឈ្មោះភេរវជនណាដែលបង្កភេរវកម្មលើទឹកដីអឺរ៉ុបប៉ុណ្ណោះ។ ចំណែកពួកភេរវជនដែលបង្កភេរវកម្មនៅអ៊ីរ៉ង់បែរជាអឺរ៉ុបបានជួយគាំទ្រ និងផ្តល់ទីជម្រកឲ្យទៅវិញ។
ជាការឆ្លើយតបវិញក្នុងសម្តីការទូត ឯកអគ្គរាជទូតនៃប្រទេសដាណឺម៉ាក ហូឡង់ និងមន្រ្តីទូតអង់គ្លេសបានសន្យាពាំនាំពាក្យសម្តីដែលភាគីអ៊ីរ៉ង់បានលើកឡើងទៅជម្រាបរដ្ឋាភិបាលរបស់គេរៀងៗខ្លួន ព្រមទាំងបញ្ជាក់ពីឆន្ទៈរបស់ប្រទេសខ្លួនក្នុងការសហការណ៍ជាមួយរដ្ឋាភិបាលអ៊ីរ៉ង់ដើម្បីវែកមុខជនដៃដល់នៅក្នុងអំពើភេរវកម្ម និងការដោះដូរព័ត៌មានសម្ងាត់។
អង្គការរដ្ឋអ៊ីស្លាមសារភាព តែរដ្ឋាភិបាលអ៊ីរ៉ង់មិនសូវជឿ
នៅប៉ុន្មានម៉ោងក្រោយភេរវកម្ម គឺមានតែអង្គការរដ្ឋអ៊ីស្លាមមួយគត់ដែលបានប្រកាសសារភាពថាជាស្នាដៃរបស់ខ្លួន។ រីឯចលនាទាមទារផ្តាច់ទឹកដីនិយមអារ៉ាប់ « អាល់ អាវ៉ាហ្ស៊ី » មិនបានបញ្ចេញប្រតិកម្មអ្វីទាំងអស់។ តែការប្រកាសសារភាពរបស់អង្គការរដ្ឋអ៊ីស្លាមមិនត្រូវបានរដ្ឋាភិបាលអ៊ីរ៉ង់យកចិត្តទុកដាក់ប៉ុន្មានទេ និងបន្តសង្ស័យតែលើចលនាទាមទារផ្តាច់ទឹកដីនិយមអារ៉ាប់ « អាល់ អាវ៉ាហ្ស៊ី »។ គួរបញ្ជាក់ថា នៅក្នុងអំពើភេរវកម្មជាច្រើនដែលបានកើតមានលើទឹកដីអ៊ីរ៉ង់ គេកម្រឃើញអង្គការរដ្ឋអ៊ីស្លាមចេញមុខប្រកាសសារភាពជាស្នាដៃរបស់ខ្លួនណាស់។
ភេរវកម្មនៅអ៊ីរ៉ង់ដែលអង្គការរដ្ឋអ៊ីស្លាមបានប្រកាសសារភាពលើកទី១ គឺការវាយប្រហារលើរដ្ឋសភាក្នុងទីក្រុងតេហេរ៉ង់ដែលបានផ្តាច់ជីវិតមនុស្សចំនួន ១៧នាក់ និងរបួសប្រមាណ ១០នាក់ផ្សេងទៀតកាលពីថ្ងៃទី៧ មិថុនា ឆ្នាំ ២០១៧។ តែទោះជាយ៉ាងនេះក្តី ការប្រកាសសារភាពរបស់អង្គការរដ្ឋអ៊ីស្លាមលើកទី១ ក្នុងឆ្នាំ ២០១៧ ក៏ដូចជាលើកទី២ ពេលនេះហាក់មិនសូវបានរដ្ឋាភិបាលអ៊ីរ៉ង់យកចិត្តទុកដាក់ប៉ុន្មានទេ។ សម្រាប់ទីក្រុងតេហេរ៉ង់ អ្នកដែលបានជ្រើសរើស ហ្វឹកហ្វឺន និងចិញ្ចឹមពួកជីហាតឲ្យចូលបង្កភេរវកម្មលើទឹកដីអ៊ីរ៉ង់ គឺបរទេស ពិសេសក្រុមប្រទេសអារ៉ាប់ក្នុងតំបន់ឈូងសមុទ្រពែក្សដោយមានការជួយគាំទ្រពីសហរដ្ឋអាមេរិក។
នៅត្រង់ចំណុចនេះ និងទោះបីជាអ៊ីរ៉ង់មិនបង្ហើបឈ្មោះប្រទេសណាក៏ដោយ ក៏គេដឹងថា អ៊ីរ៉ង់ចង់និយាយសំដៅដល់អារ៉ាប៊ីសាអូឌីតដែលជាគូប្រជែង និងជាសត្រូវស៊ូពូជរបស់ខ្លួននៅក្នុងតំបន់។ លោកប្រធានាធិបតីអ៊ីរ៉ង់រ៉ូហានី និងប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលលោកអាលី ខាមេណីបានទម្លាក់ការទទួលខុសត្រូវដាក់អាមេរិកដោយចោទពីបទព្យាយាមបង្កអស្ថិរភាពនយោបាយនៅក្នុងប្រទេសអ៊ីរ៉ង់។ នេះមិនមែនជាលើកទី១ ហើយក៏ប្រហែលមិនមែនលើកចុងក្រោយទេដែលអ៊ីរ៉ង់បានចង្អុលមុខអារ៉ាប៊ីសាអូឌីទ និងអាមេរិកពីការព្យាយាមបង្កអស្ថិរភាពនយោបាយនៅក្នុងប្រទេសអ៊ីរ៉ង់ក្នុងគោលដៅផ្តួលរំលំរបបដឹកនាំនៅអ៊ីរ៉ង់សព្វថ្ងៃ។
រវាងអ៊ីរ៉ង់ និងអារ៉ាប៊ីសាអូឌីត គឺមិនខុសគ្នារវាងទឹក និងប្រេងដែលគ្មានថ្ងៃរលាយចូលគ្នាបានឡើយ។ ដូច្នេះវាជារឿងធម្មតាដែលគូសត្រូវ និងគូប្រជែងក្នុងតំបន់ទាំងពីរតែងព្យាយាមកាច់បំបាក់គ្នាទៅវិញ ទៅមក។ ចូរកុំភ្លេចថា អ៊ីរ៉ង់ជាប្រទេសកាន់សាសនាអ៊ីស្លាមនិកាយឈីអ៊ីត ចំណែកអារ៉ាប៊ីសាអូឌីតជាប្រទេសកាន់សាសនាអ៊ីស្លាមនិកាយស៊ុយនីត។ ទន្ទឹមនឹងការប្រជែងគ្នានៅក្នុងតំបន់រវាងអ៊ីរ៉ង់ និងអារ៉ាប៊ីសាអូឌីត ក៏មានការគួបផ្សំនឹងបរិបទអន្តរជាតិសព្វថ្ងៃនៅក្នុងទំនាក់ទំនងតានតឹងខ្លាំងរវាងអាមេរិក និងអ៊ីរ៉ង់ដែរ ពិសេសក្រោយពីលោកប្រធានាធិបតីអាមេរិកដូណាល់ ត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥។
យ៉ាងណាក៏ដោយ ទីក្រុងតេហេរ៉ង់បានប្តេជ្ញានឹងធ្វើការសងសឹកវិញឲ្យសក្តិសមបំផុតចំពោះអ្នកដែលបានឃុបឃិតបង្កភេរវកម្មក្នុងគោលដៅបង្កើតឲ្យមានអស្ថិរភាពនយោបាយនៅអ៊ីរ៉ង់។ តែគេនៅមិនទាន់ដឹងថា តើវិធានការ និងមធ្យោបាយណាខ្លះដែលរដ្ឋាភិបាលអ៊ីរ៉ង់គ្រោងប្រើនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ