ប្រទេសជិត៧០នឹងមកចូលរួមសន្និសីទក្រុងប៉ារីសស្តីពីជម្លោះអ៊ីស្រាអែល-ប៉ាឡេស្ទីន
សន្និសីទអន្តរជាតិ ស្តីពីជម្លោះអ៊ីស្រាអែល និងប៉ាឡេស្ទីន ដែលរៀបចំឡើងដោយបារាំង នឹងត្រូវចាប់បើកធ្វើ នៅថ្ងៃអាទិត្យខាងមុខ នៅក្នុងទីក្រុងប៉ារីស។ សន្និសីទដែលរងការរិះគន់យ៉ាងខ្លាំងពីសំណាក់អ៊ីស្រាអែល ក៏ប៉ុន្តែ នៅទីបំផុតទៅ នឹងមានការចូលរួមពីសំណាក់ប្រទេសយ៉ាងច្រើន រហូតដល់ទៅជិត ៧០ប្រទេស ក្នុងនោះក៏មានសហរដ្ឋអាមេរិកផងដែរ ដែលតំណាងដោយលោកចន ឃែរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
សន្និសីទក្រុងប៉ារីស នៅថ្ងៃអាទិត្យ ទី១៥មករាខាងមុខនេះ នឹងមិនមានវត្តមានប្រមុខដឹកនាំអ៊ីស្រាអែល និងប្រមុខដឹកនាំប៉ាឡេស្ទីននោះទេ ក៏ប៉ុន្តែ ក្នុងចំណោមប្រទេសទាំង ៧០ ដែលបារាំងបានអញ្ជើញឲ្យចូលរួម ស្ទើរតែគ្រប់ប្រទេសទាំងអស់បានឆ្លើយតបជាវិជ្ជមាន ដោយភាគច្រើនបញ្ជូនតំណាងថ្នាក់រដ្ឋមន្រ្តីការបរទេសឲ្យមកចូលរួម។
អ៊ីស្រាអែល ក្រោមការដឹកនាំរបស់រដ្ឋាភិបាលចម្រុះស្តាំនិយម ធ្លាប់បានបរិហាររិះគន់ម្តងហើយម្តងទៀតមកលើបារាំង ទាក់ទងនឹងការរៀបចំសន្និសីទនេះ ដោយបានលើកឡើងថា សន្តិភាព រវាងអ៊ីស្រាអែល និងប៉ាឡេស្ទីន មិនត្រូវកើតចេញពីការចាប់បង្ខំដោយភាគីទី៣ណាផ្សេងនោះទេ តែត្រូវតែកើតចេញពីដំណើរការចរចាដោយផ្ទាល់ រវាងប្រទេសទាំងពីរ។ ក៏ប៉ុន្តែ ការចរចាដោយផ្ទាល់ រវាងអ៊ីស្រាអែល និងប៉ាឡេស្ទីននេះ បានជាប់គាំងអស់រយៈពេលជាច្រើនឆ្នាំមកហើយ ជាពិសេស គឺដោយសារតែបញ្ហាចម្រូងចម្រាស ជុំវិញការពង្រីកអាណានិគមអ៊ីស្រាអែលលើដែនដីរបស់ប៉ាឡេស្ទីន។
សន្និសីទក្រុងប៉ារីសនៅថ្ងៃអាទិត្យនឹងត្រូវបើកធ្វើ នៅក្នុងបរិបទនៃបច្ចុប្បន្នភាពដ៏សំខាន់ពីរ គឺការបោះឆ្នោតនៅក្រុមប្រឹក្សាសន្តិសុខ កាលពីថ្ងៃទី២៣ធ្នូ ទាមទារឲ្យអ៊ីស្រាអែលបញ្ឈប់ការសង់លំនៅឋាននៅក្នុងទឹកដីប៉ាឡេស្ទីន និងការឡើងកាន់តំណែងរបស់លោកដូណាល់ត្រាំ ដែលបានបង្ហាញជំហរគាំទ្រយ៉ាងប្តូរផ្តាច់ចំពោះអ៊ីស្រាអែល។
ទោះជាយ៉ាងណា សន្និសីទក្រុងប៉ារីសនឹងមានវត្តមានរបស់សហរដ្ឋអាមេរិក ដោយសារតែរដ្ឋាភិបាលរបស់លោកអូបាម៉ា ដែលនៅសល់ពេលតែមួយសប្តាហ៍ទៀតត្រូវផុតអាណត្តិ បានបញ្ជូនលោកចន ឃែរី រដ្ឋមន្រ្តីការបរទេស ឲ្យមកចូលរួម។
គួរបញ្ជាក់ថា បារាំងបានខ្នះខ្នែងយ៉ាងខ្លាំង ដើម្បីព្យាយាមបញ្ចុះបញ្ចូលប្រមុខដឹកនាំអ៊ីស្រាអែល និងប៉ាឡេស្ទីនឲ្យមកចូលរួមក្នុងសន្និសីទក្រុងប៉ារីស ក៏ប៉ុន្តែ មានតែលោកម៉ះមូត អាបាស់មួយប៉ុណ្ណោះដែលទទួលការអញ្ជើញ។ លោកប្រមុខដឹកនាំប៉ាឡេស្ទីនគ្រោងនឹងធ្វើដំណើរមកប៉ារីស ដើម្បីជួបលោកហ្វ្រង់ស័រ ហូឡង់ នៅថ្ងៃអាទិត្យ ឬថ្ងៃចន្ទ ក៏ប៉ុន្តែ លោកនឹងមិនចូលរួមក្នុងសន្និសីទក្រុងប៉ារីសនោះទេ ដោយសារតែគ្មានវត្តមានអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ