នាយករដ្ឋមន្រ្តីហ្ស៊កដានី៖អំពើហិង្សានៅហ្ស៊េរុយសាឡិមកំពុងពន្លិចដំណើរស្វែងរកសន្តិភាពរវាងអ៊ីស្រាអែល និងប៉ាឡេស្ទីន
លោកនាយករដ្ឋមន្រ្តីនៃប្រទេសហ្ស៊កដានីបានបញ្ចេញប្រតិកម្មនៅថ្ងៃអាទិត្យ ទី៩ វិច្ឆិកាថា ស្ថានភាពដែលកំពុងកើតមានយ៉ាងក្តៅគគុកនៅទីក្រុងហ្ស៊េរុយសាឡិមខាងកើតគឺជាកាំបិតចាក់សម្លាប់ដំណើរស្វែងរកសន្តិភាពនៅតំបន់ដើមបូព៌ារវាងអ៊ីស្រាអែល និងប៉ាឡេស្ទីន។ គួរជម្រាបជូនថាថ្មីៗនេះ និងដើម្បីប្រឆំាងនឹងអំពើហិង្សានៅទីក្រុងហ្ស៊េរុយសាឡិមខាងកើត ពិសេសនៅទីលានវិហារសាសនាអ៊ីស្លាម រដ្ឋាភិបាលទីក្រុងអាម៉ាន់បានកោះហៅឯកអគ្គរាជទូតរបស់ខ្លួនប្រចំាប្រទេសអ៊ីស្រាអែលឲ្យចូលស្រុកវិញ។
ចុះផ្សាយនៅថ្ងៃ៖
ស្តាប់ - ០២:១១
គឺនៅក្នុងសន្និសីទកាសែតមួយក្នុងទីក្រុងអាម៉ាន់ដែលលោកនាយករដ្ឋមន្រ្តីនៃប្រទេសហ្ស៊កដានីអាប់ដាឡា ស៊ូ (Abdallah Nsour) បានរម្លឹកជាថ្មីអំពីកិច្ចព្រមព្រៀងសន្តិភាព ក៏ដូចជាកិច្ចសន្យាផ្សេងៗទៀតដែលប្រទេសហ្ស៊កដានីបានចុះហត្ថលេខាជាមួយប្រទេសអ៊ីស្រាអែល។ លោកអាប់ដាឡាបានបញ្ជាក់ថា កិច្ចព្រមព្រៀងដែលហ្ស៊កដានី និងអ៊ីស្រាអែលបានចុះហត្ថលេខារួមគ្នា គឺជាកិច្ចព្រមព្រៀងដែលត្រូវគោរពដោយភាគីទំាងពីរ ពោលមិនមែនមានតែម្នាក់គោរពទេ។ ទន្ទឹមគ្នានេះ លោកប្រមុខរដ្ឋាភិបាលហ្ស៊កដានីក៏បានថ្កោលទោសចំពោះអំពើហិង្សានៅក្នុងទីក្រុងហ្ស៊េរុយសាឡិមខាងកើត ពិសេសនៅទីលានវិហារអ៊ីស្លាម និងថា អំពើហិង្សានោះមិនមែនកើតឡើងដោយចៃដន្យទេ តែមានការរៀបចំទុកពីក្រុមមនុស្សជ្រុលនិយម ឬពីរដ្ឋាភិបាល ដោយលោកចង់និយាយទម្លាក់កំហុសដាក់ប្រទេសអ៊ីស្រាអែល។
លោកប្រមុខរដ្ឋាភិបាលហ្ស៊កដានីបានចោទសួរថា តើវិហារអាល់ អាសា នៅទីលានវិហារអ៊ីស្លាមមិនមែនកំពុងក្លាយជាប្រធានរឿងស្នូលនៃគម្រោងរៀបចំបោះឆ្នោតមុនអាណត្តិនៅអ៊ីស្រាអែលទេ ឬយ៉ាងណា?។ សូមជម្រាបជូនថា រដ្ឋាភិបាលចម្រុះអ៊ីស្រាអែលរបស់លោកនាយករដ្ឋមន្រ្តីនេតាន់យ៉ាហ៊ូសព្វថ្ងៃបានចូលរួមដោយក្រុមអ្នកជាតិនិយមសាសនា និងក្រុមគំាទ្រឲ្យមានអាណានិគមលើដែនដីប៉ាឡេស្ទីន។ លោកប្រមុខរដ្ឋាភិបាលហ្ស៊កដានីបានយល់ឃើញថា អ្វីដែលកំពុងកើតមាននៅទីក្រុងហ្ស៊េរុយសាឡិមពេលនេះ គឺជាការជាន់ពន្លិចដំណើរការស្វែងរកសន្តិភាពរវាងអ៊ីស្រាអែល និងប៉ាឡេស្ទីន។ គួរជម្រាបជូនថា ហ្ស៊កដានី ក៏ដូចជាអេហ្ស៊ីបជាប្រទេសអារ៉ាប់ដែលបានចុះកិច្ចព្រមព្រៀងសន្តិភាពជាមួយអ៊ីស្រាអែល។
បើផ្អែកតាមកិច្ចព្រមព្រៀងជាមួយអ៊ីស្រាអែល ហ្ស៊កដានីមានតួនាទីជាអ្នកគ្រប់គ្រងទីលានវិហារអ៊ីស្លាមនៅហ៊្សេរុយសាឡិមខាងកើត។ មួយវិញទៀត និងយោងតាមកិច្ចព្រមព្រៀងដដែល មានតែអ្នកកាន់សាសនាអ៊ីស្លាមទេដែលមានសិទ្ធិចូលទៅក្រាបបន់ស្រន់នៅទីលានវិហារអ៊ីស្លាមនោះ។ ចំណែកអ្នកកាន់សាសានាផ្សេងអាចទៅលេងបាន តែមិនអាចក្រាបបន់ស្រន់បានទេ។ ចំពោះប្រជាជនអ៊ីស្រាអែលក៏អាចចូលទៅទីនោះបានដែរ តែមានម៉ោងកំណត់ និងទទួលបានការការពារសុវត្ថិភាពខ្ពស់បំផុត។ តែអំពើហិង្សាបាន និងកំពុងបន្តពុះកញ្ជ្រោលយ៉ាងខ្លំាង ដោយសារក្រុមអ្នកជាតិនិយមសាសនាជ្វីហ្វបាននំាគ្នាចូលទៅទីលានវិហារអ៊ីស្លាមដោយបំពានច្បាប់នាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ