ក្រុមប្រឹក្សាសន្តិសុខអ,ស.បបើកកិច្ចប្រជុំបន្ទាន់ស្តីពីជំនួយមនុស្សធម៌សម្រាប់ប្រជាជនស៊ីរី
នៅថ្ងៃសុក្រ៣មិថុនានេះ ក្រុមប្រឹក្សាសន្តិសុខអង្គការសហប្រជាជាតិបើកកិច្ចពិភាក្សាបន្ទាន់ រកមធ្យោបាយដើម្បីបញ្ជូនជំនួយមនុស្សធម៌ទៅអោយប្រជាជនដែលកំពុង រងគ្រោះអត់ឃ្លាននៅស៊ីរី។ អសបចង់ប្រើឧទ្ធម្ភាគចក្រ ច្រើនគ្រឿងដើម្បីទំលាក់ស្បៀងជំនួយតាមបណ្តាក្រុងដែលរងការឡោមព័ទ្ធ។ ក្នុងសមរភូមិស៊ីរី កងទ័ពរដ្ឋាភិបាលបានទំលាក់គ្រាប់បែកនៅតំបន់ឧទ្ទាមក្រុងអាឡេប សម្លាប់ជនស៊ីវិល២៣នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
យោងតាមអង្គការអង្គការសហប្រជាជាតិ មនុស្សជិត៦សែននាក់កំពុងរស់តាមតំបន់ដែលឡោមព័ទ្ធដោយក្រុមប្រដាប់អាវុធ ពិសេសពីក្រុមទាហានរដ្ឋាភិបាលស៊ីរីតែម្តង។ ប្រជាជនជិត៤លាននាក់រស់ក្នុងតំបន់ដែលគេពិបាកចូលទៅដល់។
ក្រោយពីមន្ត្រីពិសេសខ្លួនមួយរូបទើបបានលើកឡើងពីភាពលំបាកក្នុងការការទំលាក់ស្បៀងជំនួយជួយជនរងគ្រោះស៊ីរី អង្គការសហប្រជាជាតិនៅក្រុងញូវយកបានប្រកាសពិនិត្យលទ្ធភាពប្រើប្រាស់ឧទ្ធម្ភាគចក្រ ដើម្បីទំលាក់ស្បៀងជំនួយ។
ទោះយ៉ាងនេះក្តី បើយោងតាមការព្រមានរបស់អ្នកនាំពាក្យអង្គការសហប្រជាជាតិ ការប្រើប្រាស់យន្តហោះទំលាក់ស្បៀងជំនួយតាមតំបន់ក្រុង ប្រហែលពិបាកធ្វើឡើងណាស់ព្រោះក្រៅពីបញ្ហាសន្តិសុខ ការហោះហើរតាមផ្លូវអាកាសទំលាក់ស្បៀងជំនួយ ត្រូវប្រឈមនឹងវត្តមានស្អេកស្កះ នៃយន្តហោះរុស្ស៊ី ស៊ីរី និងយន្តហោះប្រទេសសម្ព័ន្ធមិត្តដែលកំពុងបើកយុទ្ធនាការកំទេចក្រុមជីហាតទៀត។ យន្តហោះប្រទេសសម្ព័ន្ធមិត្តដឹកនាំដោយអាមេរិក បានទំលាក់អាវុធយុទ្ធភណ្ឌដល់ក្រុមឧទ្ទាមដែលកំពុងទប់ស្កាត់ក្រុមជីហាតរដ្ឋអ៊ីស្លាមមិនអោយជុលក្រុងម៉ារា នៅភាគខាងជើងក្រុងអាឡិប។
គួររំលឹកថា ជនរងគ្រោះស្លាប់ក្នុងសង្គ្រាមស៊ីរីជាង៥ឆ្នាំនេះ បានកើនឡើងដល់២៨០០០០នាក់។ កាលពីខែឧសភា បណ្តាក្រុមប្រទេសចំនួន២០ដែលគាំទ្រស៊ីរី បានកំណត់យកថ្ងៃ១មិថុនា ជាថ្ងៃចុងក្រោយដើម្បីដឹកជញ្ជូនស្បៀងជំនួយអោយដល់ក្រុងដែលរងការឡោមព័ទ្ធ។
កាលពីថ្ងៃពុធ ក្នុងអំឡុងបទឈប់បាញ់៤៨ម៉ោង កងទ័ពស៊ីរីបានអនុញ្ញាតអោយជំនួយបានដឹកទៅដល់ក្រុងដារ៉ាយ៉ា ជាក្រុងមួយនៅចំងាយ១០គីឡូម៉ែត្រពីទីក្រុងដាម៉ាស។ ប៉ុន្តែ ប្រជាជនក្រុងដារីយ៉ាខកចិត្តជាខ្លាំងព្រោះថា ក្នុងឡានកាំម្ញ៉ុងទាំងនោះ គ្មានចំណីអាហារសម្រាប់ហូបចុកសោះឡើយ។ គួររំលឹកថា ប្រជាជនក្រុងដារីយ៉ា ធ្លាប់ងើបបះបោរប្រឆាំងរដ្ឋាភិបាលកាលពីឆ្នាំ២០១១។ ក្រុងនេះរងការឡោមព័ទ្ធតាំងពីឆ្នាំ២០១២ម្ល៉េះ។
ឯកអគ្គរាជទូតអង់គ្លេស នៅអង្គការសហប្រជាជាតិ បានសុំអោយប្រតិបត្តិការទំលាក់ស្បៀងជំនួយ ដែលក្រុមប្រទេសអន្តរជាតិគាំទ្រស៊ីរី បានព្រមព្រៀងគ្នានោះ អាចធ្វើទៅបានតាមការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ