តួកគី គំរាមបើកទ្វារព្រំដែន ឱ្យជនភៀសខ្លួនស៊ីរី ជាង៣លាននាក់ រត់ចូលសហគមន៍អឺរ៉ុប
ឆ្លើយចំពោះការរិះគន់របស់អន្តរជាតិ, ប្រធានាធិបតីតួកគី លោក Erdogan ចំអកឌឺដង ថា បើចង់សាក តួកគីនឹងបើកទ្វារច្រកព្រំដែន ឱ្យជនភៀសខ្លួន ជាង៣លាន៦សែននាក់ រត់ចូលសហគមន៍អឺរ៉ុប។ នេះជាការប្រកាសចំអកឡកឡឺយរបស់ប្រមុខរដ្ឋតួកគី តាមរយៈទូរទស្សន៍តែម្តង ពីថ្ងៃទី១០តុលា ក្រោយពេលដែល សហគមន៍អន្តរជាតិពីគ្រប់ទិសតាំងពីអឺរ៉ុប អាស៊ី អាមេរិក មជ្ឃិមបូព៌ា បានរិះគន់និងថ្កោលទោសប្រទេសតួកគី ជុំវិញការវាយប្រហាររបស់កងទ័ពតួកគី ទៅលើកងកម្លាំងគួឌីស្ថាននៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០៣
ប្រសាសន៍របស់លោកប្រធានាធិបតីតួកគី អេឌូហ្គាន់ ៖
«តួកគីយើង អាចប្រហែលជាប្រទេសតែមួយ ដែលនឹងឈរជើងនៅស៊ីរី ដោយស្របច្បាប់។
ពីព្រោះថា សន្តិសុខជាតិយើងទាំងមូលកំពុងត្រូវរងការគំរាមកំហែង ហើយនេះមិនមែនជាហេតុផលតែមួយមុខនោះទេ ប៉ុន្តែយើងក៏នៅទទួលបន្ទុកជួយទទួលជនភៀសខ្លួនស៊ីរីដល់ទៅជាង៣លាន៦សែននាក់ទៀតឯណោះ។
ឱ! អស់លោកលោកស្រី សហគមន៍អឺរ៉ុបអើយ! សូមបើកភ្នែក ភ្ញាក់ស្មារតីឡើងផងមើល!
ប្រសិនបើអស់លោក នៅតែព្យាយាមចោទតួកគីយើងថាមានចេតនារំលោភបំពានឈ្លានគេតទៅទៀត! នោះល្បែងនយោបាយជាមួយពួកយើងគឺងាយស្រួលទេ! ការងាយបំផុតនោះ គឺយើងបើកច្រកផ្លូវ ច្រកព្រំដែន ហើយសហគមន៍អឺរ៉ុបរបស់អស់លោកអ្នក នឹងឃើញជនភៀសខ្លួន ទាំងជាង៣លាន៦សែននាក់នោះ ជាមិនខាន!
ចំមើល អ្នកឯងនឹងភ្លឺភ្នែក ហើយតើនៅហ៊ានមាត់កតទៅទៀត ដែរឬទេ?»
តួកគីចាក់ចំចំណុចខ្សោយរបស់អឺរ៉ុប ដែលខ្លាចលំហូរចូលនៃជនភៀសខ្លួនស៊ីរី ដែលជាចំណុចស្នូរនៃវិបត្តិមួយនៅអឺរ៉ុប។ ម្យ៉ាងវិញទៀត សហគមន៍អន្តរជាតិ ក៏ខ្លាចដែរ ការងើបបះបោរឡើងវិញ នៃពួកអង្គការរដ្ឋអ៊ីស្លាមជីហាត ដែលពេលនេះ មានភេរវជនជីហាតជាង១ម៉ឺននាក់ ដែលត្រូវពួកគួឌីស្ថានចាប់ឃុំ។ បើពួកភេរវជនអស់នេះ ត្រូវរួចខ្លួនចេញពីទ្រង់ដោយសារតែការវាយប្រហាររបស់តួកគី, នោះច្បាស់ជាអាសន្នធំហើយចំពោះសន្តិសុខពិភពលោក។
គួរបញ្ជាក់ថា នៅថ្ងៃពុធ កងទ័ពតួកគី បានបើការវាយប្រហារទីតាំងរបស់ពួកគួកឌីស្ថាននៅស៊ីរី ដែលជាសម្ព័ន្ធមិត្តរបស់កងកម្លាំងអន្តរជាតិ បណ្តាលឱ្យស្លាប់មនុស្ស ប្រមាណ២០នាក់ ហើយមនុស្សជាង៦ម៉ឺននាក់កំពុងរត់ភៀសខ្លួន។ ការវាយប្រហារនេះ គឺក្រោយការប្រកាសរបស់ប្រធានាធិបតីលោក ដូណាល់ ត្រាំ នៅក្នុងការដកទ័ពអាមេរិកចេញពីស៊ីរី។ តួកគី ចាត់ទុកពួកគួកឌីស្ថានថាជាពួកក្រុមឧទ្ទាមភេរវជន ហើយការវាយប្រហារនេះ គឺជា«ការការពារខ្លួនទុកជាមុន» ដែលករណីនេះ ទទួលស្គាល់ដោយមាត្រា៥១នៃធម្មនុញ្ញរបស់អង្គការសហប្រជាជាតិ។
សកម្មភាពនេះ ត្រូវរងការរិះគន់ជុំទិស ថាការឈ្លាននិងគំរាមកំហែងដល់សន្តិសុខក្នុងតំបន់។ ប្រទេសជាច្រើនក្នុងសម្ព័ន្ធអារ៉ាប់ បានចេញមុខថ្កោលទោសតួកគី ថា ការវាយប្រហាររបស់តួកគីនេះ ជារឿងមិនអាចទទួលយកបានសោះឡើយ។ ចំណែក អារ៉ាប៊ីសាអូឌីត ចាត់ទុកថា ទង្វើនេះ គឺបង្កផលវិបាកអស្ថិរភាពនៅក្នុងតំបន់ទាំងមូល។ ប្រទេសចិន ក៏ចេញមុខមកនឹងគេដែរ ដោយចិនរម្លឹកតួកគីថា ត្រូវតែគោរពដែនអធិបតេយ្យភាពនិងបូរណភាពទឹកដីរបស់ស៊ីរី។ រីឯ រុស្ស៊ី ចង់ឱ្យចរចាគ្នា កុំប្រើចុងកាំភ្លើង។
នៅចំពោះមុខស្ថានការណ៍នេះ ក្រុមប្រឹក្សាសន្តិសុខអង្គការសហប្រជាជាតិ បានបើកប្រជុំជាបន្ទាន់ ពីម្សិលមិញនេះ។ ហើយចំណែក សភាអាមេរិកាំងវិញ បានរារាំងតួកគី ដោយគ្រោងអនុម័តច្បាប់ដាក់ទណ្ឌកម្មសេដ្ឋកិច្ចលើតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ