បញ្ហាសិទ្ធិមនុស្ស ជាក្តីកង្វល់របស់ប្រធានាធិបតីរុស្ស៊ីបច្ចុប្បន្ន
ថ្ងៃនេះ លោកមេដវេដេវ ទទួលជួបគណៈប្រតិភូរបស់ក្រុមប្រឹក្សានៅអមប្រធានាធិបតីរុស្ស៊ីខាងអភិវឌ្ឍន៍សង្គមស៊ីវិល និងសិទ្ធិមនុស្សដើម្បីស្តាប់សេចក្តីសន្និដ្ឋាន អន្តរកាលអំពីមូលហេតុនៃមរណភាពអ្នកច្បាប់រុស្ស៊ី Serguei Magnitski នៅក្នុងពន្ធនាគារកាលពីជិត២ឆ្នាំមុន។ មរណភាពដែលញ៉ាំងឲ្យមានរលកតវ៉ាពីខាងមជ្ឈដ្ឋានបស្ចិមលោកទាមទារឲ្យថ្កោលទោសរាល់មន្ត្រីរុស្ស៊ីណាដែលជាប់ពិរុទ្ធក្នុងរឿងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជាបឋមគួររំលឹកថា តាំងពីគាត់ឡើងកាន់តំណែងជាប្រធានាធិបតីរុស្ស៊ីជាង៣ឆ្នាំមុនមក លោកមេដវេដេវក្នុងឋានៈជាអតីតសាស្ត្រាចារ្យច្បាប់ តែងលើកជាអាទិភាពមួយនៃនយោបាយគាត់ គឺកសាងប្រទេសរុស្ស៊ីឲ្យទៅជានីតិរដ្ឋ បានន័យថា រាល់តែមន្ត្រីទាំងអស់ដោយមិនអាស្រ័យនឹងបុណ្យសក្តិខ្លួនឡើយ គឺត្រូវស្ថិតនៅក្រោមច្បាប់មិនមែននៅពីលើច្បាប់ ទេលុះណាតែយ៉ាងនេះទើបរុស្ស៊ីអាចចាត់ទុកខ្លួនឯងជារដ្ឋស៊ីវិល័យលូតលាស់ខ្ពស់។
សាច់រឿងនៃជំនួបថ្ងៃនេះ គឺថាលោកប្រធានាធិបតីមេដវេដេវ នឹងត្រូវគេលាតត្រដាងជូននូវសេចក្តីសន្និដ្ឋានត្រួសៗជាមុន អំពីមូលហេតុនៃមរណភាពអ្នកយុត្តិសាស្ត្ររុស្ស៊ីឈ្មោះ Serguei Magnitski ដែលបានធ្វើការជាទីប្រឹក្សារបស់មូលនិធីវិនិយោគ Hermitage Capital Management ហើយដែលក្នុងឆ្នាំ២០០៨ បានត្រូវចាប់ខ្លួនចំពោះការជួយឲ្យមូលនិធិនេះគេចពន្ធក្នុងទឹកប្រាក់២១៣លានរូប្ល ឬស្មើនឹងជាង៧លានដុល្លារអាមេរិក។
លុះថ្ងៃ១៧ វិច្ឆិកា ឆ្នាំ២០០៩ ដោយមកពីពួកមន្ត្រីគុកពុំព្រមអើពើ នឹងពាក្យត្អូញត្អែររបស់គាត់ចំពោះអាការៈសុខភាពយ៉ាប់យ៉ឺន ពេលរូបគាត់ត្រូវគេដឹកទៅមន្ទីរពេទ្យគឺហួសពេលទៅហើយគាត់ក៏បានដាច់ខ្យល់ស្លាប់នៅយប់នោះឯងតែម្តង ស្លាប់ក្នុងវ័យជាបុរសនៅពេញកម្លាំងនៅឡើយ ក្នុងវ័យទើប៣៧ឆ្នាំ។
ស្របនឹងសេចក្តីសន្និដ្ឋាននោះ មានមន្ត្រីមួយចំនួនដែលប្រាថ្នាឲ្យលោក Serguei Magnitski ក្ស័យជីវិតទៅសម្រាប់ជាប្រយោជន៍របស់ពួកគេផ្ទាល់។
តាមដែលកាសែតក្រុងម៉ូស្គូឈ្មោះ Kommersant ចុះផ្សាយ សាច់រឿង គឺអំពីមន្ត្រីចំនួន៦០នាក់ដែលជាមន្ត្រីក្រសួងមហាផ្ទៃ គណៈកម្មាធិការជាតិខាងស៊ើបអង្កេត ស្ថាប័នរដ្ឋអាជ្ញា និងចៅក្រមជាដើម។
ថ្ងៃទី៤ កក្កដា ម្សិលមិញឈ្មោះមន្ត្រីទាំងនេះ ត្រូវបានរដ្ឋាភិបាលហូឡង់ដាក់ទណ្ឌកម្មជាគំរូសម្រាប់ប្រទេសឯទៀតនៅទ្វីបអឺរ៉ុប ហាមមិនឲ្យចូលប្រទេសនេះ ចំណែកទ្រព្យសម្បត្តិគេបើមាននៅលើដែនដីហូឡង់គឺត្រូវផ្អាប់ទុក។
ទាំងសភាថ្នាក់លើនឹងថ្នាក់ក្រោមនិងរដ្ឋសភាសហរដ្ឋអាមេរិកកំពុងពិនិត្យមើលវិធានការនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ