បារាំង៖ ស្លាប់សង្ឃកាតូលិកម្នាក់ ក្នុងហេតុការណ៍ចាប់ចំណាប់ខ្មាំងក្នុងវិហារកាតូលិក
មានហេតុការណ៍ចាប់ចំណាប់ខ្មាំង នៅក្នុងវិហារកាតូលិកមួយកន្លែង ក្បែរក្រុងរូអង់ ភាគខាងលិចឈាងខាងជើងប្រទេសបារាំង នៅវេលាព្រឹកថ្ងៃអង្គារ ទី២៦កក្កដានេះ។ ជនដៃដល់ពីរនាក់ ដែលប្រដាប់ដោយកាំបិត បានចូលទៅក្នុងវិហារកាតូលិក ដោយបានចាប់ គ្រិស្តបរិស័ទ ដូនជី និងសង្ឃសាសនាកាតូលិក ជាចំណាប់ខ្មាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
យោងតាមព័ត៌មានបឋម ទទួលបានពីអ្នករាយការណ៍ព័ត៌មានបារាំង AFP បានឲ្យដឹងថា ចំណាប់ខ្មាំងម្នាក់ ដែលជាសង្ឃកាតូលិកប្រចាំការនៅក្នុងវិហារ ត្រូវបានជនដៃដល់ អារកសម្លាប់នឹងកាំបិត។ ហេតុការណ៍នេះ បានកើតឡើង នៅព្រឹកថ្ងៃអង្គារទី២៦កក្កដា នៅក្នុងវិហារកាតូលិកមួយឈ្មោះ Saint-Etienne-du-Rouvrayភាគខាងត្បូងក្រុងRouen ។ មានមនុស្សម្នាក់ទៀត រងរបួលធ្ងន់។ ចំណែកជនដៃដល់ទាំងពីរនាក់ ត្រូវបានសមត្ថកិច្ចបារាំង បាញ់ស្លាប់នៅនឹងកន្លែង។
យោងតាមប្រភពពីក្រសួងមហាផ្ទៃបារាំង ក្នុងពេលកើតហេតុ ជនដៃដល់បានចាប់មនុស្ស៥នាក់ នៅក្នុងវិហារ ជាចំណាប់ខ្មាំង ដោយមានកាំបិតជាអាវុធ។ ក្រោយមកក្នុងពេលដែលនគបាលកំពុងឡោមព័ត្រកន្លែងកើតហេតុ ជនដៃដល់ទាំងពីរនាក់ បានដើរចេញមកខាងក្រៅវិហារ ទើបនគរបាលបាញ់សម្លាប់នៅនឹងកន្លែង។
កម្លាំងសមត្ថកិច្ច កំពុងតែធ្វើប្រតិបត្តិការ រុករកគ្រាប់បែក រឺអាវុធជាតិផ្ទុះផ្សេងៗ ដែលជនដៃដល់អាចដាក់បង្កប់នៅកន្លែងកើតហេតុ។ លោក Pierre-Henry Brandet អ្នកនាំពាក្យក្រសួងមហាផ្ទៃ បានបញ្ជាក់ថា មកត្រឹមពេលនេះ គេនៅមិនទាន់ដឹងពីមូលហេតុដែលជំរុញឲ្យជនដៃដល់ទាំងពីរ ធ្វើអំពើចាប់ចំណាប់ខ្មាំងនេះទេ ហើយអាជ្ញាធរក៏មិនទាន់អាចសន្និដ្ឋានបានថា វាជាអំពើភេរវកម្ម បង្ករឡើងដោយជនជីហាដអ៊ីស្លាមជ្រុលនិយមដែរ។
យ៉ាងណាក៏ដោយ ករណីនេះ ត្រូវបានប្រគល់ទៅឲ្យកម្លាំងសមត្ថកិច្ចពិសេសបារាំង ដែលមានតួនាទីស៊ើបអង្កេតបទឧក្រិដ្ឋភេរវកម្ម។ លោកប្រធានាធិបតីបារាំង អមដំណើរដោយលោករដ្ឋមន្ត្រីក្រសួងមហាផ្ទៃ កំពុងតែធ្វើដំណើរទៅកន្លែងកើតហេតុ។
គួររំលឹកដែរ ថាបារាំងទាំងមូល កំពុងស្ថិតក្នុងភាពអាសន្នផ្នែកសន្តិសុខ បន្ទាប់ពីបានរងអំពើភេរវកម្ម ផ្ទួនៗគ្នា ដែលលើកចុងក្រោយគឺកើតឡើងនៅទីក្រុងនីស កាលពីយប់ថ្ងៃបុណ្យជាតិបារាំង ថ្ងៃទី១៤ កក្កដា ដែលបណ្តាលឲ្យមនុស្សស្លាប់៨៥នាក់។ ដោយឡែក កាលពីឆ្នាំ២០១៥ សមត្ថកិច្ចបារាំង បានទប់ស្កាត់បានសម្រេច នូវគម្រោងវាយប្រហារភេរវកម្មមួយ ដែលបានប៉ុនប៉ងសម្លាប់មនុស្សនៅក្នុងវិហារកាតូលិក ក្នុងតំបន់Villejuifជាយក្រុងប៉ារីស ភាគខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ