អាល្លឺម៉ង់ ៖ ប្រមុខសាសនាភៀសខ្លួននៅអាមេរិកមិនមែនជាមេគំនិតធ្វើរដ្ឋប្រហារនៅតួកគីទេ
ប្រមុខភ្នាក់ងារចារកិច្ចអាល្លឺម៉ង់ លោក ប្រ៊ុយណូ កាល់ Bruno Kahl បានអះអាងនៅថ្ងៃសៅរ៍នេះ ប្រាប់អ្នកសារព័ត៌មានថា ប្រមុខសាសនាតួកគី ដែលនិរទេសខ្លួនទៅសំងំនៅសហរដ្ឋអាមេរិក មិនមែនជាមេគំនិតរៀបចំធ្វើរដ្ឋប្រហារមិនសម្រេច កាលពីខែកក្កដាឆ្នាំ២០១៦ ដូចដែលក្រុងអង់ការ៉ា ធ្លាប់ចោទប្រកាន់កន្លងមកនោះទេ។ សេចក្តីប្រកាសនេះ ធ្លាក់មកជួនចំពេលដែលភាពតានតឹងការទូតកំពុងប៉ោងខ្លាំងរវាងតួកគីជាមួយអឺរ៉ុប ជាពិសេសជាមួយប្រទេសហូឡង់ និងអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០២:០៣
តួកគីបានប្រើគ្រប់មធ្យោបាយបញ្ចុះបញ្ចូលលោកខាងលិចឱ្យជឿថាមានរដ្ឋប្រហារប្រឆាំងលោក អែរដូហ្កាន ប៉ុន្តែគ្មាននរណាជឿទេ ! នេះបើតាមប្រសាសន៍លោក ប្រ៊ុយណូ កាល់ ប្រធានចារកិច្ចអាល្លឺម៉ង់ ដោយបានគូសបញ្ជាក់ថា រដ្ឋប្រហារមិនសម្រេចថ្ងៃទី ១៥កក្កដា ២០១៦ គ្រាន់តែជាលេស បន្ថែមសម្រាប់ពន្យឿននយោបាយបោសសំអាតរបស់រដ្ឋាភិបាលតែប៉ុណ្ណោះ។
តាមការពិត ប្រតិបត្តិការបោសសម្អាត កម្ចាត់អ្នកប្រឆាំងក្នុងរដ្ឋាភិបាល បានចាប់ផ្តើមតាំងពីមុនថ្ងៃទី ១៥កក្កដាមកម្ល៉េះ។ ដោយមើលឃើញសកម្មភាពនេះ ទើបខាងយោធាចាប់ផ្តើមគិតភ័យព្រួយបារម្ភ នាំគ្នាងើបធ្វើប្រហារមុខដើម្បីកុំឱ្យលោកអែរដូហ្កានកម្ចាត់ពួកគេទាន់។ តែជាសំណាងអាក្រក់ ពួកគេភ្ញាក់ខ្លួនយឺតពេលទៅហើយ ហើយក៏ក្លាយជាក្រុមត្រូវកម្ចាត់ចោល ក្រោមទោសប៉ុនប៉ងធ្វើរដ្ឋប្រហារតែម្តង។
ឯប្រមុខសាសនា Gulen ដែលនិរទេសខ្លួននៅសហរដ្ឋអាមេរិក និងដែលជាប់ចោទថាជាមេចលនាភេរវនិយម មានទំនួលខុសត្រូវលើការស្លាប់មនុស្ស២៤៨នាក់ ក្នុងយប់នៃព្រឹត្តិការណ៍រដ្ឋប្រហារ គឺជាសមាគមស៊ីវិល អប់រំផ្នែកសាសនា និងបានសហការរាប់ទសវត្សមកហើយជាមួយលោកអែរដូហ្កាន។ សមាគមនេះមានបណ្តាញសាលារៀន សហគ្រាស ក្រុមហ៊ុននិងអង្គការក្រៅរដ្ឋាភិបាលដ៏ធំ។ នេះបើតាមលោក Bruno Kahlដដែល។
ក្រោយរដ្ឋប្រហារមិនសម្រេច មានមនុស្សជាង៤១០០០នាក់ ត្រូវចាប់ខ្លួន និងជាង១០ម៉ឺននាក់ ត្រូវដកឬព្យួរតំណែង មានអាទិ៍សាស្ត្រាចារ្យ ប៉ូលិស និងចៅក្រម។ កាលពីថ្ងៃពុធ តុលាការតួកគីបានបើកសវនការកាត់ទោសចៅក្រមម្នាក់នៃតុលាការព្រហ្មទណ្ឌអន្តរជាតិរបស់អង្គការសហប្រជាជាតិ ពីបទផ្សំគំនិតក្នុងរដ្ឋប្រហារ បើទោះបីជាមានការអំពាវនាវពីអង្គការសហប្រជាជាតិឱ្យគោរពអភ័យឯកសិទ្ធិគាត់ក៏ដោយ។
ម្យ៉ាងទៀត សេចក្តីប្រកាសរបស់ភ្នាក់ងារចារកិច្ចអាល្លឺម៉ង់ ធ្លាក់មកជួនចំពេលដែលប៊ែរឡាំងត្រៀមហាមឃាត់ជាលើកទីបី មិនឱ្យមានការប្រមូលផ្តុំធ្វើបាតុកម្មគាំទ្រលោកអែរដូហ្កាន។ ការហាមឃាត់ដែលបានធ្វើឱ្យទំនាក់ទំនងការទូតតួកគីជាមួយអឺរ៉ុបឡើងតានតឹងយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ