ម៉ូស្គូប្រតិកម្មទល់នឹងរឿងអាស្រូវគេចពន្ធនៃក្រុមមនុស្សជំនិតនឹងលោកពូទីន
តបនឹងឯកសារប៉ាណាម៉ាចេញដោយសហគមន៍អ្នកកាសែតអន្តរជាតិខាងស៊ើបអង្កេត ICIJដែលថា ក្រុមមនុស្សជំនិតនឹងលោកប្រធានាធិបតីរុស្ស៊ីពូទីន ចេះទទួលបានប្រាក់កម្ចី ២.០០០លានដុល្លារ តាមរយៈបណ្តាញធនាគារ និងក្រុមហ៊ុនដែលរកស៊ីនៅតាម ប្រទេសជា ឋានសួគ៌គេចពន្ធ អ្នកនាំពាក្យវិមានក្រេមឡាំង បានចង្អុលឲ្យឃើញថា ព័ត៌មាន បែបនេះ គឺសំដៅបង្ខូចឈ្មោះលោកពូទីន មុនដល់ពេលបោះឆ្នោតនៅរុស្ស៊ី ក្នុងថ្ងៃមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ថ្លែងថ្ងៃចន្ទម្សិលមិញ ក្នុងសន្និសីទកាសែតតាមរយៈទូរទស្សន៍ អ្នកនាំពាក្យវិមានក្រេម ឡាំងលោក ឌ្មីទ្រី ពេស្កូវ បានប្រកាសថា ទីដៅធំបំផុត នៃការផ្សាយដំណឺងបោកប្រាស់នេះ គឺ វាយប្រហារ រូបលោកប្រធានាធិបតីរុស្ស៊ី ជាពិសេស គឺក្នុងបរិបទនៃការបោះឆ្នោតសភា នៅខែ កញ្ញាខាងមុខ និង ការបោះឆ្នោតប្រធានាធិបតី ក្នុង២ឆ្នាំទៀត។ លោកពេស្កូវបន្តថា នៅបរទេស បាតុភាពភ័យខ្លាចរូបពូទីន ឥឡូវឡើងដល់កម្រិត កាលដែលគេហាមមិនឲ្យនិយាយអ្វីដែលល្អឡើយអំពីប្រទេសរុស្ស៊ី មិនថាជាទង្វើឬក៏ជា សមិទ្ធិផល របស់ រុស្ស៊ី។ ប៉ុន្តែ គេត្រូវនិយាយអ្វីដែលអាក្រក់អំពីរុស្ស៊ី ហើយត្រូវនិយាយឲ្យបានច្រើន ហើយ កាលណាគ្មានអ្វីនិយាយ គឺត្រូវ បឺតម្រាមដៃប្រឌិតឡើង។ គឺយ៉ាងនេះ ដែលរុស្ស៊ីឃើញច្បាស់។
តាមយោបល់លោកពេស្កូវ ការបើកអាក្រាតរង្គាលរឿងសម្ងាត់កំបាំង ដែលត្រូវគេឲ្យឈ្មោះថា ឯកសារប៉ាណាម៉ា គឺឥតចែងអ្វីជាជាក់លាក់ឬ ថ្មី ឡើយ ទាក់ទងនឹង រូបប្រធានាធិបតីរុស្ស៊ី។ យើងស្គាល់ច្បាស់ តើសហគមន៍អ្នកកាសែតខាងស៊ើបអង្កេតនោះជាអ្វី ក្នុងចំណោមពួកគេ មានអ្នកកាសែតជាច្រើន ដែលមុខរបរជាអ្នកកាសែត មិនមែនជាចម្បងឡើយ ដ្បិតគេជាច្រើន ជាអតីតនិយោជិកក្រសួងការបរទេសអាមេរិក ជាអតីតភ្នាក់ងារ CIA ជាអតីតភ្នាក់ងារស៊ើបការណ៍សម្ងាត់ផ្សេងៗ។ អ្នកនាំពាក្យវិមានក្រេមឡាំង បរិហារព័ត៌មានគ្រវែងចេញមក ដោយពួក អ្នកកាសែតបែបនេះ ថាជាព័ត៌មានប្រឌិត និងក្លែងបំផ្លែង។
តបនឹងសំណួរអ្នកកាសែត លោកពេស្កូវ ឆ្លើយថា វិមានក្រេមឡាំង ក្នុងដំណាក់ឥឡូវ មិនឃើញ មានន័យអ្វីណាទេ ដាក់ពាក្យប្តឹងទល់នឹង ការិយាល័យសាជីវកម្មពាណិជ្ជកម្មអន្តរជាតិរបស់ប៉ាណាម៉ា ក្រោមឈ្មោះថា Mossack Fonseca ដែលបានចេញផ្សាយ ឯកសារពាំជាប់ដោយ ធាតុពិតរបស់វា គឺ កកូរកកាយក្នុងគោលដៅមួលបង្កាច់ពាក់ព័ន្ធនឹង រូបលោកពូទីន។
គួររំលឹកថា ក្នុងឆ្នាំ២០០៧ ពេលឆ្លើយតបនឹងសំណួរអ្នកកាសែតបស្ចិមលោកម្នាក់ ថាគាត់ជា អ្នកមានបំផុតនៅរុស្ស៊ី ប្រកបដោយទឹកប្រាក់ ៤០.០០០លានដុល្លារស្អីណា លោកពូទីន ថ្លែងថា បើនរណាចេះរកឃើញលុយនេះ សូមប្រាប់គាត់ផង គាត់នឹងធ្វើកាដូឲ្យទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ