រដ្ឋមន្រ្តីការបរទេសជប៉ុនទៅអេស្ប៉ាញនិងបារាំងក្នុងពេលកំពុងមានជម្លោះជាមួយចិន
លោកហ៊្វូមីយ៉ូ គីស្ហ៊ីដា (Fumio Kishida) រដ្ឋមន្រ្តីការបរទេសជប៉ុនបានចេញដំណើរពីទីក្រុងតូក្យូ នៅថ្ងៃអង្គារនេះ សំដៅទៅកាន់ប្រទេសពីរ នៅអឺរ៉ុប គឺអេស្ប៉ាញ និងបារាំង។ គេរំពឹងថា លោកគីស្ហ៊ីដានឹងព្យាយាមពន្យល់រដ្ឋាភិបាលនៃប្រទេសទាំងពីរនេះ អំពីជំហររបស់ជប៉ុន ក្នុងជម្លោះជាមួយចិន។
ចុះផ្សាយនៅថ្ងៃ៖
ស្តាប់ - ០១:៥៩
លោកគីស្ហ៊ីដាត្រូវមកដល់ទីក្រុងម៉ាឌ្រីដ នៅល្ងាចថ្ងៃអង្គារនេះ ដោយលោកគ្រោងជួបជាមួយសមភាគីអេស្ប៉ាញ ព្រមទាំងទូរស័ព្ទទៅសួរសុខទុក្ខនាយករដ្ឋមន្រ្តី និងព្រះមហាក្សត្រអេស្ប៉ាញ នៅថ្ងៃពុធស្អែក។
បន្ទាប់មកទៀត លោករដ្ឋមន្រ្តីការបរទេសជប៉ុននឹងបន្តដំណើរទៅកាន់ទីក្រុងប៉ារីស នៅល្ងាចថ្ងៃពុធ។ នៅទីនោះ លោកគីស្ហ៊ីដានឹងជួបពិភាក្សាការងារជាមួយនឹងលោកឡូរ៉ង់ ហ្វាប៊្យូស រដ្ឋមន្រ្តីការបរទេសបារាំង មុននឹងបើកកិច្ចប្រជុំទ្វេភាគីថ្នាក់រដ្ឋមន្រ្តីការបរទេស និងរដ្ឋមន្រ្តីការពារជាតិ បារាំង-ជប៉ុន នៅថ្ងៃព្រហស្បតិ៍។ លោកគីស្ហ៊ីដាក៏គ្រោងជួបជាមួយលោកប្រធានាធិបតីបារាំងហ្វ្រង់ស័រ ហូឡង់ផងដែរ មុននឹងចេញដំណើរត្រឡប់ទៅកាន់ប្រទេសជប៉ុនវិញ នៅល្ងាចថ្ងៃព្រហស្បតិ៍។
មន្រ្តីរដ្ឋាភិបាលជប៉ុនបានឲ្យដឹងថា នៅក្នុងដំណើរទស្សនកិច្ចនៅអឺរ៉ុបនេះ លោកគីស្ហ៊ីដានឹងពន្យល់សមភាគីរបស់លោក អំពីជម្លោះ ដែលកំពុងតែកើតមាន រវាងជប៉ុន និងចិន។
ក្រុមអ្នកសង្កេតការណ៍យល់ថា ជប៉ុនកំពុងតែព្យាយាមស្វែងរកការគាំទ្រពីបណ្តាប្រទេសនៅអឺរ៉ុប និងប្រទេសមួយចំនួនផ្សេងទៀត ដែលកំពុងមានការសង្ស័យទៅលើចេតនាពិតប្រាកដរបស់ចិន ដែលកំពុងតែពង្រីកកម្លាំងទ័ព ព្រមទាំងបង្កើនសកម្មភាព នៅក្នុងតំបន់សមុទ្រដែលជាប់ជម្លោះ។
មន្រ្តីរដ្ឋាភិបាលក្រុងតូក្យូបានបង្ហើបឲ្យដឹងថា ដំណើរទស្សនកិច្ច នៅក្នុងប្រទេសអេស្ប៉ាញ និងបារាំង ក៏ជាឱកាសមួយផងដែរ សម្រាប់ឲ្យលោកគីស្ហ៊ីដាពន្យល់អំពីរឿងដែលលោកស្ហ៊ីនហ្សូ អាបេ ធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី កាលពីពេលថ្មីៗនេះ។ ការធ្វើដំណើរទៅវិហារយ៉ាស៊ូគូនី ដែលបានធ្វើឲ្យចិន ក៏ដូចជា កូរ៉េខាងត្បូងផ្ទុះកំហឹង។
កាលពីថ្ងៃសៅរ៍កន្លងទៅនេះ នៅក្នុងកិច្ចសន្ទនាតាមទូរស័ព្ទ លោកឆាក់ ហេហ្គ័ល (Chuck Hagel) រដ្ឋមន្រ្តីក្រសួងការពារជាតិអាមេរិក បានប្រាប់ទៅរដ្ឋមន្រ្តីការពារជាតិជប៉ុនថា ជប៉ុនត្រូវតែស្វែងរកវិធីស្តារទំនាក់ទំនងជាមួយនឹងប្រទេសជិតខាងរបស់ខ្លួនឡើងវិញ។ អាមេរិកកំពុងតែបារម្ភខ្លាចក្រែង ជម្លោះ រវាងជប៉ុន និងប្រទេសជិតខាងអាចនឹងបង្កឲ្យមានអស្ថិរភាពនៅក្នុងតំបន់ ហើយអាចប៉ះពាល់ដល់ផលប្រយោជន៍ជាយុទ្ធសាស្រ្តរបស់អាមេរិក។ ភាពតានតឹងរវាងជប៉ុន និងកូរ៉េខាងត្បូង ដែលសុទ្ធសឹងតែជាប្រទេសសម្ព័ន្ធមិត្តរបស់អាមេរិកនោះ ក៏មិនមែនជារឿងល្អដែរ សម្រាប់រដ្ឋាភិបាលក្រុងវ៉ាស៊ីងតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ