អ៊ីរ៉ាក់៖ ក្រុមគាំទ្រលោក ម៉ុកតាដា សាដរ៍ ធ្វើបាតុកម្មធំ ប្រឆាំងនឹងការតែងតាំងនាយករដ្ឋមន្ត្រីថ្មី
ជិតមួយឆ្នាំក្រោយការបោះឆ្នោតសភា កាលពីខែតុលាឆ្នាំមុន អ៊ីរ៉ាក់កំពុងតែស្ថិតនៅក្នុងវិបត្តិនយោបាយ យ៉ាងតានតឹងបំផុត។ ក្រុមបក្សនយោបាយ គ្មានការចុះសម្រុងគ្នា ដើម្បីតែងតាំងនាយករដ្ឋមន្ត្រីថ្មី ខណៈវិបត្តិសេដ្ឋកិច្ចកាន់តែស៊ីរូងប្រទេសនេះ ពីមួយថ្ងៃទៅមួយថ្ងៃ។ នៅថ្ងៃសៅរ៍នេះ ក្រុមប្រជាជនដែលគាំទ្រលោក ម៉ុកតាដា សាដរ៍ ដែលជាមេដឹកនាំនយោបាយអ៊ីស្លាមឈីអ៊ីតដ៏សំខាន់ម្នាក់ បាននាំគ្នាធ្វើបាតុកម្មយ៉ាងធំនៅក្រុងបាកដាត ដើម្បីប្រឆាំងនឹងគម្រោងតែងតាំង លោក ស៊ូដានី ជានាយករដ្ឋមន្ត្រីថ្មី ដែលប្រជាជនចោទថា ជាមនុស្សរបស់បក្សពួកពុករលួយដដែលៗ។
ចុះផ្សាយនៅថ្ងៃ៖
ស្តាប់ - ០២:១៧
៣ថ្ងៃបន្ទាប់ពីបានសម្រុកចូលទៅក្នុងរដ្ឋសភា ក្រុមប្រជាជនអ៊ីរ៉ាក់ ដែលគាំទ្រលោក ម៉ុកតាដា សាដរ៍ បានត្រលប់ចុះផ្លូវធ្វើបាតុកម្មធំ នៅថ្ងៃសៅរ៍ទី៣០កក្កដា ដើម្បីប្រឆាំងតវ៉ានឹងការតែងតាំងនាយករដ្ឋមន្ត្រី ដែលពួកខ្លួនមិនពេញចិត្ត។
យោងតាមអ្នករាយការណ៍ព័ត៌មាន ប្រចាំនៅទីក្រុងបាកដាត គេសង្កេតឃើញ ក្រុមមនុស្សបានសម្រុកចូលទៅក្នុងសង្កាត់បៃតង់នៃក្រុងបាកដាត ដែលជាតំបន់សំបូរទីតាំងស្ថាប័នរដ្ឋធំៗ ព្រមទាំងស្ថានទូតបរទេស។ បាតុករខ្លះ មានកាន់ទង់ជាតិ ខ្លះទៀតកាន់ផ្ទាំងបដារូបថត លោក ម៉ុកតាដា សាដរ៍ មេដឹកនាំចលនានយោបាយអ៊ីស្លាមឈីអ៊ីត ដែលពួកគេចង់ឲ្យឡើងមកធ្វើនាយករដ្ឋមន្ត្រីដឹកនាំប្រទេស។
សូមរំលឹកថា ក្រោយការបោះឆ្នោតសភា កាលពីខែតុលា អ៊ីរ៉ាក់នៅស្ថិតក្នុងការរាំងស្ទះនយោបាយដដែល។ ក្រុមបក្សនយោបាយធំៗគ្មានការស្រុះស្រួលគ្នា ដើម្បីតែងតាំងប្រធានាធិបតី ព្រមទាំងនាយករដ្ឋមន្ត្រី។ ក្រុមសម្ព័ន្ធនយោបាយដឹកនាំដោយលោកអតីតនាយករដ្ឋមន្ត្រី Nouri al-Maliki បានសម្រេចចិត្តតែងតាំង លោក Mohamed Chia al-Soudani ឲ្យធ្វើជានាយករដ្ឋមន្ត្រីថ្មី។ លោកម្នាក់នេះ ត្រូវបានគេស្គាល់ថា គឺជាអតីតទាហានប៉ារ៉ា ស្និទនឹងក្រុមឈីអ៊ីតអ៊ីរ៉ង់ ហើយដែលជាបក្សពួកតែមួយ ជាមួយនឹងមេដឹកនាំនយោបាយមុនៗ ដែលប្រជាពលរដ្ឋអ៊ីរ៉ាក់ ចោទថាជាក្រុមពុករលួយ។
ដោយឡែក ចលនានយោបាយរបស់លោក ម៉ុកតាដា សាដរ៍ ដែលជាអ្នកបានសំឡេងនាំមុខនៅក្នុងសភា ក្រោយការបោះឆ្នោតខែតុលា បានសម្រេចដើរចេញពីសភា បន្ទាប់ពីបានជំទាស់នឹងគំនិតតែងតាំងថ្នាក់ដឹកនាំធំៗ របស់ចលនានយោបាយម្ខាងទៀត។ ថ្វីបើមិនចូលរួមក្នុងសភាថ្មី តែលោកចលនានយោបាយរបស់លោក ម៉ុកតាដា សាដរ៍ មានប្រជាប្រិយភាពយ៉ាងខ្លាំង ក្នុងចំណោមប្រជាពលរដ្ឋអ៊ីរ៉ាក់ ដែលចង់បិទបញ្ចប់ការដឹកនាំរបស់ក្រុមបក្សពួកចែកអំណាចគ្នាបំរើផលប្រយោជន៍អ៊ីរ៉ង់ ហើយចង់ឃើញការធ្វើកំណែទម្រង់សេដ្ឋកិច្ច និងសង្គមអ៊ីរ៉ាក់។
គួរកត់សំគាល់ថា ស្ថានភាពជាប់គាំងនយោបាយ អមជាមួយនឹងការពន្យុះឲ្យធ្វើបាតុកម្មហិង្សានាពេលនេះ បានបង្ហាញអំពីជំរៅវិបតិ្ត ដែលគ្មានសង្ឃឹមអាចដោះស្រាយបាន ដោយសារតែភាពរឹងរូស នៃក្រុមមេដឹកនាំចលនានយោបាយអ៊ីរ៉ាក់ទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ