អ៊ីរ៉ង់ប្រតិកម្មឆេះដុំនៅក្រោយ សភាអឺរ៉ុបបោះឆ្នោតលើសេចក្តីសម្រេចដាក់ឆ្មាំបដិវត្តន៍ក្នុងបញ្ជីខ្មៅ
អ៊ីរ៉ង់ កាលពីថ្ងៃព្រហស្បតិ៍បានព្រមានពីផលវិបាកអវិជ្ជមាន បើសិនប្រទេសសមាជិកអឺរ៉ុបយល់ព្រមដាក់បញ្ចូលឆ្មាំបដិវត្តន៍អ៊ីរ៉ង់ ក្នុងបញ្ជីក្រុមភេរវនិយម ទៅតាមការទាមទាររបស់សភាអឺរ៉ុប។ នៅថ្ងៃពុធ សភាអឺរ៉ុបបានបោះឆ្នោតលើសេចក្តីសម្រេចទាមទារឲ្យគេដាក់ឆ្មាំបដិវត្តន៍របស់អ៊ីរ៉ង់ ក្នុងបញ្ជីខ្មៅ ដោយសារសកម្មភាពភេរវនិយម ការបង្រ្កាបហិង្សារបស់ក្រុមនេះទៅលើបាតុករ និងការពាក់ព័ន្ធបញ្ជូនយន្តហោះដ្រូនទៅឲ្យកងទ័ពរុស្ស៊ីសម្រាប់ធ្វើសង្រ្គាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៤១
ភាពតានតឹងរវាងអឺរ៉ុប និងអ៊ីរ៉ង់បានកើនឡើងមួយកម្រិតទៀត បន្ទាប់ពីសភាអឺរ៉ុបបានបោះឆ្នោតកាលពីថ្ងៃពុធ លើសេចក្តីសម្រេចទាមទារឲ្យប្រទេសសមាជិក ធ្វើដូចអាមេរិក ដោយដាក់បញ្ចូលកងទ័ពឆ្មាំបដិវត្តន៍អ៊ីរ៉ង់ ទៅក្នុងបញ្ជីខ្មៅ កាលពីឆ្នាំ ២០១៩។
នៅក្នុងសេចក្តីសម្រេចកាលពីថ្ងៃពុធ សភាអឺរ៉ុបបានចោទប្រកាន់កងកម្លាំងបដិវត្តន៍អ៊ីរ៉ង់ថា បានធ្វើប្រតិបត្តិការកងទ័ពនៅទឹកដីបរទេស លួចផ្តល់យន្តហោះដ្រូនទៅឲ្យកងទ័ពរុស្ស៊ី សម្រាប់ធ្វើសង្រ្គាមនៅអ៊ុយក្រែន និងបើកការបង្រ្កាបហិង្សាទៅលើបាតុករ នៅក្នុងប្រទេសអ៊ីរ៉ង់។
សេចក្តីសម្រេចរបស់សភាអឺរ៉ុបដើម្បីទាមទារឲ្យគេដាក់បញ្ចូលកងទ័ពឆ្មាំបដិវត្តន៍អ៊ីរ៉ង់ក្នុងបញ្ជីភេរវនិយម នឹងបើកផ្លូវឲ្យមានការដាក់ទណ្ឌកម្មសេដ្ឋកិច្ចទៅលើក្រុមនេះ ពីសំណាក់ប្រទេសសមាជិកអឺរ៉ុប។ សភាអឺរ៉ុបចេញសេចក្តីសម្រេច នៅប៉ុន្មានថ្ងៃមុនកិច្ចប្រជុំរដ្ឋមន្រ្តីការបរទេសអឺរ៉ុប ដែលត្រូវពិភាក្សាផងដែរពីខ្សែដាក់ទណ្ឌកម្មលើកទី៤ទៅលើអ៊ីរ៉ង់។
សេចក្តីសម្រេចរបស់សភាអឺរ៉ុប គ្មានតម្លៃផ្លូវច្បាប់ ចាប់តម្រូវឲ្យប្រទេសសមាជិកត្រូវតែធ្វើតាម។ ម្យ៉ាង ការដាក់ទណ្ឌកម្មណាមួយទៅលើអ៊ីរ៉ង់ គឺអាស្រ័យលើការសម្រេចរបស់ក្រុមប្រឹក្សាអឺរ៉ុប។
ប៉ុន្តែ នៅថ្ងៃព្រហស្បតិ៍ នៅក្នុងកិច្ចសន្ទនាតាមទូរស័ព្ទជាមួយសមភាគីអឺរ៉ុប រដ្ឋមន្រ្តីការបរទេសអ៊ីរ៉ង់ លោក Hossein Amir Abdollahian បានបរិហារសេចក្តីសម្រេចរបស់សភាអឺរ៉ុបថា មិនត្រឹមត្រូវ និងធ្វើឡើងតាមអារម្មណ៍។ សម្រាប់ប្រមុខការបរទេសអ៊ីរ៉ង់ អឺរ៉ុបកំពុងបាញ់ជើងខ្លួនឯង បើសិនអឺរ៉ុបដាក់កងទ័ពឆ្មាំបដិវត្តន៍របស់អ៊ីរ៉ង់ក្នុងបញ្ជីខ្មៅ។
បង្កើតឡើងនៅ ឆ្នាំ ១៩៧៩ នៅក្រោយបដិវត្តផ្តួលរំលំរបបរាជានិយម កងទ័ពឆ្មាំបដិវត្តន៍អ៊ីរ៉ង់ ត្រូវបានគេចាត់ទុកជាកងកម្លាំងប្រដាប់អាវុធ ដ៏មានអំណាចឥទ្ធិពល នៅអ៊ីរ៉ង់។
ប៉ុន្តែ សម្រាប់រដ្ឋមន្រ្តីការបរទេសអ៊ីរ៉ង់ កងទ័ពឆ្មាំបដិវត្តន៍ជាស្ថាប័នផ្លូវការ និងអធិបតេយ្យដែលដើរតួសំខាន់ក្នុងការធានាសន្តិសុខជាតិរបស់អ៊ីរ៉ង់ និងនៅក្នុងតំបន់ ជាពិសេសនៅក្នុងការប្រយុទ្ធប្រឆាំងក្រុមភេរវនិយម។ សេនាធិការកងទ័ពអ៊ីរ៉ង់វិញបានបន្ថែមថា ការដាក់បញ្ចូលកងទ័ពឆ្មាំបដិវត្តន៍ទៅក្នុងបញ្ជីខ្មៅ នឹងធ្វើឲ្យប៉ះពាល់ដល់សន្តិសុខ ភាពស្ងប់សុខ និងសន្តិភាព។ ជាក់ស្តែង បើសិនគ្មានការចូលរួមរបស់ឆ្មាំបដិវត្តន៍អ៊ីរ៉ង់ នោះ រដ្ឋាភិបាលអឺរ៉ុបនឹងស្ថិតក្រោមការគ្រប់គ្រងរបស់ក្រុមជីហាតអង្គការរដ្ឋអ៊ីស្លាម ដែលធ្លាប់សកម្មខ្លាំងនៅអ៊ីរ៉ាក់ និងស៊ីរី។
បន្ថែមពីលើកងទ័ពជាតិ អ៊ីរ៉ង់ មានកងទ័ពឆ្មាំបដិវត្តន៍ដែលមានសមាជិក ១២០ ០០០នាក់។ ក្រុមទាហានឆ្នើមៗទាំងនេះ ដែលមានវត្តមាននៅក្នុងឯកភាពកងទ័ពជើងទឹក ជើងគោក និងជើងអាកាស ដើរតួនាទីសំខាន់ក្នុងការធានាសន្តិសុខឲ្យកប៉ាល់ដឹកប្រេងរបស់អ៊ីរ៉ង់ នៅឈូងសមុទ្រពែរ្ស និងសមុទ្រអ័រមុតផង និងគ្រប់គ្រងកម្មវិធីអភិវឌ្ឍផលិតមីស៊ីលរបស់អ៊ីរ៉ង់ផង។
សេចក្តីសម្រេចរបស់សភាអឺរ៉ុប ទាមទារឲ្យគេដាក់បញ្ចូលកងទ័ពឆ្មាំបដិវត្តន៍អ៊ីរ៉ង់ ទៅក្នុងបញ្ជីក្រុមភេរវនិយម នឹងទៅបំពុល ទំនាក់ទំនងអឺរ៉ុប អ៊ីរ៉ង់ ដែលចុះល្អក់កករ ដោយសារ សង្រ្គាមរុស្ស៊ីឈ្លានពានអ៊ុយក្រែន និងការចាប់ឃាត់ខ្លួនជនជាតិអឺរ៉ុប នៅក្នុងទឹកដីអ៊ីរ៉ង់ នៅក្នុងបទចោទប្រកាន់លួចយកការណ៍សម្ងាត់ជាតិរបស់អ៊ីរ៉ង់។
នៅថ្ងៃអង្គារទី ១៧មករា អាជ្ញាធរអ៊ីរ៉ង់បានចាប់ខ្លួនជនជាតិអាល្លឺម៉ង់ ម្នាក់ ក្នុងបទចោទប្រកាន់លួចថតទីតាំងរោងចក្រប្រេងនៅភាគនិរតីប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ