ការផ្ទុះអាវុធនៅព្រំដែនអ៊ីស្រាអែល អេហ្ស៊ីប សម្លាប់ទាហានអ៊ីស្រាអែល៣នាក់
ទាហានអ៊ីស្រាអែល៣នាក់ និងប៉ូលិសអេហ្ស៊ីប១នាក់ ស្លាប់នៅក្នុងការប៉ះទង្គិចអាវុធ នៅព្រំដែនអេហ្ស៊ីប និងអ៊ីស្រាអែល កាលពីថ្ងៃសៅរ៍។ តាមកងទ័ពអ៊ីស្រាអែល ឧប្បត្តិហេតុកើតឡើង កើតឡើងនៅប៉ុន្មានម៉ោងក្រោយទាហានប្រចាំការនៅព្រំដែនអ៊ីស្រាអែល ទប់ស្កាត់ទាន់ពេលវេលា ការជួញដូរគ្រឿងញៀន ឆ្លងដែន ពីអេហ្ស៊ីប ចូលទៅអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
កងទ័ពអ៊ីស្រាអែលដំបូងឡើយ បានប្រកាសថា ទាហានយាមព្រំដែន២នាក់ ត្រូវខ្មាន់កាំភ្លើងបាញ់សម្លាប់នៅព្រឹកថ្ងៃសៅរ៍។ នៅប៉ុន្មានម៉ោងក្រោយ បើកប្រតិបត្តិការតាមរកមុខឃាតករ នៅព្រំដែនអ៊ីស្រាអែល អេហ្ស៊ីប កងទ័ពអ៊ីស្រាអែលនិយាយថា ទាហានអ៊ីស្រាអែលម្នាក់ទៀតស្លាប់ នៅក្នុងការប្រយុទ្ធតតាំង ជាមួយខ្មាន់កាំភ្លើង ដែលអាជ្ញាធរអ៊ីស្រាអែលកំណត់អត្តសញ្ញាណបានថា ជាប៉ូលិសអេហ្ស៊ីប។ តាមកងទ័ពអ៊ីស្រាអែលដដែល ប៉ូលិសអេហ្ស៊ីបជាខ្មាន់កាំភ្លើង ដែលសង្ស័យថា ជាអ្នកបាញ់សម្លាប់ទាហានអ៊ីស្រាអែល ២នាក់ដំបូង។
នៅក្នុងសេចក្តីថ្លែងការណ៍ ល្ងាចថ្ងៃសៅរ៍ កងទ័ពអេហ្ស៊ីបនិយាយថា មន្រ្តីរក្សាសន្តិសុខរបស់ខ្លួនម្នាក់ ដែលតាមប្រមាញ់ក្រុមជួញដូរគ្រឿងញៀន បានឆ្លង ប៉ុស្តត្រួតពិនិត្យនៅព្រំដែនអ៊ីស្រាអែល និងអេហ្ស៊ីប។ បន្ទាប់មក ក៏មានការបាញ់តបតគ្នាជាមួយ ដែលនៅក្នុងនោះ ទាហានអ៊ីស្រាអែល៣នាក់ត្រូវបាញ់សម្លាប់ ចំណែក ប៉ូលិសអេហ្ស៊ីប ក៏ស្លាប់ដោយសារគ្រាប់របស់ទាហានអ៊ីស្រាអែល។
ការប៉ះទង្គិចអាវុធ នៅព្រំដែន អេហ្ស៊ីបនិងអ៊ីស្រាអែល ជារឿងដ៏កម្រ គិតចាប់តាំងពីឆ្នាំ ១៩៧៩ នៅពេលអេហ្ស៊ីប ក្លាយជាប្រទេសអារ៉ាប់ដំបូងគេដែលចុះកិច្ចព្រមព្រៀងសន្តិភាព ជាមួយអ៊ីស្រាអែល។ នៅល្ងាចថ្ងៃសៅរ៍កងទ័ពអ៊ីស្រាអែលអះអាងថា កំពុងបើកការស៊ើបអង្កេត ដោយមានការសហការពេញទំហឹងជាមួយកងទ័ពអេហ្ស៊ីប ដើម្បីរកមូលហេតុដែលធ្វើឲ្យមានការប៉ះទង្គិចអាវុធ សម្លាប់គ្នា រវាងឆ្មាំព្រំដែនអ៊ីស្រាអែល និងប៉ូលិសអេហ្ស៊ីប។ ម្យ៉ាង កងទ័ពអ៊ីស្រាអែលចង់ដឹងផងដែរថា តើប៉ូលិសអេហ្ស៊ីបអាចផ្លោះជញ្ជាំងនៅព្រំដែន ដើម្បីឆ្លងចូលទៅក្នុងទឹកអ៊ីស្រាអែលបានយ៉ាងដូចម្តេច ព្រោះថា ជញ្ជាំង នៅព្រំដែនដែលអ៊ីស្រាអែលសាងសង់នៅភាគខាងត្បូងជាមួយប្រទេសអេហ្ស៊ីប ដើម្បីទប់ស្កាត់លំហូរជនអន្តោប្រវេសន៍អាហ្វ្រិក និងក្រុមភេរវនិយមនៅតំបន់ស៊ីណៃ មានកំពស់ខ្ពស់ និងរុំព័ទ្ធដោយលួសបន្លា។
ហេតុការណ៍ ប៉ះទង្គិចអាវុធរវាងទាហានអ៊ីស្រាអែល និងប៉ូលិសអេហ្ស៊ីប កើតឡើងនៅក្នុងទឹកដីអ៊ីស្រាអែល ត្រង់តំបន់វាលខ្សាច់ Neguev ដែលជាកន្លែងសំបូរមានការជួញដូរគ្រឿងញៀន។ ដោយមិនចង្អុរចោទប្រកាន់ចំៗ ប៉ូលិសអេហ្ស៊ីប អ្នកនាំពាក្យរបស់កងទ័ពអ៊ីស្រាអែលនិយាយថា ករណីបាញ់សម្លាប់ទាហានអ៊ីស្រាអែល អាចជាប់ពាក់ព័ន្ធនឹងការជួញដូរគ្រឿងញៀន។ កន្លែងដែលទាហានអ៊ីស្រាអែល បាញ់តបគ្នាជាមួយប៉ូលិសអេហ្ស៊ីប ស្ថិតនៅចម្ងាយ ជាង៣គីឡូម៉ែត្រ ប៉ុណ្ណោះ ពីកន្លែងដែលឆ្មាំព្រំដែនអ៊ីស្រាអែលប្រទះឃើញជណ្តើរ និងគ្រឿងញៀនដែលគេលួចនាំឆ្លងចូលទឹកដីអ៊ីស្រាអែល នៅព្រឹកថ្ងៃសៅរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ