អ៊ីរ៉ង់បង្ហាញមីស៊ីលដែលលឿនជាងសំឡេង ១៣ដង
កងទ័ពឆ្មាំបដិវត្តន៍អ៊ីរ៉ង់បង្អួតមីស៊ីលបាលីស្ទិកអ៊ីពែរសូនិក ដែលលឿនជាងសំឡេង ១៣ដង។ នៅក្នុងពិធីបង្ហាញ កាលពីថ្ងៃអង្គារ ប្រធានាធិបតីអ៊ីរ៉ង់ លោកអ៊ីប្រាហ៊ីម រ៉េស៊ី និយាយសរសើរសមត្ថភាពមីស៊ីលបាលីស្ទិកថ្មី ដែលជួយពង្រឹងអំណាចរបស់អ៊ីរ៉ង់ ឲ្យកាន់តែខ្លាំង ធ្វើឲ្យគេខ្លាចញញើត។ សម្រាប់មេដឹកនាំអ៊ីរ៉ង់ មីស៊ីលបាលីស្ទិកអ៊ីពែសូនិកដែលអ៊ីរ៉ង់ទើបផលិតបាន នឹងនាំសន្តិភាព និងស្ថិរភាពមកក្នុងតំបន់ដើមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
នៅក្នុងពិធីដែលរៀបចំឡើងក្រោមអធិបតីភាពរបស់ប្រធានាធិបតីអ៊ីរ៉ង់ កងទ័ពអវកាសរបស់ឆ្មាំបដិវត្តន៍អ៊ីរ៉ង់ តាំងបង្ហាញសមិទ្ធិផល ដែលខ្លួនសម្រេចបាន នោះគឺ មីស៊ីលបាលីស្ទិក អ៊ីពែរសូនិក ដែលលឿនជាងសំឡេង ១៥ដង។ មីស៊ីលបាលីស្ទិកចម្ងាយមធ្យម ឈ្មោះ Fattah អាចវាយប្រហារដល់គោលដៅ ដែលមានចម្ងាយ ១៤០០គីឡូម៉ែត្រ និងហោះក្នុងល្បឿនលឿនជាងសំឡេង ពី ១៣ ទៅ១៥ដង។
នៅក្នុងកម្មវិធីតាំងបង្ហាញ មីស៊ីលបាលីស្ទិកថ្មី នៅទីតាំងមួយកន្លែង ដែលប្រព័ន្ធផ្សព្វផ្សាយអ៊ីរ៉ង់មិនបញ្ចេញឈ្មោះ ប្រធានាធិបតីអ៊ីរ៉ង់ លោកអ៊ីប្រាហ៊ីម រ៉េស៊ី បានថ្លែងស្វាគម អាវុធថ្មីទំនើបដែលជួយប្រទេសអ៊ីរ៉ង់ ឲ្យកាន់តែខ្លាំងជាងមុន។
ដូចជាមីស៊ីលបាលីស្ទិកទូទៅ មីស៊ីលអ៊ីពែរសូនិកអាចមានសមត្ថភាពពាំនាំក្បាលគ្រាប់នុយក្លេអ៊ែរទៅវាយប្រហារគោលដៅ។ ប៉ុន្តែ ខុសពីមីស៊ីលបាលីស្ទិកធម្មតា មីស៊ីលបាលីស្ទិកអ៊ីពែរសូនិក អាចហោះក្នុងកំពស់ទាប ទៅតាមការបញ្ជាគ្រប់គ្រងពីលើដី។ ការណ៍នេះនឹងធ្វើឲ្យគេពិបាកចាប់សញ្ញា វាយកម្ទេចបានជាមុន។
នៅពេលប្រកាសចាប់ផ្តើមកម្មវិធីផលិតមីស៊ីលបាលីស្ទិក កាលពីខែវិច្ឆិកា មេបញ្ជាការទ័ពអ៊ីរ៉ង់ លោកAmirali Hajizadeh និយាយថា ប្រព័ន្ធមីស៊ីលអ៊ីពែរសូនិកត្រូវបានអភិវឌ្ឍជាពិសេស ដើម្បីអាចវាយទម្លុះប្រព័ន្ធខែលមីស៊ីល និងថា គេត្រូវការពេល ជាច្រើនទសវត្សរ៍ ដើម្បីអាចផលិតប្រព័ន្ធខែលមីស៊ីលដែលអាចទប់ស្កាត់ បាញ់ទម្លាក់មីស៊ីលអ៊ីពែរសូនិករបស់អ៊ីរ៉ង់។
តេហេរ៉ង់ នៅថ្ងៃអង្គារម្សិលមិញ បញ្ជាក់ថា មីស៊ីលបាលីស្ទិកអ៊ីពែរសូនិក Fattah អាចឆ្លងកាត់ វាយទម្លុះគ្រប់ប្រព័ន្ធខែលមីស៊ីលនៅក្នុងតំបន់។
អ៊ីស្រាអែល ដែលជាសត្រូវដ៏ធំរបស់អ៊ីរ៉ង់ បានអភិវឌ្ឍប្រព័ន្ធការពារមីស៊ីលទំនើបៗជាច្រើន ដើម្បីទប់ទល់ប្រឆាំងនឹងមីស៊ីលបាលីស្ទិកគ្រប់ប្រភេទ មិនថា មីស៊ីលអ៊ីពែរសូនិក ឬមីស៊ីលយឺតជាងសំឡេង។
នៅមុនអ៊ីរ៉ង់ រុស្ស៊ី កូរ៉េខាងជើង និងអាមេរិក បានប្រកាសសាកល្បងមីស៊ីលអ៊ីពែរសូនិក នៅឆ្នាំ ២០២១ ដែលធ្វើឲ្យគេបារម្ភពីការប្រកួតប្រណាំងប្រជែងគ្នាដើម្បីផលិតសព្វាវុធកាន់តែទំនើបៗ។ នៅឆ្នាំ មុនកូរ៉េខាងជើង ដែលបានប្រកាសតាំងខ្លួនជាមហាអំណាចនុយក្លេអ៊ែរក៏បានបាញ់សាកល្បងមីស៊ីលលឿនជាងសំឡេងនេះ នៅបន្ទាប់ពីរុស្ស៊ី និងចិន។ នៅខែមីនាកន្លងទៅ រុស្ស៊ីបានប្រកាសថា ខ្លួនបានបាញ់មីស៊ីលបាលីស្ទិក ថ្មីចុងក្រោយ Kinzhal ជាច្រើនគ្រាប់ នៅក្នុងសង្រ្គាមអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ