អង្គការAmnesty ទាមទារឲ្យអេមីរ៉ាត អារ៉ាប់រួម ដោះលែងសកម្មជនប្រឆាំងបើសិនមិនចង់ស្អុយឈ្មោះ នៅCop28
នៅតែ៤ខែទៀតប៉ុណ្ណោះ ប្រទេសអេមីរ៉ាត អារ៉ាប់រួមត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអន្តរជាតិស្តីពីអាកាសធាតុCop28 ដែលត្រូវប្រព្រឹត្តទៅនៅខែវិច្ឆិកា។ សម្រាប់អង្គការការពារសិទ្ធិមនុស្សAmnesty International រដ្ឋាភិបាលអេមីរ៉ាត អារ៉ាប់រួមត្រូវដោះលែងសកម្មជនប្រឆាំង ដែលអាជ្ញាធរបន្តចាប់ដាក់ឃុំ ដោយគ្មានហេតុផល។ តាមប្រធានថ្នាក់តំបន់របស់អង្គការ Amnesty International ប្រចាំនៅប្រទេសលីបង់ អេមីរ៉ាតអារ៉ាប់រួមត្រូវដោះលែងអ្នកទោសមនសិការ បើសិនមិនចង់អាម៉ាស់មុខ នៅក្នុងអំឡុងពេលដែលអេមីរ៉ាត់ អារ៉ាប់រួម ធ្វើជាម្ចាស់ផ្ទះ រៀបចំសន្និសីទអន្តរជាតិស្តី ពីអាកាសធាតុលើកទី ២៨ Cop 28។
ចុះផ្សាយនៅថ្ងៃ៖
ស្តាប់ - ០២:៣៤
នៅថ្ងៃខួប១០ឆ្នាំ នៃសវនាការដ៏ពិសេសរបស់អេមីរ៉ាតអារ៉ាប់រួម ដែលបានសម្រេចផ្តន្ទាទោសមនុស្ស៦៩នាក់ឲ្យជាប់ពន្ធនាគារ ក្នុងបទជាប់ទាក់ទងនឹងក្រុមអ៊ីស្លាមជ្រុលនិយម ក្រុមភាតរៈបងប្អូនអ៊ីស្លាមជ្រុល អង្គការការពារសិទ្ធិមនុស្សAmnesty International បានចេញសេចក្តីថ្លែងការណ៍កាលពីថ្ងៃអាទិត្យ ទី ២កក្កដា ទាមទារឲ្យអាជ្ញាធរអេមីរ៉ាតអារ៉ាប់រួមដោះលែងអ្នកប្រឆាំងដែលអាជ្ញាធរនៅបន្តឃុំខ្លួន ដោយអយុត្តិធម។
ប្រធានអង្គការការពារសិទ្ធិមនុស្ស ប្រចាំតំបន់ដើមបូព៌ា លោកស្រី Heba Morayefនិយាយរំលឹកពីសវនាកាឆ្នាំ ២០១៣ ដែលនៅក្នុងនោះ តុលាការអេមីរ៉ាតអារ៉ាប់រួមសម្រេចផ្តន្ទាទោសអ្នកប្រឆាំងរដ្ឋាភិបាល ៦៩នាក់ ក្នុងបទចោទប្រកាន់មានទំនាក់ទំនងជាមួយក្រុមភាតរៈបងប្អូនអ៊ីស្លាម ដែលអេមីរ៉ាតអារ៉ាប់រួមចាត់ទុកជាក្រុមភេរវនិយម។
នៅក្នុងចំណោមជនជាតិអេមីរ៉ាតអារ៉ាប់រួម ៦៩នាក់ដែលត្រូវតុលាការផ្តន្ទាទោស កាលពី១០ឆ្នាំមុន មាន៦០នាក់ ដែលនៅបន្តជាប់ក្នុងពន្ធនាគារ នោះបើទោះបីពួកគេបានអនុវត្តទោសរួចហើយក្តី។
តាមប្រធានអង្គការAmnesty International មនុស្ស៥១នាក់ ដែលជាសកម្មជនសិទ្ធិមនុស្ស មេធាវី គ្រូបង្រៀន និងនិស្សិត នៅបន្តជាប់ឃុំ ដោយសារអាជ្ញាធរប្រើលេសប្រយុទ្ធប្រឆាំងនឹងក្រុមជ្រុលនិយម។
“ជាម្ចាស់ផ្ទះរៀបចំសន្និសីទអន្តរជាតិស្តីពីអាកាសធាតុ Cop 28 អេមីរ៉ាតអារ៉ាប់រួមនឹងត្រូវបាញ់តម្រង់ពីគ្រប់ក្រសែភ្នែកអន្តរជាតិ។ ប្រសិនអេមីរ៉ាតអារ៉ាប់រួមនៅតែបន្តដាក់ឃុំសកម្មជនសិទ្ធិមនុស្សដោយគ្មានហេតុផល នោះ សន្និសីទអាកាសធាតុ ដែលជាព្រឹត្តិការណ៍អន្តរជាតិដ៏សំខាន់ក្នុងលោក ហើយដែលអេមីរ៉ាតអារ៉ាប់ជាអ្នករៀបចំ នឹងត្រូវប្រឡាក់ជាប់ឈ្មោះថា ជាសន្និសីទដិតដាមដោយការបង្រ្កាបសកម្មជនសិទ្ធិមនុស្ស។” នេះជាប្រសាសន៍របស់ប្រធានអង្គការAmnesty International មុននឹងអំពាវនាវឲ្យរដ្ឋាភិបាលក្នុងពិភពលោកដាក់សម្ពាធអេមីរ៉ាតអារ៉ាប់រួមឲ្យដោះលែងអ្នកទោសមនសិការ។
ក្រៅពីរងការរិះគន់ក្នុងរឿងរំលោភសិទ្ធិមនុស្ស អេមីរ៉ាតអារ៉ាប់រួម កំពុងរងការរិះគន់ក្នុងរឿងទទួលបានសិទ្ធិរៀបចំសន្និសីទអាកាសធាតុរបស់អង្គការសហប្រជាជាតិ។ ក្នុងនាមជាម្ចាស់ផ្ទះ រៀបចំ សន្និសីទអន្តរជាតិស្តីពីអាកាសធាតុ អេមីរ៉ាតអារ៉ាប់រួម ដែលជាប្រទេសមហាសេដ្ឋីប្រេងនៅដើមបូព៌ា នៅតែការពារជំហរប្រើប្រាស់ថាមពលផូស៊ីល ប្រេង និងឧស្ម័ន ដែលជាប្រភពបញ្ចេញឧស្ម័នកាបូនិក ឧស្ម័នផ្ទះកញ្ចក់ដើមហេតុនៃការឡើងកំដៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ