ចិន លេចមុខខ្លាំងឡើងៗនៅដើមបូព៌ា និងលូកដៃចូលសំណុំរឿងយេម៉ែន
ក្នុងសប្តាហ៍នេះ លោកឧត្តមស្នងការសហប្រជាជាតិទទួលបន្ទុកនៅយេម៉ែន បានជួបពិភាក្សាជាមួយ លោកបេសកជនពិសេសចិននៅតំបន់ដើមបូព៌ា។ ជំនួបនេះ ឋិតក្នុងគោលបំណងដើម្បីរកមធ្យោយបាយ និងដំណោះស្រាយ ឈានទៅរកការបញ្ចប់សង្គ្រាមរ៉ាំរ៉ៃ នៅប្រទេសយេម៉ែន។ ក្រោយពីជំនួបនេះ គឺមិនសូវជាមានសេចក្តីប្រកាសអ្វីធំដុំទេ ក៏ប៉ុន្តែ អ្នកសង្កេតការណ៍ ជឿជាក់ថា ចិន បានលូកដៃកាន់តែជ្រៅៗ នៅក្នុងដំណើរឈានទៅរកដំណោះស្រាយវិបត្តិសង្គ្រាមនៅយេម៉ែន។
ចុះផ្សាយនៅថ្ងៃ៖
ស្តាប់ - ០២:២០
ឧត្តមស្នងការសហប្រជាជាតិទទួលបន្ទុកនៅយេម៉ែន លោក Hans Grundberg បានជួបពីថ្ងៃសុក្រ ជាមួយនឹង បេសកជនពិសេសចិននៅតំបន់ដើមបូព៌ា លោក ហ្សៃ ជុន (Zhai Jun) ។ ក្នុងជំនួបគ្នានេះ គ្មានខ្លឹមសារអ្វី ក្រៅតែពាក្យពេចន៍បែបការទូត។ ក៏ប៉ុន្តែ អ្នកជំនាញកិច្ចការតំបន់ដើមបូព៌ា បានឃ្លាំមើល និងសង្កេតឃើញថា របៀបការងាររបស់មន្ត្រីទូតចិន នៅតំបន់ដើមបូព៌ា គឺធ្វើកិច្ចការ បែបស្ងាត់ៗ និង មិនសូវបញ្ចេញយោបល់ច្រូងច្រាង ឬមិននិយាយស្តីពីរឿងរ៉ាវកំពុងរស៊ើប ឬកំពុងចរចាគ្នានោះ ជះតាមបណ្តាញប្រព័ន្ធផ្សព្វផ្សាយ នោះទេ។
លោក ហ្សៃ ជុន គឺ ជាអតីតឯកអគ្គរដ្ឋទូតចិនប្រចាំក្រុងប៉ារីស និងបច្ចុប្បន្ន ជាអនុរដ្ឋមន្ត្រីក្រសួងកិច្ចបរទេសចិន ហើយ ទទួលបន្ទុកកិច្ចការនៅតំបន់ដើមបូព៌ា។ គេសម្គាល់ថា ជាង១០ឆ្នាំចុងក្រោយនេះ លោកបានជួបពិភាក្សាក្នុងសំណុំបញ្ហាសំខាន់ៗនៅក្នុងតំបន់នេះ តួយ៉ាង បញ្ហាស៊ីរី គឺលោកជួបជាមួយប្រធានាធិបតី បាស្ហា អាល់អាសាដ, បញ្ហាអ៊ីស្រាអែល-ប៉ាឡេស្ទីន ក៏លោកបានជួបផ្ទាល់ជាមួយថ្នាក់ដឹកនាំអាជ្ញាធរក្រុមហាម៉ាស់ ហើយក៏ដូចគ្នា ករណីបញ្ហាលីបង់។
ក្នុងចំណោមវិបត្តិនៅដើមបូព៌ាជាច្រើន ដែលគួរកត់សម្គាល់ខ្លាំង គឺពេលថ្មីៗនេះ ចិន បានចេញមុខ លូកដៃសម្រុះសម្រួលវិបត្តិអ៊ីរ៉ង់និងអារ៉ាប៊ីសាអូឌីត ឲ្យបានចរចាគ្នា ឈានទៅដល់ភ្ជាប់ទូតនឹងគ្នាឡើងវិញ។ ចិន ក៏បានពង្រឹងមេត្រីភាពខ្លាំងជាមួយ អេម៊ីរ៉ាត់ អារ៉ាប់រួម ដែរ។ ប្រទេសទាំងបីនេះ ជាកម្លាំងចលករធំចម្បងនៅក្នុងជម្លោះនៅយេម៉ែន។ អ្នកជំនាញបញ្ហាតំបន់ដើមបូព៌ា ជឿជាក់ថា ទំនាក់ទំនងល្អប្រពៃរបស់ ចិន ជាមួយប្រទេសទាំងបីនេះ គឺជាទម្ងន់ធ្ងន់១ និងក្លាយជាអ្នកមានទឹកមាត់ប្រៃ នៅក្នុងសង្គ្រាមវិបត្តិយេម៉ែន ដែលអូសបន្លាយ ជាង ៨ ឆ្នាំមកហើយ។
ពីមុនពេលផ្ទុះសង្គ្រាម មហាយក្សចិន ជាដៃគូពាណិជ្ជកម្មលំដាប់លេខ២ នៅយេម៉ែន ។ ក្នុងឆ្នាំ២០២១ ការនាំចូលទំនិញពីប្រទេសយេម៉ែន ចូលស្រុកចិន គឺមានទំហំទឹកប្រាក់ ៤១១ លានដុល្លារ។ ភាគច្រើន គឺ ប្រេង និង រ៉ែទង់ដែង។ អាស្រ័យហេតុនេះ រដ្ឋបាលក្រុងប៉េកាំង លូកដៃសម្រុះសម្រួលបញ្ហាយេម៉ែន គឺនឹងបង្កើនមុខមាត់ឥទ្ធិពលចិននៅដើមបូព៌ា បន្ថែមផង ហើយក៏ដើម្បីប្រយោជន៍សេដ្ឋកិច្ចពាណិជ្ជកម្មដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ