គណៈប្រតិភូអារ៉ាប៊ីសាអូឌីតជួបមេដឹកនាំឧទ្ទាមហ៊ូទីដើម្បីបង្កើតបទឈប់បាញ់អចិន្រ្តៃយ៍នៅយេម៉ែន
បរិយាកាសធូរស្រាលនឹងគ្នាឡើងវិញ រវាងអ៊ីរ៉ង់ និងអារ៉ាប៊ីសាអូឌីតកំពុងជះឥទ្ធិពលវិជ្ជមានទៅលើជម្លោះនៅក្នុងតំបន់បូព៌ា ជាពិសេសសង្រ្គាមយេម៉ែន។ តាមការចុះផ្សាយរបស់ទីភ្នាក់ងារព័ត៌មានSABA ដែលជាប្រព័ន្ធផ្សព្វផ្សាយផ្លូវការរបស់ពួកឧទ្ទាមហ៊ូទីនៅយេម៉ែន គណៈប្រតិភូអារ៉ាប៊ីសាអូឌី និងគណៈប្រតិភូប្រទេសអូម៉ង់ដែលដើរតួជាអ្នកសម្របសម្រួលនៅក្នុងសង្រ្គាមយេម៉ែនបានធ្វើដំណើរទៅដល់រដ្ឋធានីសាណារបស់់ប្រទេសយេម៉ែន តាំងពីថ្ងៃសៅរ៍ទី ៨មេសា ដើម្បីចូលរួមក្នុងតុចរចា ឈានទៅបិទបញ្ជប់ជម្លោះប្រដាប់អាវុធរវាងពួកឧទ្ទាមហ៊ូទីនៅយេម៉ែន និងអារ៉ាប៊ីសាអូឌីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
នៅក្រោមការជួយសម្របសម្រួលរបស់ប្រទេសអូម៉ង់ គណៈប្រតិភូអារ៉ាប៊ីសាអូឌីតដែលទៅដល់រដ្ឋធានីសាណាកាលពីយប់ថ្ងៃសៅរ៍ ត្រូវជួបពិភាក្សាជាមួយមេដឹកនាំក្រុមឧទ្ទាមហ៊ូទី ដើម្បីនិយាយពីការបង្កើតបទឈប់បាញ់ជាអចិន្រ្តៃយ៍ និងការបើកដំណើរការចរចាសន្តិភាពនៅយេម៉ែន។
ធ្លាក់ទៅក្នុងសង្រ្គាមស៊ីវិល៨ឆ្នាំមកនេះ យេម៉ែនបានក្លាយជាសមរភូមិប្រយុទ្ធគ្នារវាងពួកឧទ្ទាមហ៊ូទីដែលគាំទ្រដោយអ៊ីរ៉ង់ និងកងទ័ពរដ្ឋាភិបាលយេម៉ែនដែលទទួលជំនួយយោធាពីអារ៉ាប៊ីសាអូឌីត។ អារ៉ាប៊ីសាអូឌីតដែលជាប្រទេសជាប់របងជាមួយយេម៉ែន បានដឹកនាំសម្ព័ន្ធអារ៉ាប់ បើកប្រតិបត្តិការយោធានៅទឹកដីយេម៉ែន ដើម្បីប្រឆាំងពួកឧទ្ទាមហ៊ូទី។
ប៉ុន្តែនៅចំពោះមុខសង្រ្គាមស៊ីវិលគ្មានច្រកចេញនៅយេម៉ែន អារ៉ាប៊ីសាអូឌីតដែលចង់បង្វែរអាទិភាពរបស់ខ្លួនទៅលើការអភិវឌ្ឍសេដ្ឋកិច្ចក្នុងស្រុក ចាប់ផ្តើមបើកការចរចា បង្កើតបទឈប់បាញ់ជាមួយពួកឧទ្ទាមហ៊ូទី។ ការត្រលប់មកត្រូវរ៉ូវគ្នាឡើងវិញ រវាងអារ៉ាប៊ីសាអូឌីត និងអ៊ីរ៉ង់ ក្រោមការសម្របសម្រួលរបស់ចិន កាលពីពេលថ្មីៗនេះជាកត្តារុញច្រានឲ្យការចរចាអារ៉ាប៊ីសាអូឌីតជាមួយពួកឧទ្ទាមហ៊ូទីយេម៉ែនបោះជំហានមួយកម្រិតទៀត។
តាមការចុះផ្សាយរបស់ទីភ្នាក់ងារព័ត៌មានរបស់ពួកឧទ្ទាមហ៊ូទី ឈ្មោះ SABA នៅក្នុងជំនួបជាមួយគណៈប្រតិភូអារ៉ាប៊ីសាអូឌីត លោកHahdi Al-Mashat ប្រធានឧត្តមក្រុមប្រឹក្សានយោបាយដែលជាមេដឹកនាំពួកឧទ្ទាមហ៊ូទី ចង់ទាមទារឲ្យអារ៉ាប៊ីសាអូឌីតលុបចោលនយោបាយបិទខ្ទប់ទៅលើកំពង់ផែ និងអាកាសយានដ្ឋាននៅរដ្ឋធានីសាណា ដែលធ្លាក់ក្រោមការកាន់កាប់របស់ពួកឧទ្ទាមហ៊ូទី តាំងពីឆ្នាំ ២០១៥។
ប្រភពស្និទ្ធិនឹងសំណុំរឿងដែលដកស្រង់សំដីដោយទីភ្នាក់ងារព័ត៌មានអង់គ្លេសReuters បាននិយាយថា ជំនួបរវាងគណៈប្រតិភូអារ៉ាប៊ីសាអូឌីតនិងមេដឹកនាំហ៊ូទីផ្តោតសំខាន់ទៅលើការបើកកំពង់ផែ និងព្រលានយន្តហោះនៅរដ្ឋធានីសាណា បន្ទាប់ពីដែនសមុទ្រ និងដែនអាកាសរបស់យេម៉ែនត្រូវអារ៉ាប៊ីសាអូឌីតចូលគ្រប់គ្រងតាំងពីឆ្នាំ ២០១៥។ ក្រៅពីនោះ អាជ្ញាធរហ៊ូទីដែលកំពុងគ្រប់គ្រងទឹកដីភាគខាងជើងយេម៉ែនចង់ទាមទារផងដែរសំណងជំងឺចិត្តពីអារ៉ាប៊ីសាអូឌីត សម្រាប់យកទៅបើកប្រាក់ខែឲ្យបុគ្គលិក និងសម្រាប់កសាងប្រទេសយេម៉ែនឡើងវិញ។ សម្រាប់ក្រុមឧទ្ទាមហ៊ូទី ដំណើរការចរចាដើម្បីសន្តិភាពនៅយេម៉ែនត្រូវដាក់បញ្ចូលផងដែរ កាលកំណត់នៃការដកកងទ័ពបរទេសចេញពីទឹកដីយេម៉ែន។
អង្គការសហប្រជាជាតិវាយតម្លៃថា សង្រ្គាមស៊ីវិលនិងការវាយប្រហារផ្លូវអាកាសរបស់សម្ព័ន្ធអារ៉ាប់ដឹកនាំដោយអារ៉ាប៊ីសាអូឌីត បានរុញច្រានឲ្យយេម៉ែនដែលជាប្រទេសក្រជាងគេនៅឧបទ្វីបអារ៉ាប់ធ្លាក់ខ្លួនក្នុងវិបត្តិមនុស្សធម៌ធ្ងន់ធ្ងរជាងគេបំផុតក្នុងពិភពលោក។ សង្រ្គាមស៊ីវិល បានបណ្តាលឲ្យប្រជាជនយេម៉ែនជាង ៣សែនស្លាប់ ដែលនៅក្នុងនោះ ៦០%ស្លាប់ដោយសារគ្មានអាហារបរិភោគ ជំងឺ និងកង្វះទឹកស្អាតប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ