យេម៉ែន ដោះលែងឈ្លើយសឹកច្រើនរយនាក់ ក្រោយជំនួបរវាង អ៊ីរ៉ង់និងអារ៉ាប៊ីសាអូឌីត នៅចិន
៣ថ្ងៃហើយ ដែល ក្រុមឧទ្ទាមប្រដាប់ហ៊ួទី និង កងកម្លាំងរដ្ឋាភិបាលនៅយេម៉ែន បានដោះលែងអ្នកទោសនិងឈ្លើយសឹក ឲ្យគ្នាទៅវិញទៅមក ក្នុងចំនួនជាច្រើនរយនាក់។ ការដោះលែងអ្នកទោស ឈ្លើយសឹក និងចំណាប់ខ្មាំង នៅពេលនេះ គឺក្រោយពីមានជំនួបរវាង រដ្ឋមន្ត្រីការបរទេស អ៊ីរ៉ង់ និងអារ៉ាប៊ីសាអូឌីត នៅប្រទេសចិន។ ចិន ដែលបានចូលរួមធ្វើជាអន្តរការីយ៉ាងស្ងាត់ៗ នាអំលុង ២ឆ្នាំចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:៣៥
ទីក្រុងសាន់ណា គ្រប់គ្រង់កាន់កាប់ដោយក្រុមពួកឧទ្ទាមប្រដាប់អាវុធហ៊ួទី និង ទីក្រុង ម៉ារិប ( Marib) ត្រួតត្រាដោយរដ្ឋាភិបាលយេម៉ែន។ អ្នកទោសទាំង២ភាគី ត្រូវដោះដូរគ្នានិងបញ្ចូនតាមយន្តហោះ ដោយឋិតក្រោមការឃ្លាំមើលនិងជួយជ្រោមជ្រែងពីសំណាក់អង្គការកាកបាទក្រហមអន្តជាតិ។ អ្នកស្រី Jessica Moussan មន្ត្រីទទួលបន្ទុកព័ត៌មានអង្គការកាកបាទក្រហមអន្តជាតិ បានឲ្យដឹងនៅថ្ងៃអាទិត្យ ថា «ជើងយន្តហោះ១គ្រឿង ដឹកអ្នកទោស៤៨ ពីក្រុងម៉ារិប ឆ្ពោះតម្រង់ទៅក្រុងសាន់ណា។ ហើយយន្តហោះ១ទៀត ហោះបញ្ច្រាសមកវិញ ដឹកអ្នកទោស៤២នាក់។» គ្រាន់តែ១ថ្ងៃអាទិត្យ មានជើងហោះហើរមិនតិចជាង៤ជើងទេ រវាងទីក្រុងទាំងពីរ សាន់ណា និង ម៉ារិប។ បើគេសរុប ៣ថ្ងៃ អ្នកទោសមិនតិចជាង ៩០០នាក់ទេ ដែលត្រូវដោះលែង។ ក្នុងចំណោម អ្នកទោសឈ្លើយសឹក ដែលដោះលែងពីថ្ងៃសុក្រ គឺគេឃើញមាន អតីតរដ្ឋមន្ត្រីការពារជាតិម្នាក់ និង បងប្អូនប្រុសរបស់អតីតប្រធានាធិបតីយេម៉ែនម្នាក់ផង។ អ្នកតំណាងរបស់អង្គការកាកបាទក្រហមអន្តជាតិ សង្ឃឹមថានឹងមានការដោះលែងមនុស្សបន្ថែមទៀត នៅពេលដ៏ខ្លីខាងមុខនេះ។
ការដោះលែងអ្នកទោស នៅពេលនេះ ឋិតក្រោមដំណើរកិច្ចចរចាឈានទៅបញ្ចប់ជម្លោះប្រដាប់អាវុធដ៏ស្មុកស្មាញ។ ស្មុកស្មាញ ដ្បិតថា ក្រុមឧទ្ទាមប្រដាប់អាវុធហ៊ួទី មាន អ៊ីរ៉ង់ គាំទ្រពីខាងក្រោយខ្នង ហើយ កងកម្លាំងរដ្ឋាភិបាលយ៉េមែន ញាក់ខ្សែដោយសម្ព័ន្ធយោធាអន្តរជាតិ បង្កើតនិងគាំទ្រដោយ អារ៉ាប៊ីសាអូឌីត ខណៈពេលដែល អារ៉ាប៊ីសាអូឌីត និង អ៊ីរ៉ង់ ជាគូសត្រូវប្រកួតប្រជែងគ្នា នៅក្នុងតំបន់ដើមបូព៌ា។ បញ្ហាចាក់ស្រែះបែបនេះ ទើបសង្គ្រាមនៅយេម៉ែន បានអូសបន្លាយជិត១០ឆ្នាំទៅហើយ។ សង្គ្រាមនេះបានស្លាប់មនុស្សរាប់ពាន់នាក់ ហើយប្រជាជនយេម៉ែនរាប់លាននាក់ត្រូវភៀសខ្លួនចាកចោលផ្ទះសម្បែង ខ្ចាតព្រាត់ទីកំណើត។ សង្គ្រាមនៅយេម៉ែន ក៏ត្រូវអង្គការសហប្រជាជាតិ វាយតម្លៃថា ជាវិបត្តិមនុស្សធម៌យ៉ាងធ្ងន់ធ្ងរបំផុត។
ជាការកាត់សម្គាល់ ការដោះលែងអ្នកទោស នៅពេលនេះ គឺបន្ទាប់ពី រដ្ឋមន្ត្រីការបរទេសអ៊ីរ៉ង់ និង រដ្ឋមន្ត្រីការបរទេសអារ៉ាប៊ីសាអូឌីត បានជួបជជែកនៅទីក្រុងប៉េកាំង ប្រទេសចិន នៅដើមខែមេសា។ នោះជាជំនួបដ៏កម្របំផុត ដ្បិត អ៊ីរ៉ង់ និង អារ៉ាប៊ីសាអូឌីត ជាគូប្រជែងឥទ្ធិពលក្នុងតំបន់ និងមើលមុខគ្នាមិនចំ តែប្រទេសគូសត្រូវពីរជួបចាប់ដៃគ្នា ក្រោមអន្តរាគមន៍របស់ចិន។
ជំនួបគ្នានេះភស្តុតាង ថា អ្វីៗប្រព្រឹត្តទៅដោយរលូន ស្របតាមកិច្ចព្រមព្រៀងដែលប្រទេសទាំងពីរបានចុះហត្ថលេខាកាលពីដើមខែមីនា។ នៅថ្ងៃទី១០មីនា២០២៣ អ៊ីរ៉ង់ និង អារ៉ាប៊ីសាអូឌីត បានប្រកាសដំណឹងដ៏ភ្ញាក់ផ្អើល ស្តីពីឆន្ទៈភ្ជាប់ទូតនឹងគ្នាឡើងវិញ ក្រោយពីបានជួបចរចាគ្នាស្ងាត់ៗ ដោយមាន ចិន ជាអ្នកស្រុះសម្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ