ប៉ូលិសអ៊ីរ៉ង់ពង្រឹងការល្បាតនិងផាកពិន័យស្ត្រីមិនរុំស្បៃក្បាល ឡើងវិញ
តាំងពីផ្ទុះហេតុការណ៍ស្លាប់យុវតីវ័យ២២ឆ្នាំ ដោយស្នាដៃប៉ូលិសពេលចាប់ខ្លួនព្រោះមិនពាក់ស្បៃរុំក្បាល កាលពីថ្ងៃទី ១៦កញ្ញា២០២២មក ស្ត្រីអ៊ីរ៉ង់កាន់តែច្រើនឡើងៗបាននាំគ្នាចេញដើរតាមទីសាធារណៈដោយក្បាលទទេ (មិនទទូរស្បៃ)។ ប៉ុន្តែចាប់ពីថ្ងៃអាទិត្យទី ១៦កក្កដានេះទៅ ប៉ូលិសអ៊ីរ៉ង់បានប្រកាសចាប់ធ្វើល្បាតឡើងវិញ ដើម្បីផាកពិន័យស្ត្រីណាហ៊ានល្មើសច្បាប់មិនពាក់ស្បៃរុំក្បាល តាមទីសាធារណៈ។
ចុះផ្សាយនៅថ្ងៃ៖
ស្តាប់ - ០២:១១
ប៉ូលិសនឹងធ្វើល្បាតដោយថ្មើរជើង និងតាមរថយន្ត ដើម្បីព្រមាននិងពិន័យជនណាដែលបង្កអសណ្តាប់ធ្នាប់សង្គម និងមិនគោរពប្រពៃណីសម្លៀកបំពាក់ ដែលតម្រូវឱ្យស្រ្តីពាក់ស្បៃបិទបាំងសក់នៅតាមទីសាធារណៈ។ នេះជាសាររបស់អ្នកនាំពាក្យប៉ូលិសផ្សព្វផ្សាយដោយភ្នាក់ងារសារព័ត៌មានឯកជនអ៊ីរ៉ង់Tasnim។
សារព័ត៌មានអ្នកកំណែទម្រង់និយម Sharghវិញ បានអះអាងនៅថ្ងៃអាទិត្យនេះដែរថា ថ្មីៗនេះមានស្ត្រីបួននាក់ត្រូវបានកាត់ទោសឱ្យរៀនបំពាក់បំប៉នផ្នែកចិត្តវិទ្យា បោសសម្អាតមន្ទីរពេទ្យ និងជាប់បម្រាមមិនឱ្យបើកបររយៈពេលពីរឆ្នាំ ពីបទល្មើសច្បាប់។ សកម្មភាពប៉ូលិសដាស់តឿន និងចាប់ស្ត្រី មិនទទូរស្បៃក្បាលមានបង្ហោះតាមបណ្តាញសង្គម តាំងពីប៉ុន្មានថ្ងៃ មកហើយ តែភ្នាក់ងារសារព័ត៌មានបារាំងAFPមិនអាចផ្ទៀងផ្ទាត់ដោយឯករាជ្យបានទេ។
សូមរំឮកថា មរណភាពរបស់យុវតីអ៊ីរ៉ង់វ័យ២២ឆ្នាំដោយស្នាដៃប៉ូលិសសីលធម៌ចាប់ពីបទមិនទទូរស្បៃនៅថ្ងៃទី ១៦ កញ្ញា២០២២មក បានបង្កឱ្យមានចលនាបាតុកម្ម ផ្ទុះឡើងស្ទើរពេញផ្ទៃប្រទេស ក្នុងអំឡុងពេលប្រមាណ២ខែ ទើបស្ងប់ស្ងាត់ទៅវិញ ជាមួយនឹងការបាត់បង់ជីវិតមនុស្សអស់ជាច្រើនរយនាក់ ការចាប់ខ្លួនជាច្រើនពាន់នាក់ និងប្រហារជីវិតមនុស្ស៧នាក់។ ប៉ុន្តែ ក្រោយហេតុការណ៍បង្កាបហិង្សានោះ ស្ត្រីកាន់តែច្រើនឡើងៗចេញដើរដោយមិនរុំស្បៃ នៅតាមទីក្រុងធំៗ។ ចំណែកប៉ូលិសសីលធម៌អ៊ីរ៉ង់ ដែលបង្កើតឡើងដោយឧត្តមក្រុមប្រឹក្សាបដិវត្តវប្បធម៌របស់រដ្ឋាភិបាលមហាអភិរក្សមាម៉ូដអាម៉ាឌីនិចាដ នៅឆ្នាំ២០០៦ ក៏បាត់វត្តមានពីទីសាធារណៈ។ អាជ្ញាធរអ៊ីរ៉ង់ បានផ្តួចផ្តើមវិធានការថ្មី តាំងពីដើមឆ្នាំមក ដោយដាក់កាមេរ៉ាតាមផ្លូវចាំថតនិងចាប់ ឬបិទហាង បិទអាហារដ្ឋានណាដែលល្មើសច្បាប់សម្លៀកបំពាក់។ ទន្ទឹមគ្នានោះ អំណាចតុលាការនិងរដ្ឋាភិបាល បានស្នើគម្រោងច្បាប់មួយកាលពីខែឧសភា ស្តីពីការគាំទ្រវប្បធម៌ពាក់ស្បៃរំក្បាល ដើម្បីការពារប្រពៃណីសង្គមនិងពង្រឹងជីវិតគ្រួសារ។ គម្រោងច្បាប់ រងការតស៊ូមតិយ៉ាងខ្លាំងស្នើឱ្យពង្រឹងទណ្ឌកម្ម ផាកពិន័យជាប្រាក់ ចំពោះគ្រប់បុគ្គលណាដែលមិនទទូរស្បៃនៅតាមទីសាធារណៈនិងតាមបណ្តាញអនឡាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ