ក្រុមហាម៉ាសវាយប្រហារអ៊ីស្រាអែលដើម្បីបង្អាក់ដំណើររំកិលរកគ្នារវាងអ៊ីស្រាអែល និងអារ៉ាប៊ីសាអីឌីត?
កងទ័ពអ៊ីស្រាអែលកំពុងបន្តប្រតិបត្តិការសឹកលើតំបន់ហ្កាហ្សាដែលគ្រប់គ្រងដោយចលនាប៉ាឡេស្ទីនហាម៉ាស។ ប្រតិបត្តិការសឹកនេះបានធ្វើឡើងក្រោយពីពួកហាម៉ាសបានបើកការវាយប្រហារយ៉ាងភ្ញាក់ផ្អើលលើអ៊ីស្រាអែលក្នុងថ្ងៃសៅរ៍ ទី៧ តុលា។ មានការលើកឡើងថា គោលដៅនៃការវាយប្រហាររបស់ពួកហាម៉ាសលើអ៊ីស្រាអែលពេលនេះ គឺដើម្បីរារាំងការរំកិលរកគ្នារវាងអ៊ីស្រាអែល និងអារ៉ាប៊ីសាអូឌីតក្រោមគំនិតផ្តួចផ្តើមរបស់សហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០៣:០៦
រហូតមកដល់ពេលនេះ ការរំកិលរកគ្នារវាងអ៊ីស្រាអែល និងអារ៉ាប៊ីសាអូឌីតលែងជាអាថ៌កំបាំង និងត្រូវបានថ្នាក់ដឹកនាំអ៊ីស្រាអែល និងអារ៉ាប៊ីសាអូឌីតនិយាយជាចំហ។ នាឱកាសចូលរួមនៅក្នុងមហាសន្និបាតអង្គការសហប្រជាជាតិក្នុងក្រុងញូវយ៉កកាលពីខែកញ្ញា នាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូបានលើកយករឿងនេះទៅនិយាយជាមួយប្រធានាធិបតីអាមេរិកលោកបៃដិន។ លោកនេតាន់យ៉ាហ៊ូសង្ឃឹមថា អ៊ីស្រាអែល និងអារ៉ាប៊ីសាអូឌីតអាចមានកិច្ចព្រមព្រៀងសន្តិភាពមួយជាប្រវត្តិសាស្រ្តនៅក្រោមរដ្ឋបាលអាមេរិករបស់លោកបៃដិន។
ចំណែករាជទាយាទអារ៉ាប៊ីសាអូឌីតបេន សាលម៉ានដែលមានវត្តមាននៅក្នុងមហាសន្និបាតអង្គការសហប្រជាជាតិកាលណោះដែរបាននិយាយប្រាប់ទូរទស្សន៍អាមេរិក Fox News ថា ការរំកិលរកគ្នារវាងអ៊ីស្រាអែល និងអារ៉ាប៊ីសាអូឌីតមានជារៀងរាល់ថ្ងៃដើម្បីឈានទៅមានទំនាក់ទំនងធម្មតា។ តែរាជទាយាទអារ៉ាប៊ីសាអូឌីតអង្គនេះមិនភ្លេចបញ្ជាក់ថា ការមានទំនាក់ទំនងធម្មតាជាមួយអ៊ីស្រាអែលក៏ត្រូវភ្ជាប់នឹងការបន្តស្វែងរកដំណោះស្រាយឲ្យប្រជាជនប៉ាឡេស្ទីនដែរ។
គួរបញ្ជាក់ថា ការដែលក្រុមប្រទេសអារ៉ាប់ភាគច្រើនបន្តមិនព្រមភ្ជាប់ទំនាក់ទំនងប្រក្រតីជាមួយអ៊ីស្រាអែលមកទល់សព្វថ្ងៃក៏ដោយសារតែសំណុំរឿងប៉ាឡេស្ទីននេះ។ អ្វីដែលពួកគេចង់បាន គឺចង់ឃើញប៉ាឡេស្ទីនមានរដ្ឋផ្លូវការមួយរស់ក្បែរអ៊ីស្រាអែល។ អារ៉ាប៊ីសាអូឌីតដែលជាប្រទេសអារ៉ាប់មានទម្ងន់ធ្ងន់ជាងគេនៅក្នុងតំបន់តែងបរិហារអ៊ីស្រាអែលដែលបន្តធ្វើអាណានិគមលើដែនដីប៉ាឡេស្ទីន និងបិទខ្ទប់សិទ្ធិសេរីភាពរបស់ពលរដ្ឋប៉ាឡេស្ទីន។
តែនៅក្រោមគំនិតផ្តួចផ្តើមរបស់អាមេរិកតាំងពីជំនាន់លោកដូណាល់ ត្រាំ មានប្រទេសអារ៉ាប់ដូចជាអេមីរ៉ាតអារ៉ាប់រួម បារ៉ែន ម៉ារ៉ុក និងស៊ូដង់បានយល់ព្រមភ្ជាប់ទំនាក់ទំនងការទូតជាមួយអ៊ីស្រាអែល។ ទង្វើរបស់ប្រទេសអារ៉ាប់ទាំង ៤នេះបានធ្វើឲ្យប៉ាឡេស្ទីនខឹងសម្បារ និងបារម្ភយ៉ាងខ្លាំង។ អ្នកជំនាញលោក Joost Hiltermann យល់ថា ការដែលពួកហាម៉ាសបានវាយប្រហារអ៊ីស្រាអែលក៏ដោយសារតែពួកនេះខ្លាចអារ៉ាប៊ីសាអូឌីតបំភ្លេចបុព្វហេតុប៉ាឡេស្ទីន និងងាកទៅល្អូកល្អឺនជាមួយអ៊ីស្រាអែល។ ការលើកឡើងរបស់អ្នកជំនាញរូបនេះក៏ជាការយល់ឃើញរបស់ប្រមុខការទូតអាមេរិកលោកអង់តូនី ប៊្លីងកិនដែរ។
គេមិនដឹងថា តើរឿងរ៉ាវមួយនេះនឹងអាចធ្វើឲ្យអារ៉ាប៊ីសាអូឌីតប្តូរចិត្តឬអត់ទេ។ តែយ៉ាងហោចណាស់ ការបើកប្រតិបត្តិការយោធាទ្រង់ទ្រាយរបស់អ៊ីស្រាអែលលើតំបន់ប៉ាឡេស្ទីនហ្កាហ្សាពេលនេះក៏អាចធ្វើឲ្យអារ៉ាប៊ីសាអូឌីតពិចារណាពីជំហររបស់ខ្លួនឡើងវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ