អ៊ីស្រាអែលប្តេជ្ញាជីករំលើងឫសគល់ពួកហាម៉ាស ចំណែកហាម៉ាសនិងជីហាតបដិសេធសំណើឈប់បាញ់
ក្នុងសម្លៀកបំពាក់យោធា លោកនាយករដ្ឋមន្ត្រី បេនចាមិន នេតាន់យ៉ាហ៊ូ បានប្រកាសប្តេជ្ញាចិត្ត បង្កើនប្រតិបត្តិការសឹក ឲ្យកាន់តែខ្លាំងឡើងថែមទៀត ដើម្បីនឹងកម្ទេចរចនាសម្ព័ន្ធយោធាប្រដាប់អាវុធរបស់ពួកក្រុមហាម៉ាស ហើយនិងជីករំលើងឫសគល់ក្រុមឧទ្ទាមភេរវនិយមហាម៉ាសប៉ាឡេស្ទីន។ ការប្រកាសសារសឹកចម្បាំងបែបនេះ គឺធ្វើឡើងនៅថ្ងៃចន្ទ ទី២៥ធ្នូ គ្រាដែល ថ្នាក់ដឹកនាំរដ្ឋាភិបាលអ៊ីស្រាអែលរូបនេះ បានធ្វើដំណើរចុះទៅផ្ទាល់ នៅទីតាំងសមរភូមិ ហ្គាហ្សា ។
ចុះផ្សាយនៅថ្ងៃ៖
ស្តាប់ - ០២:៣៨
កាសែតអាមេរិក The Wall Street Journal បានបង្ហាញគំនិតរបស់ លោក បេនចាមិន នេតាន់យ៉ាហ៊ូ ដែលលើកឡើងថា មានតែរឿងតែបីគត់ ដែលនាំមកនូវសន្តិភាពក្នុងតំបន់ហ្គាហ្សា។ ទី១ ត្រូវកម្ទេចពួកហាម៉ាស។ ទី២ រំលាយប្រដាប់អាវុធនៅតំបន់ហ្គាហ្សា ហើយទី៣ ត្រូវសើរើឫសគល់កែទម្រង់សង្គមប៉ាឡេស្ទីន។
ការដែលនាយករដ្ឋមន្ត្រីអ៊ីស្រាអែលដាក់ចេញវិធានាការក្តៅបែបនេះ ព្រោះតែចង់ពន្លឿនឲ្យឆាប់ទទួលបាន ចំណាប់ខ្មាំង។ ចំណាប់ខ្មាំងជាប់ក្នុងកណ្តាប់ដៃពួកហាម៉ាស៨០ថ្ងៃមកហើយ ដែល អ៊ីស្រាអែល ទាមទារចង់បានជាខ្លាំង។ ដ្បិតថា ក្នុងប្រទេសអ៊ីស្រាអែលខ្លួនឯង ក្រុមគ្រួសារចំណាប់ខ្មាំង បានដាក់សម្ពាធឲ្យរដ្ឋាភិបាលប្រញាប់រំដោះកូនចៅរបស់ពួកគេមកវិញ និងបានសរសេបដាថា «ចុះប្រសិនបើចំណាប់ខ្មាំងជាកូនរបស់អ្នកវិញនោះ?» និងថា «៨០ថ្ងៃ គឺ ១នាទីៗ ដូចឋិតក្នុងឋាននរក»។
នៅថ្ងៃចន្ទដដែល ពួកក្រុមហាម៉ាស និងសម្ព័ន្ថមិត្ត ក្រុមចលនាជីហាតនៅតំបន់ហ្គាហ្សា បានបដិសេធសំណើបទឈប់បាញ់ ដើម្បីរំដោះអ្នកទោស។ ពួកគេថាមិនអាចទទួលយកការដោះដូរចំណាប់ខ្មាំងបាននោះឡើយ ប្រសិនបើគ្មានការបញ្ឈប់ប្រតិបត្តិការវាយប្រហារទាំងស្រុង និងបង្កើនជំនួយមនុស្សធម៌ ទេនោះ។ នេះបើតាមប្រភពពីទីភ្នាក់ងារព័ត៌មាន Reuters ដែលបានដំណឹងពីមន្ត្រីសន្តិសុខអេហ្ស៊ីប។ ដំណើរចរចាបទឈប់បាញ់ជាថ្មី កំពុងតែសម្របសម្រួលដោយ អេហ្ស៊ីប និងកាតារ។
ទោះបីជាកំពុងចរចាក៏ដោយចុះ តែចំពោះលោក បេនចាមិន នេតាន់យ៉ាហ៊ូ គឺនៅបន្តវាយប្រហារមិនដកដៃ។ បើតាមកាសែតក្នុងស្រុកអ៊ីស្រាអែល Haaretz គឺ នាយករដ្ឋមន្ត្រីអ៊ីស្រាអែល បានប្រកាសថា ត្រៀមខ្លួនស្រេចដើម្បីជំរុញឲ្យប្រជាជនស្ម័គ្រចិត្ត ចាកចេញពីតំបន់ហ្គាហ្សា ហើយនិងព្រមានប្រើកម្លាំងចូលគ្រប់គ្រងត្រួតពិនិត្យសន្តិសុខតំបន់ហ្គាហ្សា សាជាថ្មី ថែមទៀត។ គួររំឭកដែរថា អ៊ីស្រាអែល ធ្លាប់កាន់កាប់តំបន់ហ្គាហ្សានេះ អស់ចំនួន ៣៨ ឆ្នាំរួចហើយ គឺទើបតែលែងដៃ នៅឆ្នាំ២០០៥ តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ