អង្គការពាណិជ្ជកម្មពិភពលោកប្រមូលមូលនិធិជួយសហគ្រិននារីផ្នែកឌីជីថល
អគ្គនាយកអង្គការពាណិជ្ជកម្មពិភពលោក លោកស្រី Ngozi Okonjo-Iweala ជាតិនីហ្សេរីយ៉ា បានប្រកាសនៅថ្ងៃអាទិត្យទី ២៥កុម្ភៈនេះ ប្រមូលមូលនិធិ ៥០លានដុល្លារ សម្រាប់យកទៅជួយសហគ្រិននារី នៅក្នុងប្រទេសកំពុងអភិវឌ្ឍ និងប្រទេសក្រីក្រខ្លាំង។ ជាជំនួយដែលផ្តល់ឱកាសឱ្យស្រ្តីអាចសម្របខ្លួនទៅនឹងបច្ចេកវិទ្យាឌីជីថលផង និងបង្កើតវត្តមានតាមអនឡាញផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
នៅចំពោះមុខរដ្ឋមន្ត្រីក្រសួងពាណិជ្ជកម្មអេមីរ៉ាត់អារ៉ាប់រួម លោកស្រីអគ្គនាយកអង្គការពាណិជ្ជកម្មពិភពលោកបានប្រកាសផ្តួចផ្តើមបង្កើតមូលនិធិសម្រាប់ជួយស្ត្រីឱ្យមានស្វ័យភាព។ មូលនិធិនេះគឺជាដំណោះស្រាយមួយសម្រាប់ស្ត្រីដែលប្រឈមនឹងបញ្ហាហិរញ្ញវត្ថុ។ ស្ត្រីមានគំនិតថ្មីនិងប្លែកៗខ្លាំងណាស់ក្នុងការនាំចេញផលិតផល ព្រមទាំងស្វែងរកទីផ្សារពិភពលោក យ៉ាងសកម្ម ប៉ុន្តែសហគ្រិននារីទាំងអស់នោះត្រូវជួបឧបសគ្គរួមមួយគឺបញ្ហាហិរញ្ញវត្ថុ។ ស្ត្រីសហគ្រិនត្រូវការហិរញ្ញវត្ថុសមស្របសម្រាប់អភិវឌ្ឍសកម្មភាព និងផលិតកម្មរកស៊ីរបស់ខ្លួននៅក្នុងទីផ្សារពាណិជ្ជកម្មពិភពលោកដែលផ្តល់លទ្ធភាពដ៏មហាសាល។ នេះបើតាមពាក្យទទូចរបស់លោកស្រីអគ្គនាយកអង្គការពាណិជ្ជកម្មពិភពលោកដដែល។
ហេតុដូច្នេះហើយបានជាលោកស្រីមានគំនិតបង្កើតមូលនិធិនេះឡើង ដើម្បីយកទៅជួយក្រុមហ៊ុនដែលដឹកនាំដោយស្ត្រី នៅតាមបណ្តាប្រទេសកំពុងអភិវឌ្ឍ និងប្រទេសក្រីក្រខ្លាំង ឱ្យបានសម្របខ្លួនទៅនឹងបច្ចេកវិទ្យាឌីជីថលផង និងអាចបង្កើនវត្តមានក្រុមហ៊ុនរបស់គាត់តាមអនឡាញផង។ មូលនិធិនឹងជួយស្ត្រីជាច្រើនដែលចង់ចូលប្រលូកក្នុងប្រព័ន្ធពាណិជ្ជកម្មពិភពលោក ព្រោះស្ត្រីតំណាងឱ្យពាក់កណ្តាលនៃប្រជាជនសរុបនៅលើផែនដី តែចូលរួមចំណែកបង្កើនផលិតផលសរុបស្រុករបស់ពិភពលោកត្រឹម៣៧%ប៉ុណ្ណោះ។
សេចក្តីប្រកាសបង្កើតមូលនិធិ៥០លានដុល្លារអាមេរិកសម្រាប់ជួយសហគ្រិននារីនេះ ធ្វើឡើងតែមួយថ្ងៃមុនការបើកសន្និសីទថ្នាក់រដ្ឋមន្ត្រីលើកទី១៣នៃអង្គការពាណិជ្ជកម្មពិភពលោក នៅប្រទេសអេមីរ៉ាតអារ៉ាប់រួម ពីថ្ងៃចន្ទទី២៦ដល់ថ្ងៃទី២៩កុម្ភៈ២០២៤។ អេមីរ៉ាត់អារ៉ាប់រួម ជាម្ចាស់ផ្ទះបានប្រកាសបង់វិភាគទាន៥លានដុល្លារ និងបានអះអាងថា គំនិតផ្តួចផ្តើមបង្កើតមូលនិធិសម្រាប់សហគ្រិននារី នឹងចូលរួមចំណែកជួយ សហគ្រាស និងក្រុមហ៊ុនជាច្រើនដែលដឹកនាំដោយស្ត្រី នៅលើពិភពលោក និងជាការទទួលស្គាល់អំពីតួនាទីដ៏ចាំបាច់ របស់ស្ត្រីក្នុងការជំរុញកំណើនសេដ្ឋកិច្ច។ រដ្ឋមន្ត្រីក្រសួងពាណិជ្ជកម្មអារ៉ាប៊ីសាអូឌីតវិញ បានចាត់ទុកគំនិតផ្តួចផ្តើមរបស់អង្គការពាណិជ្ជកម្មពិភពលោកថាជាដំណាក់កាលដ៏សំខាន់ ហើយអារ៉ាប៊ីសាអូឌីតប្តេជ្ញាគាំទ្រដំណើរឆ្ពោះទៅរកស្វ័យភាពរបស់ស្ត្រី។
បើតាមអង្គការពាណិជ្ជកម្មពិភពលោក ពាណិជ្ជកម្មឌីជីថលនិងពិសេសពាណិជ្ជកម្មសេវាកម្មឌីជីថល ជាផ្នែកមួយនៃពាណិជ្ជកម្មអន្តរជាតិដែលស្គាល់កំណើនខ្លាំងលឿនរហ័យជាងគេ តាំងពីឆ្នាំ២០០៥មក ពោលគឺក្នុងកំរិតសន្ទុះ៨%ជាមធ្យម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ