ក្រុមហាម៉ាសសុំទោសប្រជាជនប៉ាឡេស្ទីន ចំណែកនាយករដ្ឋមន្រ្តីអ៊ីស្រាអែលប្រឈមនឹងបាតុកម្មក្នុងស្រុក
ជិត៦ខែក្រោយនៃសង្រ្គាមវាយប្រហាររបស់អ៊ីស្រាអែល ក្នុងទឹកដីហ្កាហ្សា ក្រុមហាម៉ាសបានចេញមុខជាលើកទី១ សុំទោសប្រជាជនប៉ាឡេស្ទីន នៅហ្កាហ្សា ដែលកំពុងឈឺចាប់ ជួបទុក្ខវេទនា ដោយសារតែសង្រ្គាមរបស់ខ្លួនប្រឆាំងនឹងកងទ័ពអ៊ីស្រាអែល។ យ៉ាងណាក៏ដោយ នៅក្នុងសេចក្តីថ្លែងការណ៍បង្ហោះផ្សាយនៅលើបណ្តាញតេឡេក្រាម កាលពីថ្ងៃអាទិត្យទី ៣១ មីនា ក្រុមហាម៉ាសនៅតែអះអាង បន្តធ្វើសង្រ្គាមប្រឆាំងអ៊ីស្រាអែល ដើម្បីជ័យជំនះ និងសេរីភាពរបស់ប្រជាជនប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៣
នៅជិត ៦ខែ នៃសង្រ្គាមសងសឹករបស់អ៊ីស្រាអែល នៅហ្កាហ្សា ដែលបានសម្លាប់មនុស្សជាង៣ម៉ឺននាក់ និងកំពុងបង្កគ្រោះអត់ឃ្លានដល់មនុស្សជាង ១លាននាក់ ក្រុមហាម៉ាសទើបចេញមុខជាលើកទី១ និយាយសុំទោសប្រជាជនប៉ាឡេស្ទីន នៅហ្កាហ្សា។ នៅក្នុងសេចក្តីថ្លែងការណ៍របស់ខ្លួន ចុះផ្សាយនៅក្នុងបណ្តាញសង្គមតេឡេក្រាម នៅថ្ងៃអាទិត្យទី ៣១មីនា ក្រុមហាម៉ាសសុំទោសប្រជាជនប៉ាឡេស្ទីនចំពោះការឈឺចាប់ ទុក្ខវេទនា ដោយសារសង្រ្គាមប្រឆាំងអ៊ីស្រាអែល។ ប៉ុន្តែ ចលនាហាម៉ាសដែលគ្រប់គ្រងទឹកដីហ្កាហ្សា តាំងពីឆ្នាំ ២០០៧ នៅតែបញ្ជាក់ការប្តេជ្ញាចិត្តរបស់ខ្លួន នៅក្នុងការបន្តធ្វើសង្រ្គាមដើម្បីទទួលបានជ័យជំនះ និងសេរីភាពទាំងស្រុងរបស់ប្រជាជនប៉ាឡេស្ទីន។
នៅមួយរយៈចុងក្រោយនេះ ថ្នាក់ដឹកនាំចលនាហាម៉ាសមួយចំនួន ដូចជាអតីតប្រធានការិយាល័យនយោបាយរបស់ហាម៉ាស លោកKhaled Mechaal ជាដើមធ្លាប់វាយតម្លៃថា ការលះបង់ ពលីកម្ម សំខាន់ ចាំបាច់ ដើម្បីរំដោះប្រជាជនប៉ាឡេស្ទីនចេញពីការឈ្លានពាន កាន់កាប់របស់អ៊ីស្រាអែល។
នៅក្នុងសារតេឡេក្រាម កាលពីថ្ងៃអាទិត្យ ក្រុមហាម៉ាសនៅបាននិយាយអរគុណប្រជាជនប៉ាឡេស្ទីន នៅហ្កាហ្សា និងថា ពួកគេដឹងច្បាស់ថា ប្រជាជនប៉ាឡេស្ទីនកំពុងចុះខ្សោយ អស់កម្លាំងជាខ្លាំង ដោយសារតែសង្រ្គាម។ ប៉ុន្តែ ក្រុមហាម៉ាសសន្យាថា នឹងព្យាយាមកាត់បន្ថយការលំបាករបស់ប្រជាជនប៉ាឡេស្ទីន ជាពិសេសតម្លៃទំនិញ ទៅតាមសមត្ថភាពរបស់ខ្លួន នៅក្នុងបរិបទសង្រ្គាមវាយប្រហាររបស់អ៊ីស្រាអែល។
ក្រុមហាម៉ាសបង្ហោះសារនិយាយសុំទោសប្រជាជនប៉ាឡេស្ទីន ក្នុងខណៈពេលដែលប្រជាជនប៉ាឡេស្ទីននៅ ហ្កាហ្សាកំពុងរងគ្រោះថ្នាក់ជីវិត ដោយសារការវាយប្រហាររបស់កងទ័ពអ៊ីស្រាអែលផង និងកំពុងជួបគ្រោះអត់ឃ្លានធ្ងន់ធ្ងរ ដោយសារតែអ៊ីស្រាអែលរឹតត្បិតការដឹកជញ្ជូនជំនួយចូលទឹកដីហ្កាហ្សា។
នៅហ្កាហ្សា នៅថ្ងៃចន្ទនេះ ក្រសួងសុខាភិបាលរបស់ក្រុមហាម៉ាសនិយាយថា ទាហានអ៊ីស្រាអែលបានដកខ្លួនចេញពីAl Shifa មន្ទីរពេទ្យដ៏ធំជាងគេនៅភាគខាងជើងហ្កាហ្សា បន្ទាប់ពីវាយចូលកាន់កាប់ អស់២សប្តាហ៍។ កងទ័ពអ៊ីស្រាអែលមិនទាន់បញ្ជាក់ដំណឹងនេះនៅឡើយទេ ប៉ុន្តែគ្រាន់តែនិយាយពីបេសកកម្មជោគជ័យ នៅក្នុងការតាមប្រមាញ់សម្លាប់សមាជិកហាម៉ាស នៅមន្ទីរពេទ្យAl Shifa។ បើតាមមន្រ្តីហាម៉ាស នៅក្រោយ ការចាកចេញរបស់ពួកទាហានអ៊ីស្រាអែល គេប្រទះឃើញសាកសពរណូករណែល ចំណែកអគារមន្ទីរពេទ្យស្ទើរទាំងស្រុងត្រូវដុតបំផ្លាញ លែងដំណើរការ។
នៅអ៊ីស្រាអែលឯណោះវិញ ប្រជាជនរាប់ពាន់នាក់បានចុះថ្នល់ធ្វើបាតុកម្ម កាលពីយប់ថ្ងៃអាទិត្យ ដើម្បីទាមទារឲ្យលោកនាយករដ្ឋមន្រ្តីនេតាន់យ៉ាហ៊ូ ចុះចេញពីតំណែង។ បាតុករភាគច្រើនដែលមានសាច់ញាតិគ្រួសារស្លាប់នៅក្នុងការវាយប្រហាររបស់ក្រុមហាម៉ាស ឬជាចំណាប់ខ្មាំងនៅហ្កាហ្សា បានស្រែកចោទប្រកាន់លោកនាយករដ្ឋមន្រ្តីនេតាន់យ៉ាហ៊ូ ថា ធ្វើផ្តេសផ្តាស គ្មានឆន្ទៈចង់ចរចាដើម្បីការដោះលែងចំណាប់ខ្មាំង។ សម្រាប់ពួកគេ អ៊ីស្រាអែលត្រូវរៀបចំការបោះឆ្នោតមុនកាលកំណត់ ដើម្បីជ្រើសរើសមេដឹកនាំថ្មីដែលមានការទទួលខុសត្រូវជាងលោកនេតាន់យ៉ាហ៊ូ។ ប៉ុន្តែ នៅថ្ងៃអាទិត្យ នាយករដ្ឋមន្រ្តីអ៊ីស្រាអែល លោកនេតាន់យ៉ាហ៊ូបានឆ្លើយតបវិញ ថា ការរៀបចំបោះឆ្នោតមុនកាលកំណត់ នៅក្នុងពេលប្រទេសកំពុងជាប់ដៃធ្វើសង្រ្គាមជាមួយក្រុមហាម៉ាស នឹងធ្វើឲ្យអ៊ីស្រាអែលជួបវិបត្តិនយោបាយ ៦ខែទៅមុខទៀត។ លើសពីនោះវានឹងទៅបំផ្លាញ កិច្ចប្រឹងប្រែងដើម្បីទាមទារការដោះលែងចំណាប់ខ្មាំង។ ហើយអ្នកដែលទាញប្រយោជន៍ពីអស្ថិរភាពនយោបាយ ការបែកបាក់ក្នុងសង្គមអ៊ីស្រាអែល គឺក្រុមហាម៉ាស។ នេះបើតាមនាយករដ្ឋមន្រ្តីអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ