ទាហានមួកខៀវអ.ស.ប.២១នាក់ត្រូវក្រុមឧទ្ទាមស៊ីរីចាប់ខ្លួន
កងកម្លាំងមួកខៀវរបស់អ.ស.ប. ចំនួន ២១នាក់ ដែលកំពុងឈរជើង នៅតាមបណ្តោយព្រំដែនស៊ីរី និងអ៊ីស្រាអែល ត្រូវបានក្រុមឧទ្ទាមស៊ីរីចាប់ខ្លួនកាលពីថ្ងៃពុធ ម្សិលមិញ។ មន្រ្តីអ.ស.ប.បានឲ្យដឹងថា ទាហានមួកខៀវទាំង ២១នាក់នេះ គឺជាទាហានហ្វ៊ីលីពីន ហើយនៅថ្ងៃព្រហស្បតិ៍នេះ ទាំងអ.ស.ប. និងទាំងរដ្ឋាភិបាលហ្វ៊ីលីពីន សុទ្ធតែបានទាមទារឲ្យក្រុមឧទ្ទាមស៊ីរីដោះលែងទាហានហ្វ៊លីពីនទាំង ២១នាក់នេះមកវិញជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ទាហានហ្វ៊ីលីពីនទាំង ២១នាក់ ដែលក្រុមឧទ្ទាមស៊ីរីចាប់ខ្លួន កាលពីម្សិលមិញនេះ គឺជាផ្នែកមួយ នៃកងកម្លាំងមួកខៀវរបស់អ.ស.ប. ដែលឈរជើងនៅតំបន់ខ្ពង់រាប Golan ដើម្បីត្រួតពិនិត្យមើលបទឈប់បាញ់ ដែលអ៊ីស្រាអែល និងស៊ីរីបានចុះ តាំងពីឆ្នាំ១៩៧៤មក។
លោកបាន គីមូន អគ្គលេខាធិការអ.ស.ប.បានប្រកាសទាមទារថា ក្រុមឧទ្ទាមស៊ីរីត្រូវតែដោះលែងទាហានមួកខៀវហ្វ៊ីលីពីនទាំងអស់នេះមកវិញជាបន្ទាន់ ហើយត្រូវតែបើកសេរីភាពឲ្យគ្រប់កងកម្លាំងមួកខៀវរបស់អ.ស.ប. អាចធ្វើដំណើរ ចល័តទី ដើម្បីបំពេញបេសកកម្មរបស់ពួកគេ។
រដ្ឋាភិបាលហ្វ៊ីលីពីនវិញ តាមរយៈសេចក្តីថ្លែងការណ៍របស់រដ្ឋមន្រ្តីក្រសួងការបរទេស បានប្រកាសថ្កោលទោស ការចាប់ខ្លួនទាហានរបស់ខ្លួន ដោយចាត់ទុកថា ជាការរំលោភយ៉ាងធ្ងន់ធ្ងរទៅលើច្បាប់អន្តរជាតិ។ ទោះជាយ៉ាងណា លោកប្រធានាធិបតីអាគីណូបានសម្តែងនូវសុទិដ្ឋិនិយមថា ទាហានមួកខៀវហ្វ៊ីលីពីនទាំង ២១នាក់នេះ ប្រាកដជានឹងត្រូវដោះលែងមកវិញ។ លោកបានប្រាប់អ្នកសារព័ត៌មានថា នៅពេលនេះ ទាហានហ្វ៊ីលីពីនទាំង ២១នាក់នេះ មិនស្ថិតក្នុងភាពគ្រោះថ្នាក់ទេ ដោយទទួលបាននូវការមើលថែទាំល្អ ពីសំណាក់ក្រុមឧទ្ទាមស៊ីរី។
ក៏ប៉ុន្តែ ក្រុមឧទ្ទាមស៊ីរី ដែលបានចាប់ខ្លួនទាហានមួកខៀវហ្វ៊ីលីពីននេះ បានទាមទារឲ្យកងទ័ពរដ្ឋាភិបាលស៊ីរីដកចេញពីភូមិ ក្នុងតំបន់ខ្ពង់រាប Golan ទើបពួកគេសុខចិត្តដោះលែងទាហានហ្វ៊ីលីពីន ទាំង ២១នាក់មកវិញ។ ពួកឧទ្ទាមក៏បានបានចោទប្រកាន់ផងដែរថា កងកម្លាំងមួកខៀវរបស់អ.ស.ប.នៅតំបន់ខ្ពង់រាប Golan នេះ ប្រកាន់ជំហរមិនអព្យាក្រឹត ដោយពួកគេបានសហការជាមួយនឹងកងទ័ពរបស់លោកបាស្ហា អាល់អាសាដ ក្នុងការវាយបង្រ្កាបក្រុមឧទ្ទាម។
គួរបញ្ជាក់ថា គិតមកទល់នឹងខែកុម្ភៈ កងកម្លាំងមួកខៀវរបស់អ.ស.ប. ដែលឈរជើង នៅក្នុងតំបន់ខ្ពង់រាប Golan មានចំនួនសរុប ប្រមាណជា ១ពាន់នាក់ មកពីប្រទេសចំនួន ៤ គឺអូទ្រីស ក្រូអាស៊ី ឥណ្ឌា និងហ្វ៊ីលីពីន។ ក៏ប៉ុន្តែ រដ្ឋាភិបាលក្រូអាស៊ីទើបនឹងបានប្រកាស កាលពីសប្តាហ៍មុនថា នឹងដកកងកម្លាំងរបស់ខ្លួនចេញពីតំបន់ខ្ពង់រាប Golan នេះ ដោយសារតែមានការបារម្ភ អំពីសុវត្ថិភាពរបស់ពួកគេ។ ជប៉ុន និងកាណាដាវិញ បានដកកងកម្លាំងរបស់ខ្លួន ចេញពីខ្ពង់រាប Golan តាំងពីប៉ុន្មានខែមកហើយ ដោយសារតែបញ្ហាសុវត្ថិភាពនេះ។
លោកប្រធានាធិបតីហ្វ៊ីលីពីន អាគីណូ បានបញ្ជាក់ប្រាប់អ្នកសារព័ត៌មាន នៅថ្ងៃនេះថា ហ្វ៊ីលីពីនមិនទាន់ធ្វើការសម្រេចនៅឡើយទេថា តើនឹងត្រូវដកកងកម្លាំងរបស់ខ្លួន ចេញពីតំបន់ខ្ពង់រាប Golan ដែរឬក៏យ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ