សង្គ្រាមអាមេរិកប្រឆាំងនឹងពួកអង្គការរដ្ឋអ៊ីស្លាម ឈានចូលដល់វគ្គថ្មី ប្រយុទ្ធលើដី ?
លោកអូបាម៉ា បានច្រានចោលគំនិតដែលអាមេរិកនឹងបញ្ជូនទ័ពទៅធ្វើសង្គ្រាមជើងគោកនៅស៊ីរី។ ប៉ុន្តែ នៅយប់ថ្ងៃសៅរ៍ម្សិលមិញ អាមេរិកបានប្រកាសទទួលជាសាធារណៈជាលើកទីមួយ ថាការបើកប្រតិបត្តិការកុម្មង់ដូរជើងគោកពិសេសនៅក្នុងស៊ីរី ដោយបានសម្លាប់មេកើយម្នាក់ ជាហិរញ្ញិករបស់អង្គការរដ្ឋអ៊ីស្លាម អាប៊ូ អាយ៉ាស និងចាប់នាងជាប្រពន្ធ បានទាំងរស់។ តើអាមេរិកកំពុងប្តូរផ្លាស់យុទ្ធសាស្ត្រឬ ?
ចុះផ្សាយនៅថ្ងៃ៖
ស្តាប់ - ០៦:១៧
ជាប្រតិបត្តិការ របស់ក្រុមកម្មង់ដូអាមេរិកពិសេសផ្នែកប្រយុទ្ធប្រឆាំងភេរវកម្ម នៅក្នុងទឹកដីស៊ីរី ដែលគ្រប់គ្រងដោយពួកជីហាតអង្គការរដ្ឋអ៊ីស្លាម។ បេសកកម្មនេះ បានទទួលការព្រមព្រៀងពីអ៊ីរ៉ាក់ ប្រព្រឹត្តទៅនៅយប់ថ្ងៃសុក្រឆ្លងមកថ្ងៃសៅរ៍ទី ១៦ ឧសភា ដោយក្រុមទាហានជើងឆើតឱ្យជ្រៀតចូលធ្វើសកម្មភាព នៅពេលយប់ ហើយគឺលោកបារ៉ាក់អូបាម៉ា ផ្ទាល់តែម្តងដែលជាអ្នកផ្តល់សញ្ញាចេញបញ្ជា តាមទូរស័ព្ទ ឱ្យកងទ័ពអាមេរិកបើកប្រតិបត្តិការ សំដៅផ្ទាំងស៊ីប គឺ អាប៊ូ សាយ៉ាស អ្នកទទួលខុសត្រូវផ្នែកហិរញ្ញវត្ថុរបស់អង្គការរដ្ឋអ៊ីស្លាម។ អាប៊ូសាយ៉ាស ត្រូវគ្រាប់ស្លាប់ នៅពេលប្រយុទ្ធគ្នា និងចាប់ខ្លួនបាន នាង អូម សាយ៉ាស ជាប្រពន្ធ ដែលអាចផ្តល់ព័ត៌មានបានច្រើនទាក់ទងនឹងសកម្មភាពរបស់អង្គការ។
ប្រតិបត្តិការលើដី បានសម្លាប់ពួកជីហាតជាង១០នាក់ និងប្រមូលបានឯកសារជាច្រើន និងកុំព្យូទ័រផង។
អាប៊ូសាយ៉ាស
ជាប្រតិបត្តិការដ៏សំខាន់ និងជាជោគជ័យមួយរបស់អាមេរិក។ ការស្លាប់របស់អាប៊ូសាយ៉ាស គឺជាការបាត់បង់លំនឹងមួយសម្រាប់ពួកជីហាត ព្រោះថាអាប៊ូសាយ៉ាស ជាមនុស្សជំនិតរបស់ អាល់ បាក់ដាឌី អ្នកដែលបានតាំងខ្លួនឯងជាប្រមុខដឹកនាំអង្គការរដ្ឋអ៊ីស្លាម និងជាអ្នកចាត់ចែងដឹកជញ្ជូនការលក់ដូរប្រេងនិងឧស្ម័ន ដែលជាប្រភពចំណូលមិនអាចខ្វះបានសម្រាប់ចិញ្ចឹមចលនាភេរវនិយម។
ប្រតិបត្តិការទោល
អាមេរិករបស់លោកអូបាម៉ា ចង់ឃើញមានការប្តូរផ្លាស់ ! ប្តូរផ្លាស់យុទ្ធសាស្ត្រ ដែលបង្ហាញថាអាមេរិកមានសមត្ថភាព និងកំពុងស្ថិតក្នុងស្ថានភាពប្រយុទ្ធអាចវាយប្រហារដល់កម្ចាត់ដល់អំណាចកំពូលតែម្តង។ ប្រតិបត្តការឆ្មក់សម្លាប់អាប៊ូសាយ៉េស ជាសារព្រមានជាក់ស្តែងមួយ និងយ៉ាងចំពេលមួយ សម្រាប់ពួកអង្គការរដ្ឋអ៊ីស្លាមដែលកម្លាំងរបស់គេកំពុងឡើងខ្លាំង និងកំពុងវាយកាន់កាប់ជាបណ្តើរៗភាគខាងជើងនៃក្រុងបូរាណ ប៉ាល់មៀរ។
អាមេរិកធ្លាប់បានដឹកនាំធ្វើប្រតិបត្តិការលើដីម្តងពីរដងដែរនៅក្នុងទឹកដីស៊ីរីនេះ ប៉ុន្តែកម្មវត្ថុគឺដើម្បីរំដោះចំណាប់ខ្មាំងតែប៉ុណ្ណោះ មិនដូចប្រតិបត្តិការម្សិលមិញ ដែលត្រូវប្រកាសទទួលស្គាល់ជាសាធារណៈទៀតនោះទេ។ ប្រឈមមុខនឹងសង្គ្រាមដែលអាចអូសពេលវេលាយូរច្រើនឆ្នាំទៀត ដូចដែលលោកអូបាម៉ា បានអះអាងនៅថ្ងៃម្សិលម្ង៉ៃ ថាសង្គ្រាមនៅស៊ីរី អាចអូលបន្លាយឆ្លងអាណត្តិ ឆ្លងដល់ឆ្នាំ២០១៧ ប្រតិបត្តិការទោសអាចជាជម្រើសថ្មីមួយបន្ថែមទៀត។
ជាផ្លូវការ អាមេរិកបើកធ្វើតែប្រតិបត្តិការផ្លូវអាកាសទម្លាក់គ្រាប់បែក ទីតាំងពួកជីហាត សេតវិមានបានបញ្ជាក់ភ្លាមថា អាមេរិកគ្មានហេតុផងអ្វីត្រូវចេញធ្វើសង្គ្រាមជើងគោក បញ្ជូនកងពលទៅប្រយុទ្ធលើសមរភូមិនៅស៊ីរីឡើយ។ ប្រតិបត្តិការផ្លូវគោក ដោយកងកម្លាំងទាហានជើងឆើតពិសេសកន្លងទៅនេះ ជាប្រតិបត្តិការទោល។ មិនបញ្ជួនទ័ព ទាំងកង ទាំងពលមែន ប៉ុន្តែប្រសិនបើប្រតិបត្តិការជើងគោក បែបដាច់ដោយឡែកមួយៗ ឆ្មក់ឱ្យចំៗ អាចផ្តល់ប្រសិទ្ធិភាពខ្ពស់កម្ចាត់មេកើយដល់កំពូលបាន តើគួរឱ្យធ្វើទៀតដែរឬទេ ? ដូចយើងធ្លាប់ឃើញស្រាប់ថា ប្រតិបត្តិការកុម្មង់ដូទ័ពឆ្មើមបែបនេះ បានធ្វើឱ្យអាមេរិកកម្ចាត់បានមេកើយអាល់កៃដា ប៊ិនឡាដិន កាលពីឆ្នាំ២០១១ នៅប្រទេសប៉ាគីស្ថាន។
ក្រុងបូរាណប៉ាល់មៀរ ស្ថិតក្នុងការគំរាមកំហែង
ព័ត៌មានទទួលបានហាក់ច្របូកច្របល់ខ្លាំងណាស់។ ល្ងាចមិញ ភាគខាងជើងក្រុងប៉ាល់មៀរបានធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម។ បើតាមសេចក្តីប្រកាសផ្លូវការរបស់រដ្ឋាភិបាលស៊ីរី ថ្ងៃនេះ អះអាងថាបានរុញពួកជីហាតចេញទៅវិញហើយ។ អ្វីប្រាកដ គឺការប្រយុទ្ធគ្នាមានលក្ខណៈសន្ធោសន្ធៅខ្លាំងណាស់ មានស្លាប់និងរបួសជាច្រើននាក់ ទាំងខាងទាហានរដ្ឋាភិបាល និងទាំងខាងពួកជីហាត។
ដោយឆ្លៀតឱកាសនឹងកម្លាំងដ៏ទន់ខ្សោយរបស់ទាហានរដ្ឋាភិបាលស៊ីរី ពួកអង្គការរដ្ឋអ៊ីស្លាមអាចសម្រុកវាយលុកយកទីតាំង ប្រកបដោយយុទ្ធសាស្ត្រមួយនេះ ព្រោះថាក្រុងប៉ាល់មៀរ អាចផ្តល់អត្ថប្រយោជន៍ច្រើន ៖ ប្រសិនបើពួកគេអាចគ្រប់គ្រងក្រុងនេះបាន គឺពង្រីកដែនអំណាច វាលខ្សាច់ដ៏ល្វឹងល្វើយរបស់ស៊ីរី នឹងក្លាយច្រកដ៏ធំ អាចបើកទំលាយ ទៅទល់នឹងខេត្តព្រំប្រទល់អ៊ីរ៉ាក់ ដែលពួកជីហាតកាប់កាប់ស្រេចទៅហើយ។ ប្រយោជន៍ដ៏ធំមួយទៀត គឺជាមធ្យោបាយឃោសនាបំប៉ោងនយោបាយជីហាត។ គ្រាន់តែចាប់ផ្តើមប្រយុទ្ធគ្នាភ្លាម ក៏បានទាក់ទាញចំណាប់អារម្មណ៍ពិភពលោកភ្លាម។ ប្រធានអង្គការយូណេស្កូ បានស្នើសុំទៅកាន់អង្គការសហប្រជាជាតិឱ្យបញ្ចេញសកម្មភាពជួយការពារក្រុងប៉ាល់មៀរ ព្រោះជាក្រុងដ៏ចំណាស់បំផុត និងមានស្ថាបត្យកម្មបូរាណៗល្អជាងគេមួយប្រចាំតំបន់បើបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ