WWF អំពាវនាវអោយរដ្ឋាភិបាលកំណត់តំបន់ការពារធម្មជាតិ មុនកំណត់ដីសម្បទានសេដ្ឋកិច្ច
នៅក្នុងសេចក្តីប្រកាសព័ត៌មានរបស់ខ្លួន អង្គការ WWF អំពាវនាវអោយរដ្ឋាភិបាលកម្ពុជាពន្លឿនការចាត់ថ្នាក់តំបន់ ការពារ ដើម្បីការពារតំបន់ដែលមានតម្លៃជីវចម្រុះខ្ពស់។ WWFបាននិយាយផ្តល់តម្លៃដល់តំបន់ព្រៃនៅភាគខាងកើតនៃប្រទេសកម្ពុជា ដែលជាជម្រកសត្វទន្សោងជាច្រើនពាន់ក្បាល។ WWF បញ្ជាក់ថា ចំនួនសត្វទន្សោងដែលកំពុងមានវត្តមាននៅកម្ពុជាគឺជាចំនួនដ៏ច្រើន ជាងគេក្នុងពិភពលោក ហើយដែលកំពុងរងការគំរាមកំហែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ក្រៅពីការបរបាញ់ តំបន់ព្រៃភាគខាងកើត និងតំបន់ព្រៃដទៃទៀត នៅក្នុងប្រទេសកម្ពុជាកំពុងទទួលរងការគំរាមកំហែង ដោយនយោបាយដីសម្បទានសេដ្ឋកិច្ចធំៗ ក្នុងរយៈពេលប៉ុន្មានឆ្នាំចុងក្រោយនេះ។ នេះគឺជាការកត់សម្គាល់របស់អង្គការមូលនិធិសកលសំរាប់អភិរក្សធម្មជាតិដែលហៅកាត់ថា WWF។ WWFត្រូវបង្ហាញអំពីបច្ច័យអាក្រក់ដែលកើតចេញពីការបំផ្លាញតំបន់ការពារ។
នៅក្នុងសេចក្តីថ្លែងការណ៍ចុងក្រោយមួយរបស់ខ្លួន WWFបានប្រាប់អោយដឹងថាចំនួនសត្វទន្សោងដែលមានច្រើនជាងគេនៅកម្ពុជានោះកំពុងរកការគំរាមកំហែងពីការបរបាញ់ និងការបាត់បង់ទីជម្រកនោះឯង។ សេចក្តីថ្លែងការណ៍សរសេរថា នៅពេលដែលសត្វទន្សោងនៅលើពិភពលោកមានចំនួនចន្លោះពី៥៩០០ទៅ១១០០០ក្បាលនោះ កម្ពុជាមានសត្វទន្សោងនេះចន្លោះពី២៧០០ទៅ៥៧០០ក្បាលរួចទៅហើយ។
សត្វទន្សោងដែលមានរូបរាងស្រដៀងនឹងសត្វគោនោះ មានចំនួនធ្លាក់ចុះជាង៩០ភាគរយចាប់តាំងពីទសវត្សទី៦០មក ហើយសត្វនេះត្រូវបានចាត់ជាប្រភេទសត្វកំពុងរងគ្រោះនិងជិតផុតពូជផងដែរ។ ការរក្សាតំបន់ព្រៃការពារគឺជាការថែរក្សាប្រព័ន្ធជីវចម្រុះ។ មន្ត្រីរបស់អង្គការWWFបានលើកឡើងថា ការរក្សាតំបន់ព្រៃការពារគឺជារួមចំណែកថែរក្សាពពួកសត្វមួយចំនួនដែលជាចំណីរបស់សត្វខ្លាធំ ដែលរួមមានដូចជាសត្វទន្សោង ជ្រូកព្រៃ និងឈ្លូសជាដើម។
លោកនីក ខក ប្រធានកម្មវិធីអភិរក្សសត្វព្រៃនៃអង្គការWWF បានពន្យល់ថា ការផ្តល់ដីសម្បទានសេដ្ឋកិច្ចក្នុងតំបន់ការពារ បើទោះជាគម្រោងសម្បទាននោះមានទំហំតូចក៏ដោយ ក៏វាបង្កអោយមានគ្រោះថ្នាក់ និងផលប៉ះពាល់អវិជ្ជមាននានាដូចគ្នា។ មិនតែប៉ុណ្ណោះ វាបំផ្លាញតម្លៃនៃកិច្ចខិតខំប្រឹងប្រែងក្នុងការងារអភិរក្សដែលរដ្ឋាភិបាលកម្ពុជា និងដៃគូបានសម្រេចក្នុងទសវត្សរ៍ចុងក្រោយនេះ។
តំណាងអង្គការWWFដដែលនិយាយថា ដើម្បីជួយសត្វខ្លាធំ និងប្រភេទសត្វជាចំណីរបស់វា ដែលក្នុងនោះរួមមានសត្វទន្សោងផង អោយមានចំនួនកើនឡើងវិញនោះនៅក្នុងតំបន់ព្រៃភាគខាងកើតក្នុងប្រទេសកម្ពុជា គេត្រូវជម្រុញអោយការគ្រប់គ្រងតំបន់ការពារមានភាពរឹងមាំនិងប្រសើរជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ