កងទ័ពអ៊ីរ៉ាក់ចូលដល់កណ្តាលក្រុងFallouja ដណ្តើមបានមូលដ្ឋានទ័ពមកវិញ
នៅអ៊ីរ៉ាក់ ថ្ងៃសុក្រ១៧មិថុនានេះ កងទ័ពអ៊ីរ៉ាក់បានចូលទៅដល់កណ្តាលទីក្រុងហ្វាលូចា ភាគខាងលិចក្រុងបាក់ដាត ដណ្តើមយកបានមូលដ្ឋានទ័ពជាតិ ពីកណ្តាប់ដៃក្រុមជីហាតរដ្ឋអ៊ីស្លាមមកវិញ។ កងទ័ពអ៊ីរ៉ាក់ក៏ដណ្តើមយកបានសង្កាត់ច្រើនកន្លែងនៅភាគខាងត្បូងនិង ខាងកើតក្រុងផងដែរ។ តាំងពីថ្ងៃ២៣ឧសភាមក កងទ័ពអ៊ីរ៉ាក់បានទទួលជំនួយផ្លូវអាកាសពីប្រទេសសម្ព័ន្ធមិត្ត ដឹកនាំដោយអាមេរិក ក្នុងការដណ្តើមយកក្រុងហ្វាលូចាមកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ប៉ុន្មានថ្ងៃចុងក្រោយនេះ កងទ័ពអ៊ីរ៉ាក់ជួបការលំបាក ក្នុងការសម្រុកទៅភាគកណ្តាលទីក្រុងហ្វាលូចា ដោយសារតែក្រុមជីហាតរដ្ឋអ៊ីស្លាមបានដាក់គ្រាប់បែករាយពាសពេញផ្លូវ។ ម្យ៉ាងទៀត ជនស៊ីវិលរាប់ពាន់នាក់ក៏កំពុងជាប់ខ្លួនក្នុងតំបន់ ជាមួយក្រុមជីហាតដែរ។ គួររំលឹកថា ក្រុមជីហាតដណ្តើមបានក្រុងហ្វាលូចា ក្នុងខែត្រ អាល់ អាន់បា ភាគខាងលិចក្រុងបាក់ដាត តាំងពីខែមករា ឆ្នាំ២០១៤ម្ល៉េះ។
ក្នុងសកម្មភាពដណ្តើមយកទីតាំងមូលដ្ឋានកងទ័ពជាតិ នៅក្រុងហ្វាលូចា កងប្រយុទ្ធប្រឆាំងភេរវកម្ម និងកងកម្លាំងទាហានផ្សេងៗរបស់អ៊ីរ៉ាក់ សុទ្ធតែសង្កេតឃើញថា ក្រុមជីហាតរដ្ឋអ៊ីស្លាមមានកម្លាំងខ្សោយជាងមុន មិនអាចតតាំងបាន។
មូលហេតុដោយសារសកម្មជនក្រុមជីហាតច្រើននាក់បាននាំគ្នារត់គេចខ្លួនទៅភាគខាងលិចក្រុងអស់។ យោងតាមមេបញ្ជាការសន្តិសុខអ៊ីរ៉ាក់ ដើម្បីគេចពីការវាយប្រហាររបស់កងទ័ព ក្រុមជីហាតបានចូលបន្លំខ្លួនជាមួយប្រជាជន។ សកម្មជនជិហាតខ្លះទៀតបានសូកលុយក្រុមទាហានដើម្បីបានរួចខ្លួន។
ឥឡូវនេះ នៅអ៊ីរ៉ាក់ ក្រុមជីហាតនៅសល់តែក្រុងមូស៊ូល តែប៉ុណ្ណោះ។ តាំងពិថ្ងៃ២៣ឧសភា ពេលកងទ័ពអ៊ីរ៉ាក់បើកយុទ្ធនាការវាយយកក្រុងហ្វាលូចា ពលរដ្ឋអ៊ីរ៉ាក់ជាងមួយសែននាក់បាននាំគ្នាភៀសខ្លួនចេញពីក្រុងនេះ។ ប្រជាជនរាប់ពាន់នាក់បានរត់រួចពីក្រុងហ្វាលូចា។ ប្រជាជនភាគច្រើនបានជ្រកកោនលាក់ខ្លួននៅតាមបន្ទាយក្បែរក្រុង។
ពេលនេះ គេបារម្ភថា ក្រុមកងទ័ពអាចនឹងចោទថាជនស៊ីវិលដែលភៀសខ្លួន ថាឃុបខិតជាមួយក្រុមជីហាតស៊ុននីត។ គួរបញ្ជាក់ថា ក្នុងការប្រយុទ្ធនឹងក្រុមជីហាតរដ្ឋអ៊ីស្លាម ក្រុមប្រយុទ្ធដែលចូលរួមជាមួយកងកម្លាំងអ៊ីរ៉ាក់ ភាគច្រើនជាអ្នកកាន់និកាយស្ហ៊ីអ៊ីត។ ក្រុមប្រយុទ្ធទាំងនេះកំពុងរងការចោទប្រកាន់ពីជនស៊ីវិលថា បានរំលោភបំពានសព្វបែបយ៉ាងលើពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ