កងទ័ពអ៊ីរ៉ាក់សម្រុកសង្គ្រប់អង្គការរដ្ឋអ៊ីស្លាមរំដោះក្រុងហ្វាលូចា
បន្ទាប់ពីបានបើកប្រតិបត្តិការជំនួយផ្លូវអាកាសពីសហរដ្ឋអាមេរិក អស់ពេញមួយសប្តាហ៍តាំងពីព្រហាមព្រឹកថ្ងៃចន្ទនេះ កងទ័ពប្រដាប់អាវុធអ៊ីរ៉ាក់ អមដោយកងកម្លាំងដៃឆ្នើតរបស់ភ្នាក់ងារប្រឆាំងភេរវកម្ម បានវាយសម្រុកចូលទៅដល់ក្រុងហ្វាលូហ្សា ដើម្បីដណ្តើមក្រុងនេះពួកអង្គការរដ្ឋអ៊ីស្លាមមកវិញ។ ក្រុងហ្វាលូហ្សា នៅកៀកបង្កើយនឹងរដ្ឋធានីបាតដាត ជាក្រុងអ៊ីរ៉ាក់ដំបូងគេ ដែលបានធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម នៅឆ្នាំ២០១៤។
ចុះផ្សាយនៅថ្ងៃ៖
យកហ្វាលូចាមកវិញ ជាកម្មវត្ថុដ៏ចំបងរបស់យោធាអ៊ីរ៉ាក់ ! ប្រសិនបើកងកម្លាំងអ៊ីរ៉ាក់អាចដណ្តើមបានក្រុងហ្វាលូចា មកវិញ គឺជាជោគជ័យប្រកបដោយនិម្មិតរូបបំផុត ទាំងសម្រាប់អ៊ីរាក់ ទាំងសម្រាប់សហរដ្ឋអាមេរិក។
និម្មិតរូបក្រុង Fallouja
ហ្វាលូចា បានធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម មុនគេ (នៅខែមករាឆ្នាំ២០១៤) ៥ខែមុនពួកអង្គការរដ្ឋអ៊ីស្លាមចាប់រុករានទន្ទានវាតទឹកដីអ៊ីរ៉ាក់និងស៊ីរី។ ជាពិសេសទៅទៀត ក្រុងហ្វាលូចានេះ បានធ្លាក់ក្នុងដៃពួកជីហាតអ៊ីស្លាម ដោយសម្រួល គ្មានការប្រយុទ្ធគ្នាអ្វីទេ ព្រោះក្រុងនេះ ជាក្រុងស៊ុននីត ហើយកាលសម័យនោះ ក្រុមឈីអ៊ីតអ្នកអំណាចនៅក្រុងបាតដាដ ត្រូវបានជាប់ចោទថាជាអ្នកសម្លាប់រង្គាលលុបបំបាត់និកាយស៊ុននីត។ ហេតុដូច្នេះហើយបានជាអាជ្ញាធរអ៊ីរ៉ាក់បច្ចុប្បន្នចង់ដណ្តើមយកក្រុងហ្វាលូចាមកវិញឱ្យបាន។
សម្រាប់អាមេរិកវិញ ក្រុងហ្វាលូចា ក៏ជាក្រុងប្រកបដោយនិម្មិតរូបបំផុតដែរ។ អាមេរិកធ្លាប់ធ្វើយុទ្ធនាការចាញ់យ៉ាងចាស់ដៃ នៅហ្វាលូចាដល់ទៅពីរលើក ក្នុងឆ្នាំ២០០៤ ដោយមានការបាត់បង់ជីវិតទាហានដល់៨០នាក់ និងយុទ្ធជនអ៊ីរ៉ាក់ ជាង២០០០នាក់។ ហ្វាលូចាធ្លាប់ជាសមរភូមិសង្គ្រាមដ៏លំបាកនិងស្វិតស្វាញបំផុតរបស់អាមេរិក បន្ទាប់ពីសង្គ្រាមនៅវៀតណាម។ ក្នុងសម័យអាមេរិកត្រួតត្រាអ៊ីរ៉ាក់ ហ្វាលូចា ជាតំណាងក្រុងតស៊ូ បះបោរ។
នៅថ្ងៃនេះ យើងបានទទួលព័ត៌មានថា កងកម្លាំងទ័ពអ៊ីរ៉ាក់ អាចវាយលុកចូលទៅក្នុងក្រុងហ្វាលូចា។ តែគេមិនដឹងថាតើនេះជាយុទ្ធសាស្ត្រដកថយរបស់ពួកអង្គការរដ្ឋអ៊ីស្លាម ឬក៏យ៉ាងណាទេ ព្រោះពួកនេះទំនងជាមិនបណ្តោយឱ្យបាត់ក្រុងហ្វាលូចា ក្រុងយុទ្ធសាស្ត្រដ៏ខំខាន់នេះដោយងាយៗទេ។ គឺពីហ្វាលូចានេះឯងដែលពួកកម្មង់ដូរអត្តឃាតជីហាតចេញធ្វើភេរវកម្មនៅក្រុងបាតដាដរាល់ថ្ងៃ។
ដូច្នេះហើយ បានជាក្រុងហ្វាលូចា គឺជានិម្មិតរូបបំផុត សម្រាប់ទាំងខាងអ៊ីរ៉ាក់ ខាងអាមេរិកនិងសម្ព័ន្ធមិត្តអន្តរជាតិ។ ហើយក៏ជានិម្មិតរូបសម្រាប់ពួកអង្គការរដ្ឋអ៊ីស្លាមដែរ។ មេកើយកាន់កាប់ក្រុងហ្វាលូចា គឺជាអ្នកកាន់កូនទ្វារសម្រាប់ទម្លាយទៅកាន់កាប់ក្រុងបាតដាដ។
ប្រតិបត្តិការហ្វាលូចា អ៊ីរ៉ាក់និង អាមេរិក និយាយក្រត្រូវគ្នា
រដ្ឋាភិបាលអ៊ីរ៉ាក់ទទូចចង់រំដោះក្រុងហ្វាលូចា ដែលនៅស្ថិតជិតបង្កើយនឹងរដ្ឋធានីប្រមាណ៥០គីឡូម៉ែត្រ។ មានជង្រុកអង្គការរដ្ឋអ៊ីស្លាមនៅក្បែរ គឺជាការគំរាមកំហែងសន្តិសុខជាតិ និងសង្គមជារៀងរាល់ថ្ងៃ តាមរយៈភេរវកម្ម។ ជាក់ស្តែងនៅថ្ងៃ ភេរវកម្មអត្តឃាតនិងបំផ្ទុះគ្រាប់បែកបានសម្លាប់ជីវិតមនុស្សអស់យ៉ាងហោច២០នាក់ និងរបួសជាង៥០នាក់។ ភេរវកម្មដែលមានយ៉ាងហោចណាស់ក៏មួយដែរក្នុងមួយថ្ងៃ។
ប៉ុន្តែគឺខាងភាគីអាមេរិកទេ ដែលមានការស្ទាក់ស្ទើរក្នុងចិត្តនោះ។ អាមេរិកធ្លាប់ស្គាល់រសជាតិសមរភូមិយ៉ាប់យឺននៅហ្វាលូចា តែមូលហេតុសំខាន់មួយទៀត គឺខ្លាចបាត់បង់ជីវិតប្រជាពលរដ្ឋដែលជាប់ក្នុងអន្ទាក់ពួករដ្ឋអ៊ីស្លាមនេះឯង។
ក្រុងហ្វាលូចា មានមនុស្សរស់នៅជាង ២៥ម៉ឺននាក់ មុនសង្គ្រាម និងសល់តែ៥ម៉ឺននាក់ទេពេលនេះ។ នេះបើតាមតួលេខរបស់អង្គការមនុស្សធម៌។ អ្នកអាចរត់ចេញរួចពីក្រញាប់ដៃពួកអង្គការរដ្ឋអ៊ីស្លាម បានរៀបរាប់អំពីទុក្ខវេទនា ភាពអត់ឃ្លាន និងការធ្វើទុក្ខបុកម្នេញ កាប់សម្លាប់ជីវិតមនុស្សយ៉ាងឃោរឃៅ។ អញ្ចឹងហើយបានជាគ្រប់គ្នាព្រួយបារម្ភខ្លាំង មិនហ៊ានវាយប្រហារហ្វាលូចា ដោយខ្លាចពួករដ្ឋអ៊ីស្លាមយកមនុស្សមកធ្វើជាខែល។ នៅម៉ោងនេះនាទីនេះ គេនៅមិនទាន់ដឹងអំពីជោគវាសនារបស់ពលរដ្ឋនៅហ្វាលូចាទេ។ នេះហើយជាបញ្ហាចំបង។
ម្យ៉ាងទៀត សម្រាប់អាមេរិក ហ្វាលូចា ថ្វីបើជាក្រុងនិម្មិតរូបមែន តែពុំមែនជាក្រុងយុទ្ធសាស្ត្រទេ។ ក្រុងដែលមានតម្លៃយុទ្ធសាស្ត្រខ្លាំងគឺក្រុងមូសូល ក្រុងទីពីររបស់អ៊ីរ៉ាក់។
តែនៅទីបំផុត ទោះត្រូវខាតបង់ជីវិតមនុស្សបន្តិចក្តី ក៏អាជ្ញាធរអ៊ីរ៉ាក់ និងអាមេរិក ត្រូវវាយយកមកវិញ ដើម្បីនាំ ជោគជ័យថ្មី។ ហើយ ដើម្បីឱ្យពួកអង្គការរដ្ឋអ៊ីស្លាមខ្ចាត់ខ្ចាយបាន សម្ព័ន្ធមិត្តអន្តរជាតិ ត្រូវការពេលវេលា ត្រូវការរៀបយុទ្ធសាស្ត្រ។ ក្នុងពេលបើកប្រតិបត្តិការនៅហ្វាលូចានេះ សម្ព័ន្ធមិត្តក៏បាននិងកំពុងបើកប្រតិបត្តិការផ្លូវអាកាសយ៉ាងសន្ធាប់ដែរ នៅក្រុងផ្សេងៗរបស់អ៊ីរ៉ាក់ និងស៊ីរី មានជាអាទិ៍ក្រុងមូសូល និងរ៉ាខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ