ស៊ីរី ៖កងទ័ពគាំទ្រដោយអាមេរិកកំពុងរុលទៅដណ្តើមទីតាំងយុទ្ធសាស្ត្រ១របស់អង្គការរដ្ឋអ៊ីស្លាម
ពួកអង្គការរដ្ឋអ៊ីស្លាមនៅស៊ីរី បាននិងកំពុងដកថយចាញ់ជាបណ្តើរៗ នៅនៅចំពោះមុខកងទ័ពរដ្ឋាភិបាលលោកអាសាដ ដែលគាំទ្រដោយរុស្ស៊ី និងនៅចំពោះមុខកងប្រដាប់អាវុធគួឌីស្ថាន ដែលគាំទ្រដោយសហរដ្ឋអាមេរិក។ កងកម្លាំងគួឌីស្ថាន ដែលរុលបន្តរុលទៅមុខជានិច្ច សំដៅក្រុង ម៉ានប៊ី Manbij ក្រុងយុទ្ធសាស្ត្រមួយរបស់ពួកអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅសល់តែ៥គីឡូម៉ែត្រទៀតប៉ុណ្ណោះ កងកម្លាំងគួឌីស្ថាន ឬកងទ័ពគួដ គាំទ្រដោយអាមេរិក នឹងចូលទៅក្រុង ម៉ានប៊ី ដែលជាទីតាំងយុទ្ធសាស្ត្រមួយរបស់ពួកអង្គការរដ្ឋអ៊ីស្លាម ប្រចាំខេត្តអាឡិបរបស់ស៊ីរី។
គិតចាប់តាំងពីថ្ងៃបើកប្រតិបត្តិការវាយលុក នៅតំបន់អាឡិបថ្ងៃទី ៣១ឧសភាមក កងកម្លាំងគួឌីស្ថាននេះរំដោះបាន១៩ភូមិ តែកម្មវត្ថុចំបងគឺដណ្តើមយកមកវិញឱ្យបានក្រុង ម៉ានប៊ី ពីកណ្តាប់ដៃពួកអង្គការរដ្ឋអ៊ីស្លាម។ ព្រោះក្រុងម៉ានប៊ី ជាផ្លូវដង្ហើម និងជាទីសំណាក់ដ៏សំខាន់មួយរបស់ពួកអង្គការរដ្ឋអ៊ីស្លាម ដោយមានកម្លាំងមនុស្ស ការដឹកអាវុធ ស្បៀង និងថវិកា តែងឆ្លងកាត់ពីតួកគីសំដៅទៅតំបន់ផ្សេងៗទៀតរបស់ស៊ីរី។ ស្ថិតនៅចម្ងាយប្រមាណតែ៣០គីឡូម៉ែត្រពីព្រំដែនប្រទេសតួកគី ការដណ្តើមបានក្រុងម៉ានប៊ី ប្រៀបដូចជាបានផ្តាច់ផ្លូវ ធ្វើឱ្យក្រុង រ៉ាខា (នៅខាងត្បូងចម្ងាយប្រមាណ១៣០គីឡូម៉ែត្រ) ដែលជាជង្រុកជីហាត រដ្ឋអ៊ីស្លាមជ្រុលនិយមដ៏ធំបំផុតមួយនៅស៊ីរី កាន់តែឯកា។
សម្រាប់អាមេរិក ផ្តាច់ផ្លូវពួកអង្គការរដ្ឋអ៊ីស្លាម មិនឱ្យភ្ជាប់ទៅព្រំដែនតួកគីបាន គឺជា ជោគជ័យផ្នែកយុទ្ធសាស្ត្រដ៏សំខាន់ ហេតុដូច្នេះហើយបានជាកងទ័ពសម្ព័ន្ធមិត្តអន្តរជាតិ បន្តធ្វើប្រតិបត្តិការផ្លូវអាកាស ៩ជើង នៅយប់មិញ លើក្រុង ម៉ានប៊ី។
ទន្ទឹមគ្នានេះ ខាងកងទ័ពរដ្ឋាភិបាលស៊ីរីរបស់លោកអាសាដដែលមានជំនួយពីរុស្ស៊ី ក៏បានបើកមុខព្រួញសំដៅក្រុងរ៉ាខា តាំងពីថ្ងៃទី ២មិថុនាមកដែរ និងស្ថិតនៅចម្ងាយតែប្រមាណ៤៥គ.ម. ពីក្រុង។
សូមបញ្ជាក់ថា ប្រតិបត្តិការប្រឆាំងនឹងពួកអង្គការរដ្ឋអ៊ីស្លាម កំពុងប្រព្រឹត្តទៅទាំងនៅស៊ីរី និងអ៊ីរ៉ាក់។ នៅអ៊ីរ៉ាក់ បន្ទាប់ពីបានប្រយុទ្ធយ៉ាងស្វិតស្វាញដណ្តើមក្រុងហ្វាលូចាមកវិញ អស់ពីរសប្តាហ៍ កងទ័ពអ៊ីរ៉ាក់បានរុលទៅមុខខ្លាំង ចូលក្នុងក្រុង និងបានរកឃើញរណ្តៅកប់ខ្មោចរួមដ៏ធំមួយ មានសាកសពប្រមាណជាង ៤រយនាក់ ភាគច្រើនជាទាហានផង។ ប៉ុន្តែការដណ្តើមយកក្រុងហ្វាលូចាទាំងស្រុងមកវិញ ហាក់ដូចមានការលំបាកខ្លាំង ដោយពួកជីហាតរដ្ឋអ៊ីស្លាមធន់ខ្លាំងផងនិងវត្តមានជនស៊ីវិលច្រើនផង (៥ម៉ឺននាក់)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ