ក្រោយភេវកម្ម នគរបាលតួកគីចុះរាវចាប់បណ្តាញក្រុមជីហាតពេញប្រទេស
ថ្ងៃអង្គារទី ១២ មករា ប្រទេសតួកគីបានទទួលរងអំពើភេរវកម្មមួយទៀត ដែលតាមការសង្ស័យ គឺជាស្នាដៃរបស់ក្រុមជីហាតអង្គការរដ្ឋអ៊ីស្លាម។ ភេរវកម្មអត្តឃាត ដែលបានធ្វើឡើងនៅកណ្តាលក្រុងអ៊ីស្តង់ប៊ូល ចំនុចគោលដៅទេសចរណ៍ បានសម្លាប់មនុស្សយ៉ាងហោចណាស់១០នាក់ ដែលក្នុងនោះ មាន៨នាក់ជាអ្នកទេសចរណ៍អាល្លឺម៉ង់។ នគរបាលតួកគី បានចេញប្រតិបត្តិការបោសសម្អាត បណ្តាញភេរវកម្មជីហាត ដោយបានចាប់ខ្លួនមនុស្សជាច្រើននាក់ ក៏ប៉ុន្តែគេនៅមិនទាន់ដឹងថា មនុស្សដែលត្រូវបានចាប់ខ្លួន មានជាប់ពាក់ព័ន្ធនឹងភេរវកម្មថ្មីនេះដែររឺទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
អ្នកស្លាប់១០នាក់ មាន៨នាក់ជាជនជាតិអាល្លឺម៉ង់៖
បីខែបន្ទាប់ពីមានភេរវកម្មអត្តឃាតនៅកណ្តាលក្រុងអង់ការ៉ា ដែលបានសម្លាប់មនុស្សអស់១០៣នាក់ ថ្ងៃអង្គារទី ១២ មករា ភេរវកម្មថ្មីមួយទៀតបានកើតឡើងកណ្តាលក្រុងអ៊ីស្តង់ប៊ូលម្តង ដែលជាទីក្រុងទេសចរណ៍ដ៏សំខាន់របស់តួកគី។ ជនរងគ្រោះស្លាប់១០នាក់ ដែលក្នុងនោះ៨នាក់ ជាជនជាតិអាល្លឺម៉ង់។ ហើយក្នុងចំណោមអ្នករងរបួស១៥នាក់ ក៏មានជនជាតិអាល្លឺម៉ង់៩នាក់ផងដែរ។ នៅថ្ងៃពុធនេះ លោករដ្ឋមន្ត្រីក្រសួងមហាផ្ទៃអាល្លឺម៉ង់ បានអញ្ជើញទៅដល់ទីក្រុងអ៊ីស្តង់ប៊ូលផ្ទាល់ផងដែរ ដើម្បីពិនិត្យស្ថានការណ៍។
យោងតាមការសន្និដ្ឋានបឋម ភេរវកម្មអត្តឃាតនេះ ជាស្នាដែរបស់បណ្តាញភេរវកម្មជីហាតអង្គការរដ្ឋអ៊ីស្លាម។ នគរបាលតួកគី បានវែកមុខដឹងពីអត្តសញ្ញាណ របស់ជនដៃដល់ ដែលបានយកគ្រាប់បែកចងបំផ្ទុះជាប់នឹងខ្លួន នៅក្នុងកណ្តាលចំណោមក្រុមអ្នកទេសចរណ៍។ ជនដៃដល់ មានសញ្ជាតិស៊ីរី តែមានកំណើតនៅអារ៉ាប៊ីសាអូឌីត ក្នុងឆ្នាំ១៩៨៨។ ភេរវជន គឺជាកូនចៅរបស់ក្រុមជីហាតអង្គការរដ្ឋអ៊ីស្លាម។
ដាក់មួយសំណាញ់ ចាប់បាន៦៥នាក់ និងជនជាតិរុស្ស៊ី៣នាក់៖
ការវាយប្រហាររបៀបនេះ ត្រូវបានគេយល់ថា ជាការចង់សំដៅព្រមានតួកគីផង និងអាល្លឺម៉ង់ផង ដែលកំពុងតែចូលរួមធ្វើសង្រ្គាមកម្ទេចក្រុមជីហាតនេះនៅស៊ីរី។ គ្រាន់តែមានហេតុការណ៍ភេរវកម្មនេះភ្លាម តួកគីបានបន្ថែមប្រតិបត្តិការតាមកម្ចាត់បណ្តាញភេរវកម្មជីហាត ដែលមាននៅពាសពេញតួកគី។ គ្រាន់តែថ្ងៃអង្គារ នគរបាលប្រឆាំងភេរវកម្មតួកគី បានចាប់បានមនុស្ស៦៥នាក់ នៅតាមបណ្តាទីក្រុងផ្សេងៗគ្នា ដែលគេសង្ស័យថាជាបណ្តាញក្រុមជីហាត។ ហើយនៅថ្ងៃពុធនេះ ជនជាតិរុស្ស៊ី៣នាក់ទៀត ត្រូវបានចាប់ខ្លួន នៅទីក្រុងអង់តាលីយ៉ា ភាគខាងត្បូងក្បែរព្រំដែនរវាងតួកគី និងស៊ីរី។ វត្ថុតាង និងឯកសារជាច្រើន ត្រូវបានរឹបអូស ដែលសំអាងថាជនជាតិរុស្ស៊ីទាំងបីនាក់នេះ ពិតជាកូនចៅរបស់បណ្តាញក្រុមជីហាតអង្គការរដ្ឋអ៊ីស្លាម។ ក្រសួងការបរទេសរុស្ស៊ី ក៏បានបញ្ជាក់ផងដែរអំពីការចាប់ខ្លួននេះ។
តួកគី ភ្លឺភ្នែក៖
ទោះបីជាយ៉ាងណា មកត្រឹមពេលនេះ គេនៅមិនទាន់ដឹងថា ក្នុងចំណោមមនុស្សដែលទើបតែត្រូវបានចាប់ខ្លួនទាំងនេះ មានជាប់ពាក់ព័ន្ធទៅនឹង ភេរវកម្មកាលពីម្សិលមិញនោះទេ។ សូមរំលឹកថា តួកគីកន្លងមក ហេតុតែចង់ឃើញរបបស៊ីរី របស់បាស្ហា អាល់អាសាដរលំ សុខចិត្តបិទភ្នែកខ្ទប់ត្រចៀក បើកផ្លូវចេញចូលឲ្យក្រុមជីហាតអ៊ីស្លាមឆ្លងកាត់ សំងំធ្វើសំបុកភ្ញាស់កូនពេញដែនដីតួកគី។ ប៉ុន្តែពេលនេះ តួកគីហាក់កំពុងតែភ្ញាក់ខ្លួន ហើយសន្យាថានឹងកម្ចាត់បណ្តាញភេរវកម្មជីហាតនេះ ឲ្យខាងតែបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ