អ៊ីស្រាអែលនិងប៉ាឡេស្ទីនព្រមព្រៀងគ្នាបើកកិច្ចចរចាសន្តិភាពឡើងវិញ
ទីបំផុតទៅ កិច្ចខិតខំប្រឹងប្រែងរបស់រដ្ឋមន្ត្រីការបរទេរសអាមរិក លោក ចន ឃែរី បានទទួលលទ្ធផលហើយ។ កិច្ចព្រមព្រៀងដើម្បីបើកការចរចាសន្តិភាពឡើងវិញរវាងប៉ាឡេស្ទីន និងអ៊ីស្រាអែល ត្រូវបានរកឃើញបន្ទាប់ពីកិច្ចពិភាក្សាយ៉ាងយូរក្រោមការសម្របសម្រួលរបស់លោក ចន ឃែរី។
ចុះផ្សាយនៅថ្ងៃ៖ កែប្រែថ្ងៃទី៖
រដ្ឋមន្ត្រីការបរទេសអាមេរិក លោក ចន ឃែរី បានប្រកាសឲ្យដឹងកាលពីល្ងាចថ្ងៃសុក្រម្សិលមិញថា លោកមានសេចក្តីរីករាយដែលបានសម្រេចកិច្ចព្រមព្រៀងជាគោលការណ៍មួយស្តីពីការចរចាសន្តិភាពរវាងអ៊ីស្រាអែល និងប៉ាឡេស្ទីន។ ប៉ុន្តែ ប្រមុខកាទូតអាមេរិកបានបដិសេធមិនប្រាប់ឲ្យដឹងអំពីខ្លឹមសារនៃកិច្ចព្រមព្រៀងនោះនៅឡើយទេ ដោយលោកគ្រាន់តែបញ្ជាក់ថា ភាគីពាក់ពន្ធ័កំពុងបន្តពិភាក្សាដើម្បីឈានទៅបញ្ចប់កិច្ចព្រមព្រៀងនេះ។
បើតាមលោក ចន ឃែរី ជំនួបចរចាគ្នាជាថ្មីរវាងភាគីទាំងពីរនឹងត្រូវបន្តធ្វើនៅសប្តាហ៍ក្រោយនៅទីក្រុងវ៉ាស៊ីនតោន។ រដ្ឋមន្ត្រីការបរទេសអាមេរិកបានកោតសរសើរចំពោះភាពជាអ្នកដឹកនាំដ៏ក្លាហានរបស់ប្រធានាធិបតី ប៉ាឡេស្ទីន លោក Mahmoud Abbas និងនាយករដ្ឋមន្ត្រីអ៊ីស្រាអែល លោក Netanyahu ដែលបានសម្រេចយកជម្រើសដ៏លំបាក និងបានដើរតួនាទីគន្លឹះសម្រាប់កិច្ចចរចានេះ។ កិច្ចព្រមព្រៀងនេះបានសម្រេចឡើងបន្ទាប់ពីកិច្ចពិភាក្សាគ្នាយ៉ាងតឹងតែងរយៈពេល៤ថ្ងៃក្រោមការសម្របសម្រួលរបស់លោក ចន ឃែរី ។
ប៉ុន្តែ ក្រុម Hamas ដែលកំពុងតែគ្រប់គ្រងអំណាចនៅតំបន់ Gaza បានទាត់ចោលកិច្ចចរចាសន្តិភាពនេះ។ ក្រុមនេះបានបញ្ជាក់ថា លោក ប្រធានាធិបតី Mahmoud Abbas គ្មានសមត្ថកិច្ចក្នុងការចរចាបញ្ហាសំខាន់ៗក្នុងនាមប្រជាជនប៉ាឡេស្ទីនឡើយ។
អគ្គលេខាធិការអង្គការសហប្រជាជាតិ លោក បាន គីមូន បានស្នើឲ្យអ៊ីស្រាអែល និង ប៉ាឡេស្ទីនបង្ហាញភាពក្លាហាន និងការទទួលខុសត្រូវចំពោះកិច្ចចរចាស្វែងរកសន្តិភាពនេះ។ ចំណែកឯប្រមុខការទូតសហភាពអឺរ៉ុប លោកស្រី Catherine Ashton វិញបានស្វាគមន៍យ៉ាងកក់ក្តៅចំពោះដំណឹងនេះ។ លោកស្រីក៏បានកោតសរសើរដល់អ៊ីស្រាអែល និងប៉ាឡេស្ទីន ព្រមទាំងកិច្ចខិតខំប្រឹងប្រែងរបស់លោក ចន ឃែរី ផងដែរ។
សូមបញ្ជាក់ថា នៅក្នុងផែនការសន្តិភាពរវាងអ៊ីស្រាអែល និងប៉ាឡេស្ទីន ប្រទេសអារ៉ាប់ទាំងអស់សន្យាថា នឹងទទួលស្គាល់រដ្ឋអ៊ីស្រាអែលយ៉ាងពេញលេញ តាមរយៈការចុះកិច្ចព្រមព្រៀងសន្តិភាពដើម្បីបញ្ចប់សង្រ្គាមជាស្ថាពរជាមួយអ៊ីស្រាអែល និងបង្កើតទំនាក់ទំនងការទូតជាធម្មតាជាមួយអ៊ីស្រាអែលឡើងវិញ។
ប៉ុន្តែ ពួកគេ ទាមទារឲ្យអ៊ីស្រាអែលត្រូវតែដកថយចេញពីដែនដីដែលខ្លួនបានដណ្តើមកាន់កាប់កាលពីឆ្នាំ១៩៦៧។ អ៊ីស្រាអែលត្រូវតែអនុញ្ញាតឲ្យជនជាតិប៉ាឡេស្ទីន ដែលភៀសខ្លួនដោយសារសង្រ្គាម អាចវិលត្រឡប់ទៅស្រុកកំណើតរបស់ខ្លួនវិញ និងត្រូវតែទទួលស្គាល់យ៉ាងពេញលេញនូវរដ្ឋប៉ាឡេស្ទីនឯករាជ្យមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ