រុស្ស៊ី សន្យាផ្តល់ជំនួយយោធាដល់អ៊ីរ៉ាក់ដើម្បីកម្ទេចក្រុមជីហាត
លោកប្រធានាធិបតីអ៊ីរ៉ាក់ ដែលកំពុងតែបំពេញទស្សនកិច្ច នៅទីក្រុងមូស្គូ រដ្ឋធានីប្រទេសរុស្ស៊ី ទើបបានទទួលដំណឹងល្អមួយ ដោយលោកពូទីន ប្រធានាធិបតីរុស្ស៊ី បានសន្យាថានឹងផ្តល់ជំនួយយោធាដល់អ៊ីរ៉ាក់ ក្នុងការបង្រ្កាបក្រុមជីហាតរដ្ឋអ៊ីស្លាម ដែលកំពុងតែវាយដណ្តើម ដែនដីមួយភាគធំ នៅអ៊ីរ៉ាក់ និងនៅស៊ីរី។ ជំនួយនេះ ប្រៀបបីដូចជាការចំអកមួយ ដែលរុស្ស៊ីធ្វើដាក់ អាមេរិក ព្រោះថា អាមេរិក ដែលដឹកនាំការវាយប្រហារ តាមផ្លូវអាកាស លើក្រុមជីហាត ហាក់កំពុងតែជួបបរាជ័យ។
ចុះផ្សាយនៅថ្ងៃ៖
ស្តាប់ - ០១:៤៤
ថ្លែងនៅចំពោះ មុខអ្នកកាសែត បន្ទាប់ពីបាន ទទួលជួបលោក ប្រធានាធិបតីអ៊ីរ៉ាក់ ហៃដា អាល់ អាបាឌី លោកពូទីន បានបញ្ជាក់ថា រុស្ស៊ី ទើបបានសន្យាថានឹងជួយអ៊ីរ៉ាក់ តាមផ្លូវយោធាដើម្បីកម្ទេចក្រុមជីហាតរដ្ឋអ៊ីស្លាម។ ដោយមិនបានបញ្ជាក់លំអិត ថាតើជំនួយនោះ នឹងធ្វើឡើងទៅតាមរបៀបណានោះ លោកប្រធានាធិបតីរុស្ស៊ី គ្រាន់តែបានប្រាប់ថា រុស្ស៊ីនឹងផ្តល់កិច្ចសហប្រតិបត្តិការ ក្នុងវិស័យបច្ចេកវិទ្យាយោធា។
គួរបញ្ជាក់ដែរ ថា ការសន្យាផ្តល់ជំនួយយោធាដល់អ៊ីរ៉ាក់ នាពេលនេះ គាប់ជួនក្នុងពេលដែលសម្ព័ន្ធមិត្តដែលដឹកនាំការវាយប្រហារតាមផ្លូវអាកាស ដោយសហរដ្ឋអាមេរិក កំពុងជួបបរាជ័យ ហើយមិនបានធ្វើឲ្យក្រុមជីហាត ថមថយនោះទេ។ ជាក់ស្តែង ក្រុមជីហាតទើបបានវាយប្រហារបន្ថែម នៅភាគខាងលិចអ៊ីរ៉ាក់ និងជាពិសេស ក្រុមនេះ ទើបបានវាយដណ្តើមបានក្រុងប៉ាល់មៀរ ដែលជាទីក្រុងបិតិកភណ្ឌពិភពលោក ស្ថិតក្នុងទឹកដីស៊ីរី ផងទៀត។ រុស្ស៊ីព្រមជួយអ៊ីរ៉ាក់នាពេលនេះ គឺប្រៀបដូចចំអកឲ្យអាមេរិក ដូច្នេះដែរ ថាធ្វើអន្តរាគមន៍តាមផ្លូវអាកាស មិនបានប្រសិទ្ធិភាព។
យ៉ាងណាមិញ ក្នុងបទសម្ភាសន៍ជាមួយអ្នកកាសែត លោកពូទីន បានទាំងលើកឡើង ពីទំនាក់ទំនងសេដ្ឋកិច្ច រវាងរុស្ស៊ី និងអ៊ីរ៉ាក់ ក្នុងវិស័យរ៉ែប្រេង និងឧស្ម័នធម្មជាតិ ដែលគិតជាទឹកប្រាក់ រាប់ពាន់លានដុល្លារ។ លោកពូទីន បានថែមទាំងទិទានដោយប្រយោល ទៅលើ អន្តរាគមន៍យោធារបស់អាមេរិក ក្នុងការទម្លាក់ប្រធានាធិតបីសាដាម ហ៊ូសេន កាលពីឆ្នាំ២០០៣។ លោកពូទីនថា ដោយសារតែបែបនេះហើយ ទើបអ៊ីរ៉ាក់ ធ្លាក់ក្នុងភាពវឹកវរ រហូតដល់សព្វថ្ងៃនេះ។
មួយវិញទៀត ការសន្យាធ្វើអន្តរាគមន៍របស់រុស្ស៊ី ក៏ធ្វើឡើងដោយសាររុស្ស៊ី ចង់យកមុខយកមាត់ជាមួយអ៊ីរ៉ង់ ដែលបច្ចុប្បន្ននេះ អ៊ីរ៉ង់មានទឹកមាត់ប្រៃ ជាមួយប្រធានាធិបតីអ៊ីរ៉ាក់ ដែលជាក្រុមអ៊ីស្លាម ឈីអ៊ីតដូចគ្នា។ ប្រធានាធិបតីពូទីន បានលើកឡើងផងដែរថា អ៊ីរ៉ង់ គឺជាដៃគូចំណាស់ ដែលមិនអាចបោះបង់បាន ក្នុងការថែររក្សាស្ថិរភាព នៅតំបន់ដើមបូព៌ាទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ