ទីក្រុងដាម៉ាសត្រូវទទួលរងគ្រោះដោយអំពើភេរវកម្មអត្តឃាតដ៏សែនសាហាវនៅថ្ងៃ១៥មីនា២០១៧
ប្រទេសស៊ីរី បានរងគ្រោះក្នុងសង្គ្រាមស៊ីវីលអស់រយៈពេល៦ឆ្នាំកន្លងមកហើយ។ សង្គ្រាមដែលបានបំផ្លិចបំផ្លាញប្រទេសនេះស៊ឹងតែទាំងស្រុងទៅហើយ។ នៅថ្ងៃពុធម្សិលមិញ ភេរវជនអត្តឃាតម្នាក់ បានធ្វើការវាយប្រហារដ៏សែនសាហាវប្រឆាំងទៅលើអគារតុលាកានៅក្នុងទីក្រុងDamas និងបានបណ្តាលឲ្យមនុស្សស្លាប់យ៉ាងតិច២៥នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
អំពើភេរវកម្មនៅថ្ងៃពុធម្សិលមិញដែលបង្កដោយភេរវជនអត្តឃាតម្នាក់ ប្រឆាំងទៅលើរដ្ឋធានីស៊ីរី។ គឺជាភេរវកម្មអត្តឃាតលើកទីពីរហើយក្នុងរយៈពេលតែ៥ថ្ងៃប៉ុណ្ណោះ បន្ទាប់ពីភេរវកម្មកាលពីថ្ងៃសៅរ៍មុនដែលបានសម្លាប់មនុស្សអស់៧៤នាក់។ ភេរវកម្មកាលពីថ្ងៃពុធម្សិលមិញ បានសម្លាប់មនុស្សយ៉ាងតិច ២៥នាក់និងបានបណ្តាលឲ្យមនុស្សរាប់សិបនាក់ត្រូវរងរបួសនៅកន្លែងអគារដែលមានតុលាការព្រហ្មទណ្ឌនិងតុលាការសាសនាទទួលបន្ទុកកិច្ចការអាពាហ៍ពិពាហ៍នៅក្នុងទីក្រុងដាម៉ាស។
ចំនួនមនុស្សស្លាប់នៅក្នុងអំពើភេរវកម្មនេះ បានបង្កើនតួលេខនៃជនរងគ្រោះកាន់តែច្រើនឡើងៗថែមទៀត។ នារយៈពេល ៦ឆ្នាំកន្លងផុតទៅ សង្គ្រាមនៅស៊ីរី បានសម្លាប់មនុស្សជាង៣២ម៉ឺននាក់ ជនភៀសខ្លួនជាង១១លាននាក់គឹស្មើនឹងចំនួនពាក់កណ្តាលនៃប្រជាជនស៊ីរីនៅមុនសង្គ្រាម។
ម្យ៉ាងទៀត ខួប៦ឆ្នាំនៃសង្គ្រាមដ៏សោកសៅនៅស៊ីរីនេះ បានប្រព្រឹត្តទៅនៅចំពេលដែលកិច្ចចរចាសន្តិភាពស្តីពីស៊ីរី នាជុំទី៣ ត្រូវធ្វើឡើងនៅក្នុងប្រទេស Kazakhstan។ កិច្ចចរចាសន្តិភាពដែលពុំមានពួកឧទ្ទាមស៊ីរីចូលរួមនោះ ក៏ប្រហែលជាពុំសូវមានការជឿនលឿនទៅមុខទេនៅក្នុងដំណោះស្រាយអធិករណ៍នេះ។
នៅក្នុងអធិករណ៍នេះ សហគមន៍អន្តរជាតិវិញ ក៏មានការបែងចែកគ្នាដែរក្នុងរយៈពេលប៉ុន្មានឆ្នាំកន្លងទៅនេះ រវាងប្លុកគាំទ្រខាងរបបស៊ីរីដឹកមុខដោយរុស្ស៊ីនិងអ៊ីរ៉ង់និងប្លុកទីពីរ គាំទ្រខាងចលនាឧទ្ទាមស៊ីរីដឹកមុខដោយអាមេរិកនិងក្រុមប្រទេសអ៊ឺរ៉ុបក៏ព្រមទាំងប្រទេសតួកគីនិងបណ្តាប្រទេសនៃតំបន់ឈូងសមុទ្រPerse។
ក៏ប៉ុន្តែចលនាឧទ្ទាមស៊ីរី មានការបែកបាក់ផ្ទៃក្នុងចុះទន់ខ្សោយ ដែលជម្រុញឲ្យពួកជីហាតនៃអង្គការរដ្ឋអ៊ីស្លាម កាន់តែឡើងចាងនៅក្នុងសង្គ្រាមនេះ។ សព្វថ្ងៃនេះ ចលនាឧទ្ទាមស៊ីរី កាន់តែធ្លាក់ចុះទន់ខ្សោយយ៉ាងខ្លាំង ជាអាទិ៍ បន្ទាប់ពី ពូកគេ បានបាត់បង់ទីក្រុងអាឡិបកាលពីខែធ្នូឆ្នាំមុន អាឡិបដែលជាដែនអំណាចត្រួតត្រាដោយក្រុមឧទ្ទាមស៊ីរី។
ទោះជាយ៉ាងណាក្តី នៅខណៈនេះ សហគមន៍អន្តរជាតិនៅតែមានឆន្ទះដ៏មុះមុតមួយក្នុងការបិទបញ្ចប់សង្គ្រាមនៅស៊ីរី ក៏ដូចជាឆន្ទះចង់បានរបស់ប្រជាជនស៊ីរីដែរ។
ទន្ទឹមនេះអង្គការការពារសិទ្ធមនុស្សអន្តរជាតិ Amnesty International បានតឿនរំលឹកជាថ្មីពីភាពចាំបាច់នៅក្នុងការកាត់ទោសពួកជនឧក្រឹដ្ឋដែលបង្កសកម្មភាពព្រៃផ្សៃនៅនៅក្នុងសង្គ្រាមនៅស៊ីរីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ