កងទ័ពអ៊ីរ៉ាក់៖ ពួកជីហាតអង្គការរដ្ឋអ៊ីស្លាមបំផ្ទុះបំផ្លាញវិហារអ៊ីស្លាមដ៏ចំណាស់នៅមូស៊ូល
វិហារអ៊ីស្លាមAl-Nouri នៅទីក្រុងមូស៊ូល បានរងការបំផ្លាញខ្ទេចខ្ទីរ នៅថ្ងៃពុធម្សិលមិញ។ ក្រុមជីហាតអង្គការរដ្ឋអ៊ីស្លាម ហើយនិងកងទ័ពអ៊ីរ៉ាក់ គាំទ្រដោយក្រុមសម្ព័ន្ធអន្តរជាតិ ដឹកនាំដោយអាមេរិក បានបន្ទោស ទម្លាក់កំហុសដាក់គ្នា ទៅវិញទៅមក។ កងទ័ពអ៊ីរ៉ាក់បានអះអាងថា ក្រុមជីហាត អង្គការរដ្ឋអ៊ីស្លាមបានដាក់គ្រាប់បែកបំផ្ទុះវិហារអ៊ីស្លាម Al-Nouri ចំណែកក្រុមជីហាតវិញ បានចោទថា អាមេរិកជាអ្នកទម្លាក់គ្រាប់បែកបំផ្លាញវិហារដែលមានអាយុ ជាង ៨០០ឆ្នាំមកហើយនេះ។
ចុះផ្សាយនៅថ្ងៃ៖
អាល់ នូរី Al-Nouri ជាវិហារអ៊ីស្លាមដ៏មានវ័យចំណាស់ និងល្បីល្បាញនៅទីក្រុងមូស៊ូល ក្នុងប្រទេសអ៊ីរ៉ាក់។ គឺ នៅក្នុងវិហារនេះហើយ ដែលមេដឹកនាំកំពូលរបស់ ពួកជីហាតរដ្ឋអ៊ីស្លាម អាប៊ូ បាក់ អាល់បាក់ដាឌី បានបង្ហាញមុខ ឲ្យគេឃើញ នៅឆ្នាំ ២០១៤ និងបានប្រកាសបង្កើតរដ្ឋអ៊ីស្លាម នៅលើទឹកដីដែលក្រុមនេះវាយបាន នៅក្នុងប្រទេសអ៊ីរ៉ាក់ និងស៊ីរី។
នៅថ្ងៃពុធ កងទ័ពអ៊ីរ៉ាក់បានប្រកាសថា ក្រុមជីហាត រដ្ឋអ៊ីស្លាម បានដាក់គ្រាប់បែកបំផ្ទុះបំផ្លាញវិហារអាល់នូរី ហើយនិងប៉មវិហារអ៊ីស្លាម ដែលស្ថិតនៅក្នុងក្រុងបុរាណ របស់ទីក្រុងមូស៊ូល។ ក្រុងចំណាស់ របស់មូស៊ូល ជាជំរក ទីតាំងចុងក្រោយរបស់ក្រុមជីហាតរដ្ឋអ៊ីស្លាម ដែលកំពុងឡោមព័ទ្ធ វាយសម្រុករបស់កងទ័ពអ៊ីរ៉ាក់ ក្រោមជំនួយទ័ពអាកាសរបស់អាមេរិក។
ពួកជីហាតរដ្ឋអ៊ីស្លាមវិញ តាមរយៈទីភ្នាក់ងារឃោសនារបស់ខ្លួន Amaqបានប្រតិកម្ម ចោទប្រកាន់យន្តហោះអាមេរិកថា ជាអ្នកទម្លាក់គ្រាប់បែកបំផ្លាញវិមានអ៊ីស្លាមទាំងពីរ។ នៅអ៊ីរ៉ាក់ អាមេរិកកំពុងដឹកនាំកងទ័ពសម្ព័ន្ធអន្តរជាតិ ដើម្បីប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម។ នៅក្នុងសេចក្តីថ្លែងការណ៍របស់ខ្លួន សម្ព័ន្ធអន្តរជាតិ បានលើកឡើងថា ក្រុមជីហាតរដ្ឋអ៊ីស្លាម បានបំផ្លាញ ទ្រព្យសម្បត្តិដ៏សំខាន់របស់មូស៊ូល នៅពេលឃើញ កងទ័ពអ៊ីរ៉ាក់ កាន់តែសម្រុកចូលកាន់តែក្បែរទីតាំងខ្លួន។ សម្ព័ន្ធអន្តរជាតិបានវាយតម្លៃសកម្មភាពរបស់ពួកជីហាតថា ជាឧក្រិដ្ឋកម្មប្រឆាំងប្រជាជននៅមូស៊ូល នៅអ៊ីរ៉ាក់។ នេះជាហេតុផលមួយដែលធ្វើឲ្យកងទ័ពសម្ព័ន្ធអន្តរជាតិត្រូវតែបំផ្លាញក្រុមនេះមិនឲ្យសល់។
សម្រាប់នាយករដ្ឋមន្រ្តីអ៊ីរ៉ាក់ ដោយបំផ្ទុះបំផ្លាញវិហារអ៊ីស្លាមអាល់នូរី ដែលមានវ័យចំណាស់ ហើយនិងជាកន្លែងធ្លាប់ប្រកាសចេញមុខរបស់មេដឹកនាំ របស់ខ្លួន ក្រុមជីហាត រដ្ឋអ៊ីស្លាមកំពុងទទួលស្គាល់ជាផ្លូវការបរាជ័យរបស់ខ្លួននៅក្នុងមូស៊ូល។ សូមបញ្ជាក់ថា ៤ថ្ងៃមកហើយ ដែលកងទ័ពអ៊ីរ៉ាក់ ក្រោមជំនួយផ្នែកអាកាសពីសម័្ពន្ធអន្តរជាតិដឹកនាំដោយអាមេរិក បានបើកប្រតិបត្តិការ វាយប្រហារឡោមព័ទ្ធក្រុងចំណាស់ នៅមូស៊ូល ដែលជាទីតាំងចុងក្រោយរបស់ក្រុមជីហាត រដ្ឋអ៊ីស្លាម។ ប្រតិបត្តិការវាយដណ្តើមយកទីក្រុងចាស់ ពីដៃពួកជីហាត រដ្ឋអ៊ីស្លាមបោះជំហានដោយយឺត ព្រោះថា ក្រុមជីហាតមានគ្នីគ្នាតែប៉ុន្មានរយនាក់ប៉ុណ្ណោះ ប៉ុន្តែ ក្រុមនេះ បានចាប់ប្រជាជនស៊ីវិលអ៊ីរ៉ាក់ ធ្វើជាខែលមនុស្ស ការពារពីការបាញ់ប្រហាររបស់កងទ័ពអ៊ីរ៉ាក់ និងយន្តហោះរបស់កងកម្លាំងសម្ព័ន្ធអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ