អារ៉ាប៊ីសាអ៊ូឌីតបដិសេធមិនបន្ថយចំនួនផលិតប្រេងឆៅជាដាច់ខាត
ស្របពេលដែល តម្លៃប្រេងឆៅបានបន្តធ្លាក់មកត្រឹមជាង៥០ដុល្លារ ក្នុងមួយធុងបារីល អារ៉ាប៊ីសាអ៊ូឌីត ដែលជាប្រទេសផលិតប្រេង នាំមុខគេបង្អស់ បានអះអាងជាថ្មីម្តងទៀតថា ខ្លួន ក៏ដូចជាសមាជិក របស់អង្គការប្រទេសអ្នកនាំប្រេងផ្សេងទៀតដែរ នឹងមិនបន្ថយការផលិតប្រេងឆៅ ឲ្យនៅក្រោម ៣០លានធុងបារីល ក្នុងមួយថ្ងៃឡើយ។ អារ៉ាប៊ីសាអ៊ូឌីត បន្តថា ប្រេងឆៅនឹងឡើងថ្លៃមកវិញ ក្នុងពេលខាងមុខ ជាមួយនឹងកំណើនសេដ្ឋកិច្ចពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោករដ្ឋមន្រ្តីក្រសួងប្រេងឥន្ទនៈរបស់អារ៉ាប៊ីសាអ៊ូឌីត បានផ្តល់បទសម្ភាសន៍មួយ ដោយបានអះអាងយ៉ាងច្បាស់ ជាថ្មីម្តងទៀតថា ប្រទេសអារ៉ាប៊ីសាអ៊ូឌីត នឹងមិនបន្ថយចំនួនផលិតប្រេងឆៅឡើយ។ នេះគឺជាគោលជំហរួម របស់ប្រទេសសមាជិកអង្គការប្រទេសអ្នកនាំប្រេងចេញទាំងអស់។ សូមបញ្ជាក់ថា បច្ចុប្បន្ននេះ អង្គការអូប៉ិប(OPEP) បានកំណត់ ឲ្យប្រទេសសមាជិកទាំងអស់ ផលិតប្រេងសរុបក្នុងចំនួន ៣០លានធុងបារីលក្នុងមួយថ្ងៃ។
លោករដ្ឋមន្រី្តប្រេងអារ៉ាប៊ីសាអ៊ូឌីត បានបន្ថែមថា វាជារឿងដែលមិនអាចធ្វើទៅបានទេ ដែលអារ៉ាប៊ីសាអ៊ូឌីត ក៏ដូចជាប្រទេសសមាជិកអង្គការអូប៉ិប (OPEP) ផ្សេងទៀត កាត់បន្ថយការផលិតប្រេងឆៅ ព្រោះថា ប្រទេសដ៏ទៃទៀត ដែលមិនមែនជាសមាជិក OPEP គេមិនកាត់បន្ថយផង គេមានតែបង្កើនការផលិតឲ្យបានច្រើន ដើម្បីវាយលុកយកទីផ្សារ។ លោកពន្យល់ថា ប្រេងកំពុងតែចុះថោកស្រាប់ទៅហើយ បើយើងកាត់បន្ថយការផលិតទៀតនោះ នាំឲ្យបាត់បង់ទីផ្សារ ហើយចំណូល នឹងរឹតតែបានតិចថែមទៀត។
រដ្ឋមន្រ្តីអារ៉ាប៊ីសាអ៊ូឌីតរូបនេះ បានបន្ថែមថា ប្រេងចុះថោក មិនមែន ដោយសារតែការផលិតមានច្រើនហួសហេតុនោះទេ។ មូលហេតុចំបង គឺដោយសារកំណើនសេដ្ឋកិច្ចពិភពលោក មានការជាប់គាំង ទើបធ្វើឲ្យតម្រូវការប្រេង មានការថយចុះ។ មួយវិញទៀត មានប្រេងឥន្ទនៈច្រើនប្រភេទ ដែលចរាចរនៅលើទីផ្សារ មកពីប្រទេសដ៏ទៃផ្សេងទៀត ក្រៅពីប្រទេសសមាជិក របស់អង្គការអូប៉ិប(OPEP)។ លោកបានឆ្លៀតរិះគន់ ដល់ក្រុមអ្នកជំនាញ ទិញលក់ភាគហ៊ុននៅលើទីផ្សារអន្តរជាតិ ថាជាអ្នកចូលរួមចំណែក ធ្វើឲ្យប្រេងចុះថោក ព្រោះពួកនេះ បានបំប៉ោងតួលេខ ដោយបានឆ្លៀតឱកាសនេះ ទិញស្តុកទុកភាគហ៊ុនប្រេង មួយភាគធំ ក្នុងតម្លៃថោក ហើយរងចាំលក់ទៅវិញ នៅពេលណាដែលប្រេងឡើងថ្លៃ។
តែទោះជាយ៉ាងណា លោកសង្ឃឹមយ៉ាងមុតមាំថា ក្នុងពេលអនាគតដ៏ខ្លី ប្រេងឆៅនឹងឡើងថ្លៃមកវិញ ស្របពេលដែលកំណើនសេដ្ឋកិច្ចពិភពលោកមានភាពល្អប្រសើរ ដែលធ្វើឲ្យតម្រូវការប្រេងឥន្ទនៈមានសន្ទុះឡើងវិញដែរ។ រុស្ស៊ី និងអាមេរិក កំពុងភ័យខ្លួនព្រោះថា ចំណូលពីការនាំចេញប្រេង ថយចុះកាន់តែខ្លាំង ហើយដោយសារតែតម្លែផលិតមានកម្រិតខ្ពស់ ក្រុមហ៊ុនខ្លះ លក់ទាំងខាតក៏មានដែរ។
យ៉ាងណាមិញ រតនាគារកណ្តាលរបស់អាមេរិក ទើបបានសម្រេចនូវគោលនយោបាយហិរញ្ញវត្ថុថ្មីមួយ ដោយយល់យោគទៅដល់ការវិនិយោគ ក្នុងវិស័យប្រេង និងថាមពល។ ដំណឹងនេះ បានធ្វើឲ្យ ប្រេងឆៅបានកើនតម្លៃបន្តិចឡើងវិញ នៅទីផ្សារប្រេងក្រុងញូយ៉ក កាលពីល្ងាចថ្ងៃព្រហស្បតិ៍ ពោលគឺ ប្រេងឆៅមួយធុងបារីល បានកើនតម្លៃ មកដល់ ៥៧ដុល្លារ ៦៧សេន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ