អ៊ីស្រាអែលតាមសម្លាប់សកម្មជនលីបង់និយមអេបូឡាក្នុងទឹកដីស៊ីរី
នៅថ្ងៃអាទិត្យ ទី២០ ធ្នូនេះ អង្គការលីបង់និកាយឈីអ៊ីតទើបបានបញ្ជាក់ជាផ្លូវការថា សកម្មជនជនជាតិលីបង់ឈ្មោះសាមៀរ គុនតារបានបាត់បង់ជីវិតនៅក្រោយការវាយប្រហារផ្លូវអាកាសពីកម្លាំងទ័ពអ៊ីស្រាអែលនៅក្នុងតំបន់ក្បែរទីក្រុងដាម៉ាស់ទឹកដីស៊ីរី។ រដ្ឋាភិបាលអ៊ីស្រាអែលបានសាទរចំពោះមរណៈភាពរបស់សាមៀរ គុនតារ តែមិនបានបញ្ជាក់ថាខ្លួនជាអ្នកសម្លាប់ទេ។ គួរជម្រាបជូនថា សកម្មជនសាមៀរ គុនតាត្រូវបានអ៊ីស្រាអែលចាត់ទុកជាអ្នកទទួលខុសត្រូវនៃការវាយប្រហារប្រដាប់អាវុធយ៉ាងបង្ហូរឈាមក្នុងទឹកដីអ៊ីស្រាអែលកាលពីឆ្នាំ ១៩៧៩។
ចុះផ្សាយនៅថ្ងៃ៖
ស្តាប់ - ០២:០១
មានការលើកឡើងខុសៗគ្នាទាក់ទងនឹងការស្លាប់សកម្មជនសាមៀរ គុនតារក្នុងទឹកដីស៊ីរី។ សារព័ត៌មានផ្លូវការនៃរបបស៊ីរីខ្លះបានយល់ឃើញថា សាមៀរ គុនតារបានស្លាប់ក្រោមកណ្តាប់ដៃរបស់ពួកភេរវជន តែសារព័ត៌មានផ្លូវការនៃរបបស៊ីរីផ្សេងទៀតបានទម្លាក់កំហុសលើកម្លាំងទ័ពអាកាសអ៊ីស្រាអែលដែលមានចេតនាតាមសម្លាប់សកម្មជនសាមៀរ គុនតារដល់ទឹកដីស៊ីរីតែម្តង។
ប្រតិកម្មពីប្រទេសអ៊ីស្រាអែល លោករដ្ឋមន្រ្តីសំណង់ និងលំនៅដ្ឋាន Gallant បានសាទរចំពោះមរណៈភាពសាមៀរ គុនតារ តែមិនបានបញ្ជាក់ពីការទទួលខុសត្រូវរបស់អ៊ីស្រាអែលទេ។ ថ្លែងតាមវិទ្យុក្នុងស្រុកមួយនៅអ៊ីស្រាអែល លោក Gallant បានអះអាងយ៉ាងដូច្នេះថា វាជាដំណឹងដ៏ល្អមួយដែលមនុស្សដូចសាមៀរ គុនតារលែងមានវត្តមាននៅលើផែនដីទៀតឡើយ តែឆ្លើយនឹងសំណួរដែលថា តើអ៊ីស្រាអែលជាអ្នកបាញ់សម្លាប់ជនសាមៀរ គុនតារមែន ឬ? លោក Gallant បានអល់អែកដោយបញ្ជាក់ថា ខ្ញុំមិនបញ្ជាក់ ហើយក៏មិនបដិសេធចំពោះរឿងនេះទេ។
គួរបញ្ជាក់ថាជាផ្លូវការ អ៊ីស្រាអែលបានបដិសេធមិនលូកដៃចូលទៅក្នុងវិបត្តិស៊ីរីទេ តែក្រៅផ្លូវការ កងទ័ពអ៊ីស្រាអែលតែងតែទម្លាក់គ្រាប់បែកលើស៊ីរីដើម្បីរារាំងពួកអេបូឡាដែលកំពុងជួយវាយប្រហារនៅខាងទ័ពរដ្ឋាភិបាលស៊ីរីប្រឆាំងនឹងពួកបះបោរ។ អ្វីដែលអ៊ីស្រាអែលបារម្ភ គឺក្លាយពួកអេបូឡាលីបង់ប្រើប្រាស់ទឹកដីស៊ីរីដើម្បីវាយប្រហារលើខ្លួន។
គួរជម្រាបជូនថា មានកំណើតក្នុងឆ្នាំ ១៩៦២ ជនសាមៀរ គុនតារធ្លាប់បានអ៊ីស្រាអែលចាប់ដាក់គុកពីបទបានចូលរួមនៅក្នុងការវាយប្រហារផ្លូវអាវុធក្នុងទឹកដីអ៊ីស្រាអែលកាលពីខែមេសា ឆ្នាំ ១៩៧៩ ដោយបានផ្តាច់ជីវិតជនជាតិអ៊ីស្រាអែល ៤នាក់។ តែនៅក្នុងក្របខ័ណ្ឌនៃការដោះដូរអ្នកទោសជាមួយចលនាឈីអ៊ីតលីបង់អេបូឡា ជនសាមៀរ គុនតារត្រូវបានអ៊ីស្រាអែលដោះលែងក្នុងឆ្នាំ ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ