អ្នកអង្កេតការណ៍អង្គការសហប្រជាជាតិត្រៀមបញ្ចេញតារាងឈ្មោះឧក្រិដ្ឋជនសង្គ្រាមនៅស៊ីរី
អ្នកអង្កេតការណ៍របស់អង្គការសហប្រជាតិ លើឧក្រិដ្ឋកម្មសង្រ្គាមនៅស៊ីរី បានប្រាប់ឲ្យដឹងថា គេនឹងចេញផ្សាយ តារាងឈ្មោះឧក្រិដ្ឋជនសង្គ្រាមនៅស៊ីរី នៅដើមខែ មិនាខាងមុខ មុននឹងមានកិច្ចប្រជុំនៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ ក្រុមប្រឹក្សានេះ មានឆន្ទៈនាំយក ឧក្រិដ្ឋជនសង្គ្រាមទាំងនោះ ទៅកាត់ទោស នៅតុលាការអន្តរជាតិ។ ប៉ុន្តែទោះជាយ៉ាងណាក៏ដោយ ក្តីសង្ឃឹមមានតិចតួច ដោយសារក្រុមប្រឹក្សាសន្តិសុខរបស់ អង្គការសហប្រជាជាតិ ដូចជាមិនសូវអើពើរទាល់តែសោះ។
ចុះផ្សាយនៅថ្ងៃ៖
ស្តាប់ - ០២:៤៩
អស់រយៈពេលជិត៤ឆ្នាំហើយ ដែលសង្គ្រាមស៊ីវីល បានហែកហួរ ប្រទេសស៊ីរី ឲ្យធ្លាក់ក្នុងរណ្តៅ មរណៈ យ៉ាងខ្លោចផ្សារ សម្រាប់ប្រជាពលរដ្ឋស្លូតត្រង់។ សង្គ្រាមដែលប្រឈមមុខគ្នារវាង កងទ័ពរដ្ឋាភិបាលផ្តាច់ការ របស់ លោក បាឆា អាល់អាសាដ និងក្រុមប្រឆាំង បានសម្លាប់ ប្រជាជនជាង ២សែននាក់ និងជាច្រើនលាននាក់ទៀតត្រូវបង្ខំចិត្ត រត់ចោលផ្ទះសម្បែង និរទេសខ្លួន គ្មានគោលដៅពិតប្រាកដ។ ដូចរួចពីក្រពើ មកជួបខ្លា សង្រ្គាមស៊ីវិលមិនទាន់ទាំងចប់ផង ពេលនេះ ដែនដីមួយភាគធំ ត្រូវធ្លាក់ទៅក្នុងការកាន់កាប់ របស់ពួកឧទ្ទាមរដ្ឋអ៊ីស្លាម ទៀត។ ពួកនេះ បានប្រើប្រាស់ ច្បាប់សាសនាអ៊ីស្លាមជ្រុលនិយម បំបិតសិទ្ធិសេរីភាពមនុស្ស និងធ្វើការសម្លាប់អ្នកណា ដែលហ៊ានប្រឆាំងពួកវា យ៉ាងសាហាវព្រៃផ្សៃ គ្មានខ្លាចញញើតនរណាទាំងអស់។
ចាប់តាំងពីមានការកាប់សម្លាប់នៅស៊ីរី អង្គការសហប្រជាជាតិ បានចាត់តាំងក្រុមស៊ើបអង្កេតពិសេសមួយ ដើម្បីវែករកមុខ ឧក្រិដ្ឋជនសង្គ្រាម ដែលជាអ្នកបញ្ជាឲ្យមានការកាប់សម្លាប់ប្រជាជន។ ទោះបីជាក្រុមអ្នកអង្កេតការណ៍ មិនត្រូវបានគេអនុញ្ញាត ឲ្យចូលទៅស៊ើបការណ៍នៅក្នុងប្រទេសស៊ីរី ផ្ទាល់ក៏ដោយ ក៏ប៉ុន្តែ ក្រុមការងារនេះ មានភស្តុតាង ព្រមទាំងការផ្តល់ជាសាក្ខីកម្ម ពីសំណាក់សាក្សី ជាច្រើន។
លោក Paulo Pinheiro ប្រធានគណកម្មការអង្កេតការណ៍ លើសំណុំរឿងនេះ បានមានប្រសាសន៍ថា មានឧក្រិដ្ឋជនសង្គ្រាមជាងដប់នាក់ ដែលជាប់នៅក្នុងបញ្ជីរ ហើយបញ្ជីរនោះ ត្រូវគេរក្សាទុក យ៉ាងសម្ងាត់បំផុត រហូតទាល់តែ ដល់ថ្ងៃបើកកិច្ចប្រជុំ របស់ក្រុមប្រឹក្សាសិទ្ធិមនុស្ស របស់អង្គការសហប្រជាជាតិ នៅទីក្រុងហ្សឺណែវ នៅថ្ងៃទី ១៧ មិនា ទើបបញ្ជីរនេះ ត្រូវបានប្រកាសផ្សាយថា មានឈ្មោះនរណាខ្លះ។ ទោះបីជាយ៉ាងណា លោកបានបដិសេធ មិនឆ្លើយថា មានឈ្មោះ លោក បាឆា អាល់អាសាដ នៅក្នុងបញ្ជីរនោះ រឺអត់ទេ។ យ៉ាងណាមិញ លោកបានបន្ថែមថា គោលដៅ របស់ក្រុមការងារលោក មិនមែនត្រឹមតែបញ្ឈប់ឲ្យបាន នូវការកាប់សម្លាប់ប្រជាជន ស្លូតត្រង់ប៉ុណ្ណោះទេ តែក្រុមការងារលោក នឹងនាំយកឧក្រិដ្ឋជនទាំងនោះ ទៅកាត់ទោសឲ្យបាន ដើម្បីរកយុត្តិធម៌ជូន ក្រុមគ្រួសារជនរងគ្រោះ រាប់សែននាក់។
ទោះបីជាយ៉ាងណាក៏ដោយ លោកស្រី Carla Del Ponte ដែលជាសមាជិកគណកម្មការអង្កេតការណ៍នេះ ដែរ បានសម្តែងការខកចិត្តជាខ្លាំង ចំពោះភាពសោះអង្គើយ របស់ក្រុមប្រឹក្សាសន្តិសុខអង្គការសហប្រជាជាតិ ចំពោះសំណុំរឿងនេះ។ លោកស្រី ធ្លាប់ធ្វើជារដ្ឋអាជ្ញា នៅតុលាការព្រហ្មទណ្ឌអន្តរជាតិ ក្នុងសំណុំរឿងប្រល័យពូជសាសន៍ នៅរ៉ូវ៉ាន់ដា និងនៅអតីតយូហ្គោស្លាវី។ លោកស្រី បានបន្តថា វាដល់ពេលហើយ ដែលក្រុមប្រឹក្សាសន្តិសុខត្រូវសម្រេចចិត្ត ឲ្យបានច្បាស់ ក្នុងការនាំជនទាំងនោះ ទៅផ្តន្ទាទោស មិនត្រូវអូសបន្លាយ ទុកឲ្យពួកនោះ បន្តការកាប់សម្លាប់នៅស៊ីរី តទៅទៀតទេ។
ក្រុមការងារនេះ បានស្នើរសុំទៅក្រុមប្រឹក្សា សន្តិសុខ ឲ្យនាំឧក្រិដ្ឋជនទៅកាត់ទោស នៅតុលាការព្រហ្មទណ្ឌអន្តរជាតិ រឺក៏បង្កើតតុលាការពិសេសមួយ ក្នុងប្រទេសឯករាជ្យណាមួយ នៅក្បែរប្រទេសស៊ីរី។ លោកអគ្គរាជទូតចក្រភពអង់គ្លេស ប្រចាំអង្គការសហប្រជាជាតិ បាននិយាយថា វាមានសង្ឃឹមតិចណាស់។ ចំណែក អ្នកតំណាងឲ្យរដ្ឋាភិបាល លោក បាឆា អាល់អាសាដ វិញ បាននិយាយថា វាគ្រាន់តែ ជាការឃោសនា ដោយគ្មានមូលដ្ឋានត្រឹមត្រូវ ដោយសំដៅគ្រាន់តែ ចង់បង្ខូចកេរ្តិ៍ឈ្មោះ របស់រដ្ឋាភិបាល ស៊ីរីតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ