UNESCO៖ដាក់កំហិតអ៊ីស្រាអែល ឲ្យគោរពសម្បត្តិបិតិកភណ្ឌអ៊ីស្លាមនៅហ្សេរូសាឡឹមខាងកើត
ជាថ្មីម្តងទៀតអង្គការយូណេស្កូ បានធ្វើឲ្យរដ្ឋាភិបាលអ៊ីស្រាអែល ក្តៅស្លឹកត្រចៀកឆេះដុំ ដោយសារអង្គការនេះ បានធ្វើសេចក្តីសម្រេចចិត្តមួយ នៅថ្ងៃអង្គារទី១៨តុលាម្សិលមិញ ដោយបានសម្រេចដាក់កំហិតអ៊ីស្រាអែល ឲ្យគោរពសម្បត្តិបិតិកភណ្ឌអ៊ីស្លាម នៅតំបន់ហ្សេរូសាឡឹមខាងកើត ដែលខ្លួនកំពុងកាន់កាប់ និងបានបង្កការលំបាកគ្រប់យ៉ាង ដល់ប្រជាជនប៉ាឡេស្ទីន។ ដូចការស្មានទុក អ៊ីស្រាអែល បានច្រានចោលសេចក្តីសម្រេចចិត្តនេះ ហើយប្រកាសផ្អាកសហប្រតិបត្តិការជាមួយអង្គការUnesco។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ប្រទេសអារ៉ាប់ចំនួន៧ ដូចជាអាល់ហ្សេរី អេហ្ស៊ីប លីបង់ ម៉ារ៉ុក អូម៉ង់ កាតា និងស៊ូដង់ បានដាក់ស្នើសេចក្តីសម្រេចចិត្តមួយ ទៅកាន់អង្គការយូណេស្កូ។ កាលពីថ្ងៃព្រហស្បតិ៍សប្តាហ៍មុន គណកម្មការបានធ្វើការបោះឆ្នោតអនុម័តសេចក្តីសម្រេចចិត្តនេះរួចទៅហើយ ដោយបានសម្លេង២៤ម្លេងយល់ព្រម ៦មិនយល់ព្រម និង២៨ដោយអនុបវាទ មុននឹងដាក់ជូនទៅមហាសន្និបាទពេញអង្គ នៃក្រុមប្រឹក្សាប្រតិបត្តិ ដែលមានប្រទេសទាំងអស់៥៨ ឲ្យទទួលយកកាលពី។
ថ្ងៃទី១៨តុលា មហាសន្និបាទពេញអង្គរបស់យូណេស្កូ មិនបានបដិសេធសូមឲ្យរុះរើខ្លឹមសារអត្ថបទ រឺមួយក៏បោះឆ្នោតឡើងវិញទេ។ ការណ៍នេះ បានញ៉ាំងឲ្យអត្ថបទនៃសេចក្តីសម្រេចចិត្តនេះ ត្រូវបានអនុម័តជាស្ថាពរដោយអង្គការយូណេស្កូ។
យោងតាមប្រសាសន៍លោកប្រមុខការទូតស្តីទីរបស់ប៉ាឡេស្ទីន ប្រចាំនៅអង្គការយូណេស្កូ បានបញ្ជាក់ថា សេចក្តីសម្រេចចិត្តនេះ មានខ្លឹមសារសង្កត់ធ្ងន់ឲ្យអ៊ីស្រាអ៊ែល ដែលជាអ្នកមកដាក់អាណានិគមលើតំបន់ហ្សេរូសាឡឹមខាងកើត ឲ្យគោរពសិទ្ធិប្រជាជនប៉ាឡេស្ទីន ហើយអ៊ីស្រាអែលត្រូវបញ្ឈប់រាល់ការធ្វើទុក្ខបុកម្នេញទាំងឡាយណា ដែលប៉ះពាល់ដល់ការធ្វើបូជនីយកិច្ចសាសនាអ៊ីស្លាម នៅទីសក្ការៈវិហារមូស្កេបុរាណ នៅហ្សេរូសាឡឹមខាងកើត។
សូមរំលឹកថា តំបន់ហេ្សរូសាឡឹមខាងកើត ត្រូវបានចាត់ទុកជាសម្បត្តិបិតិកភណ្ឌមនុស្សជាតិរបស់យូណេស្កូ ព្រោះទីនោះ ជាទីសក្ការៈរួមគ្នា នៃសាសនាអ៊ីស្លាមផង សាសនាគ្រឹស្តផង និងសាសនាជ្វីហ្វផង។ ទីក្រុងបុរាណចំណាស់រាប់សតវត្សនេះ គឺជាទីតាំងនៃវិហារម៉ូស្កេបូរាណ ដែលជាទីសក្ការៈធំបំផុតនៃសាសនាអ៊ីស្លាម ហើយក៏មានជញ្ជាំងបុរាណសក្ការៈរបស់សាសនាជ្វីហ្វ ដែលនៅក្បែរនោះផងដែរ។ អ៊ីស្រាអែល បានចូលទៅកាន់កាប់តំបន់ហ្សេរូសាឡឹមភាគខាងកើត នៅឆ្នាំ១៩៦៧។ បើទោះបីជាប្រទេសហ្សកដានី ជាអ្នកមានទួនាទីគ្រប់គ្រងទីលានវិហារម៉ូស្កេបុរាណក៏ដោយ ក៏ប៉ុន្តែច្រកចេញចូលឡើងទៅទីក្រុងបុរាណនេះ គឺអ៊ីស្រាអ៊ែល ជាអ្នកគ្រប់គ្រងត្រួតពិនិត្យទាំងស្រុង។
តាមប្រភពមួយទៀត បានបញ្ជាក់ថា គឺខ្លឹមសារនិងពាក្យពេចន៍ ដែលប្រើប្រាស់ក្នុងសេចក្តីសម្រេចចិត្តនេះ ដែលធ្វើឲ្យភាគីអ៊ីស្រាអែល មិនអាចទទួលយកបាន។ ភាគីអ៊ីស្រាអែល បានចោទអង្គការយូណេស្កូ ថាបានធ្វើរឿងដែលមិនគួរធ្វើ បញ្ឆេះកំហឹងនិងជម្លោះឲ្យកាន់តែធំ ជាជាងការកសាងស្ពានសន្តិភាព។ ក្នុងអត្ថបទសេចក្តីសម្រេចចិត្តនេះ អង្គការយូណេស្កូ បានជ្រើសប្រើពាក្យជាភាសាអារ៉ាប់ថា al-Buraq ដើម្បីសំគាល់តំបន់ទីលានវិហារម៉ូស្កេ ហើយបានបំភ្លេចចោលឈ្មោះជាភាសាអេប្រឺ របស់ជនជាតិជ្វីហ្វ ដែលប្រែថាទួលវិហារ និងជញ្ជាំងបុរាណឈ្មោះKotel។ អ៊ីស្រាអែលចោទថា យូណេស្កូនិងប្រទេសអារ៉ាប់ មានបំណងលប់ដានប្រវត្តិសាស្ត្រ នៃសាសនានិងជនជាតិជ្វីហ្វពីហ្សេរូសាឡឹម។ យ៉ាងណាមិញ បារាំងបានបោះឆ្នោតអនុបវាទ ក៏ដោយសារតែមិនពេញចិត្តនិងការប្រើពាក្យពេចន៍ ដែលមានលក្ខណៈលំអៀង មិនយុត្តិធម៌នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ