កងកម្លាំងរដ្ឋាភិបាលស៊ីរីវាយលុកចូលដល់មូលដ្ឋានធំរបស់ក្រុមជីហាតរដ្ឋអ៊ីស្លាម
នៅក្នុងប្រទេសស៊ីរី ទាហានរដ្ឋាភិបាលរបស់លោកបាស្ហា អាល់អាសាដ បានវាយលុកចូលទៅដល់ទីក្រុងរ៉ាខា ដែលជាមូលដ្ឋានធំបំផុតរបស់ក្រុមជីហាតរដ្ឋអ៊ីស្លាម។ ការវាយលុកទៅលើទីក្រុងរ៉ាខានេះ ធ្វើឡើង ដោយមានជំនួយពីកងទ័ពអាកាសរបស់រុស្ស៊ី ហើយកើតឡើងព្រមគ្នានឹងប្រតិបត្តិការវាយលុករបស់កងកម្លាំងដែលជាសម្ព័ន្ធមិត្តរបស់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ក្រុមជីហាតដែលបង្កឲ្យគេខ្លាចរអានៅទូទាំងពិភពលោក នៅក្នុងរយៈពេលប៉ុន្មានឆ្នាំមកនេះ កំពុងតែប្រឈមមុខនឹងការវាយលុកពីគ្រប់ទិសទី ទាំងនៅក្នុងប្រទេសស៊ីរី និងនៅក្នុងប្រទេសអ៊ីរ៉ាក់។
នៅក្នុងប្រទេសស៊ីរី ក្រុមជីហាតត្រូវប្រឈមមុខនឹងការវាយលុកពី៣មុខព្រួញផ្សេងគ្នា គឺកងកម្លាំងគួឌីស្ថានវាយលុកលើក្រុងអាឡេប កងកម្លាំងឧទ្ទាមស៊ីរីគាំទ្រដោយលោកខាងលិច វាយលុកលើទីក្រុងរ៉ាខាពីជ្រុងម្ខាង ហើយពីជ្រុងម្ខាងទៀត គឺការវាយលុកដោយកងកម្លាំងរបស់លោកបាស្ហា អាល់អាសាដ។
បើយោងតាមអង្គការឃ្លាំមើលសិទ្ធិមនុស្សនៅស៊ីរី (Observatoire syrien des droits de l’Homme) កងកម្លាំងរដ្ឋាភិបាលស៊ីរីបានវាយលុកចូលទៅដល់ទីក្រុងរ៉ាខា នៅព្រឹកថ្ងៃសៅរ៍ ដោយមានយន្តហោះចម្បាំងរបស់រុស្ស៊ីជាជំនួយ។ នេះគឺជាលើកដំបូងបង្អស់ ដែលកងកម្លាំងរដ្ឋាភិបាលស៊ីរី អាចវាយលុកចូលទៅដល់ទីក្រុងរ៉ាខា ចាប់តាំងពីទីក្រុងនេះត្រូវបានក្រុមជីហាតរដ្ឋអ៊ីស្លាមវាយដណ្តើមកាន់កាប់ កាលពីឆ្នាំ២០១៤ ហើយបានប្រកាសយកធ្វើជារដ្ឋធានី នៃរដ្ឋអ៊ីស្លាម ដែលពួកគេបង្កើតឡើង ដោយកាត់យកទឹកដីមួយផ្នែកពីស៊ីរី និងមួយផ្នែកទៀតពីអ៊ីរ៉ាក់។
នៅអ៊ីរ៉ាក់ ប្រតិបត្តិការវាយលុកទៅលើមូលដ្ឋានសំខាន់ៗរបស់ក្រុមជីហាតរដ្ឋអ៊ីស្លាមក៏កំពុងតែកើតមានដែរ គឺការវាយលុកទៅលើទីក្រុងហ្វាលូចាដោយកងកម្លាំងរដ្ឋាភិបាលអ៊ីរ៉ាក់ និងកងកម្លាំងស្ហ៊ីអ៊ីត និងការវាយលុកទៅលើទីក្រុងមូស៊ុល ដោយកម្លាំងគួឌីស្ថាន ដោយមានជំនួយពីទាហានជំនាញការអាមេរិក។
នាយកអង្គការសិទ្ធិមនុស្សស៊ីរីបានប្រាប់ទីភ្នាក់ងារព័ត៌មានអាអែហ្វប៉េ កាលពីថ្ងៃសៅរ៍ថា ប្រតិបត្តិការវាយលុកទៅលើក្រុមជីហាតរដ្ឋអ៊ីស្លាមនៅស៊ីរី និងអ៊ីរ៉ាក់ នៅក្នុងពេលបច្ចុប្បន្ននេះ ទំនងជាធ្វើឡើង ដោយមានការសម្របសម្រួលគ្នា រវាងអាមេរិក និងរុស្ស៊ី ថ្វីដ្បិតតែប្រទេសទាំងពីរមិនសហការគ្នាជាចំហក៏ដោយ។
នៅក្នុងវិបត្តិស៊ីរី អាមេរិក និងរុស្ស៊ី ប្រកាន់ជំហរផ្ទុយគ្នាស្រឡះ ជាពិសេស ទាក់ទងនឹងជោគវាសនារបស់លោកបាស្ហា អាល់អាសាដ ក៏ប៉ុន្តែ ប្រទេសទាំងពីរហាក់ដូចជាឯកភាពនឹងចំណុចមួយ គឺការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ