កងទ័ពស៊ីរីកំទេចយន្តហោះអ៊ីស្រាអែល អាមេរិកបដិសេធមិនបានវាយប្រហារវិហារអ៊ីស្លាមនៅស៊ីរី
នៅស៊ីរី ថ្ងៃសុក្រនេះ កងទ័ពស៊ីរីបានប្រកាសថា បាញ់កំទេចយន្តហោះអ៊ីស្រាអែលមួយគ្រឿង។ ជាការសងសឹកទៅនឺងអ៊ីស្រាអែលដែលបានប្រើយន្តហោះវាយប្រហារច្រើនកន្លែងនៅស៊ីរី។ ម្សិលមិញដែរ កងទ័ពអាមេរិកទទួលស្គាល់ថា បានវាយប្រហារក្រុមអាល់កៃដា នៅភាគខាងជើងស៊ីរី តែប្រាប់ថា មិនបានបាញ់វិហារអ៊ីស្លាមដែលធ្វើអោយមនុស្សស្លាប់៤២នាក់ នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
យោងតាមការប្រកាសរបស់កងទ័ពស៊ីរី នៅថ្ងៃសុក្រនេះ កងទ័ពស៊ីរីបានបាញ់កំទេចយន្តហោះអ៊ីស្រាអែលមួយគ្រឿង ហើយយន្តហោះអ៊ីស្រាអែលមួយគ្រឿងទៀតក៏រងគ្រាប់របស់ស៊ីរីដែរ ធ្វើអោយយន្តហោះច្រើនគ្រឿងផ្សេងទៀតហោះគេចទៅបាត់។ ជាការសងសឹកទៅអ៊ីស្រាអែលដែលបានវាយប្រហារស៊ីរី។ អ៊ីស្រាអែលប្រាប់ថា យប់ថ្ងៃព្រហស្បតិ៍ម្សិលមិញ កងទ័ពអាកាសរបស់ខ្លួនបានវាយប្រហារចំស៊ីបច្រើនកន្លែង ក្នុងទឺកដីស៊ីរី។
កន្លងមក អ៊ីស្រាអែលមិនដែលប្រកាសទទួលខុសត្រូវការវាយប្រហារនៅស៊ីរី ច្បាស់លាស់យ៉ាងដូច្នេះទេ។ កងទ័ពស៊ីរីប្រាប់ថា អ៊ីស្រាអែលបានបាញ់សំដៅទៅកន្លែងយោធាមួយ នៅជិតក្រុងបុរាណប៉ាល់មៀ ភាគកណ្តាលប្រទេស។ គួរបញ្ជាក់ថា អ៊ីស្រាអែលនិងស៊ីរី ស្ថិតក្នុងស្ថានភាពសង្គ្រាមជាមួយគ្នា ជាង១០ឆ្នាំ មកហើយ។ ទំនាក់ទំនងអ៊ីស្រាអែល ស៊ីរី មានភាពតានតឺងនឹងគ្នាដោយសារតែស៊ីរីទទួលបានការជួយជ្រោមជ្រែងពីក្រុមនិកាយស្ហ៊ីអ៊ីតអេស្បូឡាលីបង់ ក្នុងការប្រឈមតទល់ទៅនឺងក្រុមឧទ្ទាម។ ក្រុមអេស្បូឡានេះជាសត្រូវធំរបស់អ៊ីស្រាអែល។
នៅស៊ីរី ការវាយប្រហារនៅតែបន្ត ដោយមិនបានខ្វល់ពីបទឈប់បាញ់ផ្តួចផ្តើមដោយរុស្ស៊ី និងតួកគី ដែលបានចូលធរមានតាំងពីខែធ្នូទេ។ ម្សិលមិញនេះ អាមេរិកបានបដិសេធថា មិនបានវាយប្រហារវិហារនៅភាគខាងជើងស៊ីរីទេ។ យោងតាមអង្គការសិទ្ធិមនុស្សស៊ីរី មានយន្តហោះមិនស្គាល់អត្តសញ្ញាណច្រើនគ្រឿង បានបើកការវាយប្រហារលើវិហារមួយកន្លែង នៅភាគខាងលិចខែត្រអាឡិប ក្នុងពេលមនុស្សកំពុងនាំគ្នាសូត្រធម៌។ ការវាយប្រហារបានសម្លាប់មនុស្សយ៉ាងហោច៤២នាក់ និងបង្ករបួសជាងមួយរយនាក់។
មិនដឺងថា តើយន្តហោះអាមេរិកបាញ់ច្រលំផ្ទាំងស៊ីប រឺយ៉ាងណា ព្រោះមេបញ្ជាការយោធាអាមេរិកពន្យល់ថា បានបើកការវាយប្រហារទៅលើក្រុមភេរវជនអាល់កៃដា ដែលត្រូវជួបជុំគ្នា នៅអគារមួយកន្លែង ចំងាយប្រមាណ១៥ម៉ែត្រពីវិហារដែលរងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ