ម៉ូស្គូប្រតិកម្មរស់រវើក ចំពោះឃាតកម្ម ឯកអគ្គរដ្ឋទូតរុស្ស៊ី នៅតួកគី
បន្ទាប់ពីឃាតកម្មនោះឯង លោកប្រធានាធិបតីរុស្ស៊ី វ៉្លាឌីមៀរ ពូទីន ទាំងយប់តែម្តង បានរួមប្រជុំនៅវិមានក្រេមឡាំង រដ្ឋមន្ត្រីក្រសួងការបរទេស នាយកចារកិច្ចក្រៅប្រទេស និង នាយកស្ថាប័នសន្តិសុខជាតិរុស្ស៊ី ដោយជាបឋម គាត់សំដែងការរួមមរណទុក្ខយ៉ាងជ្រាលជ្រៅ ទៅកាន់គ្រួសារលោកទូតនោះ ដែលគាត់ចាត់ទុកជាអ្នកការទូតដ៏ត្រចះត្រចង់ ហើយហៅ ឃាតកម្មនោះ ថាជាទង្វើ “គម្រក់” និងជាអំពើបង្កហេតុ ដែលចម្លើយអាចមានតែមួយគត់ គឺ ត្រូវបង្កើនកាន់តែខ្លាំងក្លា ការប្រយុទ្ធទល់នឹងភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ថ្លែងក្នងកិច្ចប្រជុំនោះ លោកប្រមុខរដ្ឋរុស្ស៊ី ពូទីន លើកឡើងជាអាទិ៍៖ -“ខ្ញុំសូមក្រសួងការបរទេស រៀបចំនីតិវិធីសម្រាប់បំពាក់ជូនលោកអគ្គរដ្ឋទូតរុស្ស៊ី Andrei Karlov នៅតួកគី ដែលត្រូវបានភេរវជនបាញ់សម្លាប់នៅក្រុងអង់ការ៉ា គឺគ្រឿងឥស្សរិយយស បច្ឆា មរណៈ និង សកម្មភាពដើម្បីរំលឹកដល់វិញ្ញាណក្ខន្ធគាត់ជាចីរកាលតែម្តង”។ លោក Karlov ជាអ្នកការទូតដ៏ត្រចះត្រចង់ មានឈ្មោះល្បីក្នុងប្រទេស ដែលគាត់បានប្រចាំការបំពេញបេសកកម្មការទូត។ គាត់ជាបញ្ញាវន្តកម្រិតខ្ពស់ មានចរិតទន់ភ្លន់ និងស្លូតបូត។
ឃាតកម្មដែលប្រព្រឹត្តនោះ គឺជាអំពើបង្កហេតុឥតប្រកែកបាន សំដៅបង្ខូចធម្មនិយាមកម្ម ទំនាក់ទំនងរុស្ស៊ី-តួកគី ផ្តាច់កុំឲ្យកើតមានទៅរួច អភិក្រមសន្តិភាពនៅស៊ីរីដែលកំពុងទទួលការជួយជ្រោមជ្រែងយ៉ាងសកម្មពីសំណាក់ រុស្ស៊ី តួកគី អ៊ីរ៉ង់ និងប្រទេសឯទៀត ដែលនាំគ្នា យកចិត្តទុកដាក់ ដោះស្រាយជម្លោះនៅស៊ីរី។ ចម្លើយតែមួយគត់ដែលអាចមាន តបនឹងអំពើ បង្កហេតុនេះ គឺ បង្កើនការប្រយុទ្ធទល់នឹងភេរវកម្ម ហើយពួកចោរព្រៃវានឹងស្គាល់ក្លិនចម្លើយនេះឯង។
មេដឹកនាំកំពូលរុស្ស៊ី បានផ្ទុកផ្តាក់ គណៈកម្មាធិការរដ្ឋរុស្ស៊ីខាងស៊ើបអង្កេត ដែលបានចងក្រង ទៅហើយ សំណុំរឿងព្រហ្មទណ្ឌ ពាក់ព័ន្ធនឹងឃាតកម្មនេះ ឲ្យបង្កើតជា ក្រុមការងារអន្តរក្រសួង ផ្សំឡើងពីអ្នកអង្កេត និងអ្នកការទូតចំនួន១៨នាក់ ដែលថ្ងៃអង្គារនេះបានហោះចេញ ទៅកាន់ ក្រុង អង់ការ៉ា ទៅហើយ ដើម្បីរួមជាមួយដៃគូតួកគី ធ្វើអង្កេត អំពី ឧក្រិដ្ឋកម្មនេះ ដោយគាត់ទើប បានព្រមព្រៀងតាមទូរសព្ទ ជាមួយលោកប្រធានាធិបតីតួកគី អ៊ែរដូហ្កាន់។ លោកពូទីន សង្កត់ធ្ងន់ថា យើងត្រូវតែដឹង តើនរណា ជាអ្នកបញ្ជាដៃឃាតករ។
លោកប្រមុខរដ្ឋរុស្ស៊ី ក៏ថ្លែងថា ចាំបាច់ត្រូវតែបង្កើន របបការពារស្ថានតំណាងនានារបស់រុស្ស៊ី នៅតួកគី ហើយទទួលនូវការធានារ៉ាប់រង ពីខាងភាគីតួកគី ខាងធានាសុវត្ថិភាព ស្ថានតំណាង ទាំងនោះ ឲ្យបានស្របនឹងអនុសញ្ញាក្រុង Vienne ស្តីអំពីទំនាក់ទំនងការទូត។
លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ ពីចំណែកគាត់ បានហៅឃាតកម្មអ្នកការទូត រុស្ស៊ីនោះ ថាជា “អំពើព្រៃផ្សៃ” តម្រង់បំផ្លាញ កុំឲ្យទំនាក់ទំនងរុស្ស៊ី-តួកគី មានប្រក្រតីភាព ទៅកើត។
សារពត័មានរុស្ស៊ី លេខថ្ងៃនេះ សរសេរថា ឃាតកម្មអ្នកការទូតរុស្ស៊ីនោះ នឺងពុំនាំឲ្យ ល្អក់កករ ឡើយដល់ ទំនាក់ទំនងរុស្ស៊ី-តួកគី កាលដែលប្រទេសទាំងពីរ បានខិតចូលជិតគ្នាយ៉ាងខ្លាំង ក្រោយពីវិបត្តិការទូតអស់សឹង១ឆ្នាំបណ្តាលមកពី វិបត្តិការទូត ក្នុងផ្ទៃនៃសង្គ្រាមនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ