ធនាគារពិភពលោកសន្យាផ្តល់ថវិកា៣៧លានដុល្លារដើម្បីជួយគ្រូបង្រៀនលីបង់
ធនាគារពិភពលោកបានឯកភាពគ្នាជាមួយដៃគូផ្សេងទៀតដើម្បីយកថវិកាចំនួន ៣៧ លានដុល្លារ ទៅជួយដល់ក្រុមគ្រូបង្រៀនសាលារដ្ឋរបស់លីបង់។ ចំណាត់ការនេះ ធ្វើឡើងដើម្បីជួយគ្រូបង្រៀនទាំងនោះឲ្យអាចរួចផុតពីវិបត្តិសេដ្ឋកិច្ចដ៏ធ្ងន់ធ្ងរដែលកំពុងញាំញីជីវភាពប្រចាំថ្ងៃរបស់ពួកគេ។ នេះបើតាមការឲ្យដឹងពីធនាគារពិភពលោកនៅថ្ងៃព្រហស្បតិ៍ ទី២៣ ធ្នូ ឆ្នាំ២០២១។
ចុះផ្សាយនៅថ្ងៃ៖
ស្តាប់ - ០២:០៨
ធនាគារពិភពលោកនិងដៃគូសហការ (The UK Foreign) នឹងបង្វែរប្រាក់ពីមូលនិធិគាំទ្រសហគមន៍លីបង់សម្រាប់ទទួលជនភៀសខ្លួនស៊ីរី ដើម្បីយកទៅផ្តល់ជូនក្រុមគ្រូបង្រៀននៅក្នុងប្រទេសលីបង់វិញ។
តាមរយៈសេចក្តីថ្លែងការណ៍មួយ ធនាគារពិភពលោកនិយាយថវិកាពីមូលនិធិខាងលើនឹងប្រើដើម្បីលើកទឹកចិត្តផ្នែកហិរញ្ញវត្ថុដល់ក្រុមគ្រូបង្រៀនដែលកំពុងបន្តរងគ្រោះពីវិបត្តិសេដ្ឋកិច្ច និងហិរញ្ញវត្ថុធ្ងន់ធ្ងរនៅលីបង់។
ជំនួយថវិកាខាងលើ គឺជាការរួមចំណែកធានាថាគ្រូបង្រៀនតាមសាលារដ្ឋលីបង់ អាចមានលទ្ធភាពទិញប្រេងឥន្ធនៈដើម្បីធ្វើដំណើរទៅកន្លែងធ្វើការ។ ហិរញ្ញប្បទានក្នុងករណីពិសេសនេះមានសុពលភាពសម្រាប់ឆ្នាំសិក្សា ២០២១-២០២២ និងធ្វើឡើងតបទៅតាមសំណើសុំរបស់រដ្ឋាភិបាលនៃប្រទេសលីបង់។ នេះបើតាមធនាគារពិភពលោក។
គួររំឭកថាប្រទេសលីបង់ដែលជាជម្រករបស់ជនភៀសខ្លួនស៊ីរីជាងមួយលាននាក់ បច្ចុប្បន្ននេះកំពុងប្រឈមមុខយ៉ាងខ្លាំងទៅនឹងវិបត្តិសេដ្ឋកិច្ចដែលធនាគារពិភពលោកចាត់ទុកជាវិបត្តិធ្ងន់ធ្ងរខ្លាំងជាងគេបំផុតមួយ ក្នុងពិភពលោកនៃសម័យទំនើបនេះ។
ជាង ៨០% នៃប្រជាជនលីបង់កំពុងរស់នៅក្នុងភាពក្រីក្រ ហើយប្រាក់លីវដែលជារូបិយប័ណ្ណរបស់លីបង់វិញបានបាត់បង់តម្លៃរហូតដល់ទៅប្រមាណ ៩០% នៃតម្លៃរបស់វាធៀបនឹងប្រាក់ដុល្លារ។
គ្រូបង្រៀននៅតាមសាលារដ្ឋដែលបានទទួលប្រាក់កម្រៃតិចស្រាប់ តាំងពីមុនពេលចាប់ផ្តើមនៃវិបត្តិសេដ្ឋកិច្ច កាន់តែរស់នៅក្រោមខ្សែបន្ទាត់នៃភាពក្រីក្រ។ គ្រូបង្រៀនលីបង់ជាច្រើនគ្មានលទ្ធភាពសូម្បីទិញប្រេងឥន្ធនៈដើម្បីជិះទៅធ្វើការបន្ទាប់ពីតម្លៃថាមពលកើនឡើងខ្លាំងនារយៈពេលចុងក្រោយនេះ។ សព្វថ្ងៃដើម្បីចាក់សាំងរថយន្តខ្នាតមធ្យម អ្នកបើកបរលីបង់ត្រូវចំណាយលុយច្រើនជាងប្រាក់ឈ្នួលអប្បបរមាប្រចាំខែដែលមានចំនួន៦៧ ៥០០០លីវ ឬ ស្មើនឹងប្រមាណ ២៥ ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ