អ៊ីស្រាអែល៖ប្រឈមនឹងចលនាបាតុកម្មមហាជន និងគំនាបក្រុមប្រឆាំង នាយករដ្ឋមន្រ្តីព្យួរកំណែទម្រង់តុលាការ
នៅក្នុងប្រទេសអ៊ីស្រាអែល នាយករដ្ឋមន្រ្តីលោកនេតាន់យ៉ាហ៊ូបានសម្រេចព្យួរនីតិវិធីក្នុងការអនុម័តលើគម្រោងកំណែទម្រង់តុលាការដ៏ចម្រូងចម្រាសដែលកំពុងជជែក ពិភាក្សានៅក្នុងសភា។ ការសម្រេចដូចនេះត្រូវបានលោកនេតាន់យ៉ាហ៊ូថ្លែងទៅកាន់ប្រជាជាតិក្រោយពីបានពិគ្រោះយោបល់ជាមួយក្រុមអ្នកតំណាងរាស្រ្តក្នុងរដ្ឋាភិបាលចម្រុះ។ លោកនេតាន់យ៉ាហ៊ូបានលើកហេតុផលទៅពន្យល់ថា ការសម្រេចព្យួរគម្រោងកំណែទម្រង់តុលាការនេះគឺដើម្បីបញ្ជៀសភាពប្រេះឆាប្រទេសជាតិ និងទុកពេលដើម្បីស្វែងរកកុងសង់ស៊ុសឲ្យបានច្រើនជាងនេះ។ តាមលោកនេតាន់យ៉ាហ៊ូ ការអនុម័តលើគម្រោងកំណែទម្រង់ផ្សេងៗ រួមទាំងតុលាការផងនឹងត្រូវធ្វើឡើងនៅក្រោយបុណ្យសាសនាជ្វីហ្វពីថ្ងៃទី៥ ដល់ថ្ងៃទី១៣ មេសាខាងមុខ។ លោកអេម៉ានុយអែល ណាវន សាស្រ្តាចារ្យនៅសាកលវិទ្យាល័យក្រុងតេឡាវី ប្រទេសអ៊ីស្រាអែលបានមើលឃើញថា លោកនេតាន់យ៉ាហ៊ូកំពុងប្រឈមនឹងការប្រឆាំងពីផ្ទៃក្នុងគណបក្សលីគូដរបស់លោកថែមទៀត ពោលមិនមែនមានត្រឹមពីមហាជន និងពីក្រុមគណបក្សប្រឆាំងប៉ុណ្ណោះទេ។
ចុះផ្សាយនៅថ្ងៃ៖
ស្តាប់ - ០១:៤៥
« មានការរិះគន់ ទិតៀនកាន់តែច្រើនឡើងៗពីផ្ទៃក្នុងគណបក្សលីគូដ។ តែសំណួរដែលចោទឡើងនៅត្រង់ថា តើមានឥស្សរជនណាដែលអាចចេញមុខឈរឈ្មោះប្រកួតប្រជែង ត ទល់នឹងលោកនេតាន់យ៉ាហ៊ូ និងដឹកនាំចលនាប្រឆាំងនឹងគាត់។ នេះហើយជាសំណួរពិតប្រាកដ ព្រោះចូរកុំភ្លេចថា សមាជិកគ្រប់រូបនៅក្នុងគណបក្សលីគូដដែលធ្លាប់បានសាកល្បងកម្លាំងទល់នឹងលោកនេតាន់យ៉ាហ៊ូ និងបានឈរឈ្មោះប្រកួតប្រជែងជាមួយគាត់នាពេលកន្លងមក គឺបានទទួលបរាជ័យទាំងអស់ និងបានបង់ថ្លៃនយោបាយថ្លៃខ្លាំងណាស់។
ដូច្នេះថ្ងៃនេះ ដើម្បីអាចមានអ្នកថ្មីណាម្នាក់ ឬមួយក៏សមាជិកគណបក្សលីគូដណាម្នាក់ចង់សាកល្បងចូលរួមប្រកួតប្រជែងដណ្តើមកន្លែងលោកនេតាន់យ៉ាហ៊ូ អ្នកថ្មីនោះ ឬសមាជិកគណបក្សលីគូដនោះត្រូវឲ្យមានជំនឿជឿជាក់ក្នុងចិត្តថា លោកនេតាន់យ៉ាហ៊ូពិតជាបានចុះខ្សោយខាងនយោបាយប្រាកដមែន។ តែបើតាមមើលទៅ គាត់នៅមិនទាន់ចុះខ្សោយមែនទែនទេ។ ច្បាស់ហើយ លោកនេតាន់យ៉ាហ៊ូបានចុះខ្សោយ តែមិនដល់ថ្នាក់ទទួលការគំរាមកំហែងនៅផ្ទៃក្នុងគណបក្សរបស់លោកទេ។
យ៉ាងណាក៏ដោយ វាដូចជារហ័សពេកដែលគេហ៊ាននិយាយយ៉ាងម៉េចនោះ ព្រោះខណៈនេះ លោកនេតាន់យ៉ាហ៊ូនៅអាចគ្រប់គ្រងស្ថានការណ៍បាន ទោះបីប្រទេសកំពុងពុះកញ្ជ្រោលដោយបាតុកម្មក្តី។ នៅក្រោយបុណ្យជ្វីហ្វនានិទាឃរដូវ គេនឹងមើលទៀតថាតើអ្វីទៅជាលទ្ធផលដែលនឹងទទួលបានពីការចរចាជាមួយក្រុមប្រឆាំង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ