៣សប្តាហ៍មុនបោះឆ្នោត តួកគី ចាប់ឃុំខ្លួនសមាជិកបក្សប្រឆាំងនិងសង្គមស៊ីវិល ជាង១០០នាក់
នៅតួកគី ពេលដែលការបោះឆ្នោតជាតិកាន់តែខិតជិតចូលមកដល់ រដ្ឋអំណាចតួកគី បានចាប់ខ្លួនសមាជិកបក្សប្រឆាំង យ៉ាងហោច ជាង១១០នាក់ ដោយចោទប្រកាន់ពីបទ«ប្រព្រឹត្តអំពើភេរវកម្ម»។ ក្រុមសង្គមស៊ីវិល បានរិះគន់រដ្ឋាភិបាលតួកគី ថា កំពុងតែបង្កការ«គំរាមកំហែង»នៅមុនពេលបោះឆ្នោត។
ចុះផ្សាយនៅថ្ងៃ៖
បណ្តាជនដែលត្រូវប៉ូលិសចាប់ឃាត់ខ្លួន ជាប់សង្ស័យថា ជ្រើសសមាជិកប្រព្រឹត្តអំពើភេរវកម្ម និងផ្តល់លុយទៅឲ្យ គណបក្សនយោបាយ PKK ជាបក្សពលករគួដ ដែលត្រូវរដ្ឋអំណាចតួកគីនិងសម័្ពន្ធមិត្ត ចាត់ទុកថាជា អង្គការភេវរនិយម ត្រូវហាមឃាត់។ នេះបើតាមប្រភពពីទូរទស្សន៍ជាតិ តួកគី TRT។
ប្រតិបត្តិការរបស់នគរបាលតួកគី ធ្វើឡើងនៅបណ្តាខេត្ត ជាង ២០។ គ្រាន់តែនៅខេត្ត Diyarbakir តែ១ខេត្ត ដីកាកោះហៅនិងឃាត់ខ្លួន ឡើងរហូតដល់ចំនួនប្រមាណ១៥០។ ខេត្តនេះសម្បូរជនជាតិគួដ ឋិតប៉ែកអគ្នេយ៍នៃផ្ទៃប្រទេស។ នេះបើតាមសមាគមមេធាវី នៅ Diyarbakir ដែលប្រាប់ទីភ្នាក់ងារព័ត៌មានបារាំង AFP។
ចំណោមមនុស្សត្រូវប៉ូលិសចាប់ឃាត់ខ្លួន និងដែល សមាគមមេធាវីនៅខេត្ត Diyarbakir បានដឹងច្បាស់ គឺមាន មេធាវី ជាង ២០នាក់ អ្នកកាសែត ៥នាក់ អ្នកសម្តែងល្ខោន ៣ នាក់ ព្រមទាំង អ្នកនយោបាយ ១ម្នាក់ ផង។ ប្រធានសមាគមមេធាវី គូសបង្ហាញថា ការចាប់ខ្លួនមនុស្សពីសំណាក់នគរបាលតួកគី គឺមិនអាចចាត់ទុកថាជាប្រតិបត្តិឯករាជ្យដាច់ចេញពីបន្ទាត់នយោបាយរបស់រដ្ឋាភិបាលឡើយ ហើយនេះទំនងជាការគំរាមកំហែងដល់អ្នកបោះឆ្នោត។
ការបោះឆ្នោតប្រធានាធិបតីនិងបោះឆ្នោតសភាតួកគី នឹងត្រូវប្រព្រឹត្តធ្វើឡើងនៅខែឧសភាខាងមុខនេះ។ ពលរដ្ឋម្ចាស់ឆ្នោតត្រូវសម្រេចបន្ត ឬមិនបន្តអាណត្តិឲ្យប្រធានាធិបតី រេសេប តាយីប អ៊ែរដូហ្កាន និងបក្សកាន់អំណាចរបស់លោក។ លោក អ៊ែរដូហ្កាន កាន់អំណាចនៅតួកគី ប្រមាណជាជិត ២០ឆ្នាំហើយ។
ការបោះឆ្នោតលើកនេះ គណបក្សប្រឆាំងនៅតួកគី បានរួបរួមគ្នា ជារណសិរ្ស ចំនួន ៦ បក្ស និងគាំទ្របេក្ខជនតែម្នាក់ គឺលោក Kemal Kiliçdaroglu។ ក្នុងចំណោមសម្ព័ន្ធរួបរួមបក្សទាំង៦នេះ គណបក្ស HDP ជាកម្លាំងធំទី៣នៅក្នុងប្រទេស និងជាបក្សប្រឆាំងលេខ២ក្នុងសភាតួកគី។ ប៉ុន្តែ ប្រធានម្នាក់នៃសហស្ថាបនិករបស់បក្សនេះ ត្រូវជាប់ឃុំខ្លួនក្នុងពន្ធនាគារ តាំងតែពីឆ្នាំ២០១៦មកម្ល៉េះ ពីព្រោះត្រូវ រដ្ឋាភិបាល ចោទប្រកាន់ថា«ចូលរួមឃោសនាភេវរកម្ម»។ ក្នុងខែមករាកន្លងទៅ គណបក្ស HDP ក៏ត្រូវ តុលាការធម្មនុញ្ញ គំរាមរំលាយចោលថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ