សម្ព័ន្ធអារ៉ាប់បានបញ្ចូលស៊ីរីឲ្យរួមរស់ជាមួយគ្រួសារអារ៉ាប់ជាថ្មី បន្ទាប់ពីបានដាក់ឲ្យឯកោជាង ១១ឆ្នាំ
សម្ព័ន្ធអារ៉ាប់បានបើកកិច្ចប្រជុំវិសាមញ្ញថ្នាក់រដ្ឋមន្រ្តីការបរទេសនៅក្នុងទីក្រុងគែរ ប្រទេសអេហ្ស៊ីប។ កិច្ចប្រជុំវិសាមញ្ញបានផ្តោតសំខាន់លើប្រធានរឿងចំនួនពីរ គឺសង្រ្គាមនៅស៊ូដង់ និងបញ្ហាប្រទេសស៊ីរី។ នៅទីបំផុត សម្ព័ន្ធអារ៉ាប់បានអនុញ្ញាតឲ្យស៊ីរីត្រឡប់ទៅរួមរស់ជាមួយគ្រួសារអារ៉ាប់ជាថ្មី បន្ទាប់ពីបានព្យួរសមាជិកភាព និងទុកឲ្យប្រទេសមួយនេះនៅឯកោផ្លូវទូតអស់រយៈពេលជាង ១១ឆ្នាំ។
ចុះផ្សាយនៅថ្ងៃ៖
ស្តាប់ - ០២:២៦
ការសម្រេចបញ្ចូលស៊ីរីទៅក្នុងសម្ព័ន្ធអារ៉ាប់ជាថ្មីបានធ្វើឡើងនៅក្នុងកិច្ចប្រជុំវិសាមញ្ញបិទទ្វារថ្នាក់ប្រមុខការទូតនៃក្រុមប្រទេសអារ៉ាប់នៅទីស្នាក់ការកណ្តាលរបស់សម្ព័ន្ធអារ៉ាប់ក្នុងទីក្រុងគែរ ប្រទេសអេហ្ស៊ីប។ សេចក្តីសម្រេចដែលបានបោះឆ្នោតគាំទ្រដោយប្រមុខការទូតនៃក្រុមប្រទេសអារ៉ាប់ទាំងអស់បានបញ្ជាក់ថា គណៈប្រតិភូនៃរដ្ឋាភិបាលស៊ីរីនឹងទទួលបានឡើងវិញនូវកៅអីរបស់ខ្លួននៅក្នុងសម្ព័ន្ធអារ៉ាប់។ តាមសេចក្តីសម្រេចដដែល ស៊ីរីអាចផ្តើមចូលរួមភ្លាមៗនៅក្នុងកិច្ចប្រជុំរបស់សម្ព័ន្ធអារ៉ាប់។ តែក៏មិនភ្លេចអំពាវនាវឱ្យរដ្ឋាភិបាលស៊ីរីបន្តស្វែងរកដំណោះស្រាយនយោបាយដើម្បីឈានទៅបិទបញ្ចប់សង្គ្រាមស៊ីវិលដែលកំពុងអូសបន្លាយជាង ១១ឆ្នាំកន្លងទៅ។
គួររម្លឹកថាកាលពីជាង ១១ឆ្នាំមុន ពោលនៅពេលដែលស៊ីរីបានធ្លាក់ក្នុងសង្រ្គាមហែកហួរផ្ទៃក្នុង សម្ព័ន្ធអារ៉ាប់បានសម្រេចព្យួរសមាជិកភាព និងដាក់រដ្ឋាភិបាលស៊ីរីឲ្យនៅឯកោផ្លូវទូតក្រោមហេតុផលថា រដ្ឋាភិបាលស៊ីរីរបស់លោកប្រធានាធិបតីអាសាដបានប្រើកម្លាំងវាយបង្រ្កាបក្រុមប្រឆាំងយ៉ាងហិង្សា។ កាលណោះ ក្រុមប្រទេសអារ៉ាប់ធំ តូចបានបែរខ្នងដាក់លោកអាសាដ និងងាកទៅគាំទ្រក្រុមប្រឆាំង រួមទាំងបានផ្តល់អសនៈស៊ីរីនៅសម្ព័ន្ធអារ៉ាប់ទៅឲ្យក្រុមប្រឆាំងទៀតផង។ កំណត់សម្គាល់មួយទៀតនារយៈពេលជាង ១១ឆ្នាំ ស៊ីរីបានក្លាយជាសរភូមិនៃការប្រជែងកម្លាំងរវាងកម្លាំងបរទេស ពិសេសរវាងក្រុមអ្នកគាំទ្ររដ្ឋាភិបាលស៊ីរី និងក្រុមអ្នកគាំទ្រពួកប្រឆាំងរដ្ឋាភិបាលស៊ីរី។
ជាង ១១ឆ្នាំក្រោយមក និងក្នុងពេលដែលស៊ីរីកំពុងបន្តអូសជើងនៅក្នុងសង្រ្គាមស៊ីវិល មានប្រទេសអារ៉ាប់ម្តងមួយៗបានផ្តើមបែររករដ្ឋាភិបាលស៊ីរីរបស់លោកអាសាដជាថ្មីនារយៈពេលចុងក្រោយនេះ។ តែមានព្រឹត្តិការណ៍ចំនួនពីរដែលបានលេចធ្លោខ្លាំង និងបានរុញក្រុមប្រទេសអារ៉ាប់ឲ្យខិតចូលលោកអាសាដកាន់តែលឿន ទី១ គ្រោះរញ្ជួយដីនៅស៊ីរី និងតួកគីក្នុងថ្ងៃទី៦ កុម្ភៈដែលលោកអាសាដបានទទួលសន្ទុះសាមគ្គីភាពធំធេងពីក្រុមប្រទេសអារ៉ាប់ និងទី២ បរិបទតំបន់មានការផ្លាស់ប្តូរតាមរយៈការត្រូវរ៉ូវគ្នាឡើងវិញរវាងអារ៉ាប៊ីសាអូឌីត និងអ៊ីរ៉ង់ដែលជាមហាអំណាចពីរនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ