អ៊ីរ៉ាក់បង្ហាញគម្រោង “ផ្លូវអភិវឌ្ឍន៍” ភ្ជាប់ពីឈូងសមុទ្ទពែក្សទៅតួកគី
អ៊ីរ៉ាក់ដែលលង់ក្នុងសង្គ្រាមរ៉ាំរ៉ៃរាប់ទសវត្សរ៍ កំពុងស្រមៃក្លាយជាស្ពានចម្លងវិស័យដឹកជញ្ជូនពិភពលោក។ នៅថ្ងៃសៅរ៍ទី ២៧ឧសភានេះ រដ្ឋាភិបាលក្រុងបាកដាដបានបង្ហើបបង្ហាញគម្រោងអភិវឌ្ឍផ្លូវថ្នល់និងផ្លូវដែក ប្រកបដោយមហិច្ឆតា តម្លៃ១៧ពាន់លានដុល្លារ តភ្ជាប់ឈូងសមុទ្ទពែក្យ ទៅតួកគី ដោយឆ្លងកាត់ប្រទេសអ៊ីរ៉ង់ទាំងមូល។
ចុះផ្សាយនៅថ្ងៃ៖
ស្តាប់ - ០២:០៧
ពុំទាន់មានកាលបរិច្ឆេទចាប់ផ្តើមសាងសង់ទេ ប៉ុន្តែគម្រោងអភិវឌ្ឍន៍ផ្លូវថ្នល់និងផ្លូវដែក ប្រវែង១២០០គីឡូម៉ែត្រ នឹងមានកិច្ចសហប្រតិបត្តិការជាមួយប្រទេសក្នុងតំបន់ ដូចជា កាតា អេមីរ៉ាត់អារ៉ាប់រួម កូវ៉ែត ស៊ីរី អូម៉ង់ ហ្សកដានី តួកគី អ៊ីរ៉ង់ និងអារ៉ាប៊ីសាអូឌីត។
ត្រូវបញ្ចប់នៅរវាងបីទៅ៥ឆ្នាំខាងមុខ “ផ្លូវអភិវឌ្ឍន៍” ដែលតភ្ជាប់ឈូងសមុទ្ទពែក្យទៅតួកគី និងទៅដល់អឺរ៉ុប ជាគម្រោងទ្រទ្រង់សេដ្ឋកិច្ចដែលមិនរំពឹងតែលើប្រេងកាត និង ដែលផ្តល់ប្រយោជន៍ដល់ប្រទេសជិតខាងអ៊ីរ៉ាក់ផងនិង តំបន់ផង ព្រោះឈូងសមុទ្ទពែក្សដើរតួនាទីសំខាន់ណាស់ក្នុងវិស័យដឹកជញ្ជូនតាមផ្លូវទឹកនៅលើពិភពលោក។ នេះជាប្រសាសន៍របស់លោកនាយករដ្ឋមន្ត្រីអ៊ីរ៉ាក់ នាឱកាសបង្ហើបបង្ហាញគម្រោងដែលមានអញ្ជើញតំណាងប្រទេសពាក់ព័ន្ធមកចូលរួមផង។
ឯកអគ្គរដ្ឋទូតតួកគីប្រចាំក្រុងបាកដាដ បានអះអាងថា គម្រោងផ្លូវអភិវឌ្ឍន៍ នឹងជំរុញឱ្យមានភាពរំពឹងគ្នាទៅវិញទៅក្នុងតំបន់ ប៉ុន្តែមន្ត្រីរូបនេះមិនបានលម្អិតទេថាតើតួកគីគ្រោងចូលរួមក្នុងកំរិតណា។
សម្បូរធនធានប្រេងក្រោមដី តែលង់ក្នុងសង្គ្រាមរ៉ាំរ៉ៃនិងអំពើពុករលួយស៊ីរូងផ្ទៃក្នុងអស់ជាច្រើនទសវត្សរ៍ អ៊ីរ៉ាក់មានទីតាំងភូមិសាស្ត្រល្អ នៅចំផ្លូវត្រង់ភ្ជាប់ឈូងសមុទ្ទពែក្សទៅតួកគី និងហួសទៅដល់អឺរ៉ុបបាន ប៉ុន្តែអ៊ីរ៉ាក់មានរចនាសម្ព័ន្ធផ្លូវថ្នល់យ៉ាប់យឺនខ្លាំងណាស់ ជាពិសេសកំណាត់ផ្លូវតភ្ជាប់ពីរដ្ឋធានីបាកដាដទៅភាគខាងជើងនៃប្រទេស ដែលតំបន់ខ្លះមានពួកអង្គការរដ្ឋអ៊ីស្លាមកំពុងសកម្មខ្លាំង។
គម្រោងអភិវឌ្ឍន៍ផ្លូវថ្នល់និងផ្លូវដែក ចេញពីក្រុងកំពង់ផែពាណិជ្ជកម្មនិងឧស្សាហកម្មFao នៅឈូងសមុទ្ទពែក្ស រហូតដល់ព្រំប្រទល់តួកគី ដោយមានស្ថានីយ៍បណ្តាក់គ្នាចំនួន១៥ នឹងស្តារតួនាទីអ៊ីរ៉ាក់ឡើងវិញ។ ប៉ុន្តែសម្រាប់អ្នកវិភាគវិស័យដឹកជញ្ជូនអន្តរជាតិ គម្រោងអ៊ីរ៉ាក់នេះហាក់ដូចជាខ្វះភាពរលូន ព្រោះអតិថិជនច្បាស់ជាដឹកជញ្ជូនទំនិញពីអាស៊ីទៅអឺរ៉ុបដោយផ្ទាល់ ដោយមិនជញ្ជូនចុះពីកប៉ាល់រួចជញ្ជូនឡើងឡានឬឡើងរថភ្លើងទេតពីរបីដំណាក់ឡើយ។
ការដឹកជញ្ជូនជាវិស័យគន្លឹះនៃសេដ្ឋកិច្ចពិភពលោក។ គម្រោងដ៏មហាសាលនិងប្រកបដោយមហិច្ឆតាបំផុត គឺគម្រោងផ្លូវសូត្រថ្មីរបស់ចិន ឬហៅថា គម្រោងផ្លូវមួយខ្សែក្រវ៉ាត់មួយ អភិវឌ្ឍហេដ្ឋារចនាសម្ព័ន្ធផ្លូវថ្នល់និងផ្លូវទឹក ជាមួយ ១៣០ប្រទេស ដើម្បីភ្ជាប់ការដឹកជញ្ជូនពីចិនទៅអាស៊ី ទៅអឺរ៉ុប និងទៅអាហ្វ្រិកឱ្យកាន់ងាយស្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ