ហ្កាហ្សា៖ នាវាមនុស្សធម៌ទី១ចាប់ផ្តើមចែកជំនួយ ខណៈបទឈប់បាញ់ផ្តើមសញ្ញាវិជ្ជមានជាថ្មី
ថ្ងៃសៅរ៍ ទី១៦មីនា នាវាដឹកជំនួយមនុស្សធម៌ ទី១ បានចាប់ផ្តើមចែកចាយជំនួយស្បៀងដល់ប្រជាជននៅតំបន់ហ្កាហ្សា។ ហ្កាហ្សាជាទីដែលញ៉ាំញីដោយភ្លក់ភ្លើងសង្គ្រាម ប្រមាណជាង ៥ ខែ រវាងអ៊ីស្រាអែលនិងក្រុមហាម៉ាស។ អង្គការសហប្រជាជាតិ បញ្ជាក់ថា ប្រជាពលរដ្ឋនៅទីនោះ កំពុងជួបគ្រោះទុរ្ភិក្សជាខ្លាំង និងត្រូវការជំនួយជាបន្ទាន់។ នាវាដឹកជំនួយទី១ ផ្តើមចែកអំណោយស្បៀង ទន្ទឹមនឹងនាវាទី២ បានត្រៀមខ្លួនជាស្រេច ដើម្បីចេញដំណើរពីប្រទេសស៊ីប។ នៅពេលនេះ សញ្ញាវិជ្ជមាននៃការចរចាគ្នា ឈានទៅរកបទឈប់បាញ់ ក៏ផ្តើមកម្រើកឡើងវិញ។
ចុះផ្សាយនៅថ្ងៃ៖
ស្តាប់ - ០៣:០៤
ក្រុមហាម៉ាស បានលាតត្រដាងជាថ្មី អំពីជំហរនិងលក្ខខណ្ឌសំណើរបស់ខ្លួន នៅក្នុងគម្រោងចរចាធ្វើបទឈប់បាញ់ ជាមួយអ៊ីស្រាអែល។ បទឈប់បាញ់ ៦ សប្តាហ៍ ក្នុងអំលុងពេលនេះ ក្រុមហាម៉ាសសន្យានឹងដោះលែងអ្នកទោសចំណាប់ថ្នូរអ៊ីស្រាអែល៤២នាក់ ជាកូនក្មេង ស្រីៗ មនុស្សចាស់និងឈឺ។ ជាថ្នូរវិញ អ៊ីស្រាអែលត្រូវដោះលែងចំណាប់ខ្មាំងប៉ាឡេស្ទីន ពី ២០ ទៅ ៥០ នាក់។ មិនតែប៉ុណ្ណោះ ក្រុមហាម៉ាស ទាមទារឲ្យ អ៊ីស្រាអែល ដកទាហានចេញពីបណ្តាទីក្រុងនិងទីប្រជុំជនរបស់ប៉ាឡេស្ទីន, បើកផ្លូវឲ្យមនុស្សធ្វើចរាចរណ៍ចេញចូលជាប្រក្រតីធម្មតាឡើងវិញ ដោយគ្មានការត្រួតពិនិត្យដ៏តឹងតែងពីសំណាក់ទាហានអ៊ីស្រាអែល ព្រមទាំងបើកផ្លូវឲ្យរថយន្តកាំមីញ៉ុង ៥០០ គ្រឿង ក្នុង១ថ្ងៃៗ ដឹកជំនួយមនុស្សធម៌ចូលតំបន់ហ្កាហ្សា។ នេះបើតាម ថ្នាក់ដឹកនាំក្រុមហាម៉ាសម្នាក់ ដែលបានថ្លែងប្រាប់ទីភ្នាក់ងារព័ត៌មានបារាំងអាអេហ្វប៉េ នៅថ្ងៃសុក្រទី១៥មីនា។
ប្រភពពីភាគីអ៊ីស្រាអែលវិញ គេបានដឹងថា ប្រតិភូអ៊ីស្រាអែល បានត្រឡប់ពីប្រទេសការតាចូលស្រុកវិញ បន្ទាប់ពីចរចារួច តែមិនបញ្ជាក់ថាបានជួបក្រុមតំណាងហាម៉ាស ពីពេលណាទេ។ ការតា អេហ្ស៊ីប និងសហរដ្ឋអាមេរិក ជាអន្តរការីបីប្រទេសដ៏សំខាន់ ដែលដើរតួរៀបចំការចរចារវាងអ៊ីស្រាអែលនិងក្រុមហាម៉ាស។
ភាគីសហរដ្ឋអាមេរិក អនុប្រធានាធិបតី លោកស្រី ខាម៉ាឡា ហារីស ជាមនុស្សម្នាក់ក្នុងចំណោមអ្នកដំបូងៗគេក្នុងរដ្ឋបាលអាមេរិក ដែលស្រែកទាមទារឲ្យ«មានបទឈប់បាញ់»។ បទឈប់បាញ់ ដែលត្រូវប្រធានាធិបតីអាមេរិក លោក ចូ បៃដិន ពីដំបូងយល់ព្រម ក្រោយមករារែកបដិសេធពីពេលថ្មីៗនេះ ដោយមិនប្រើពាក្យឲ្យចំ«បទឈប់បាញ់ »ដូច្នេះឡើយ។ ទោះជាម្តេចក្តី ប្រមុខទូតអាមេរិក លោក អង់តូនី ប្ល៊ីងកិន ដែលបានជជែកជាមួយប្រធានាធិបតីនិងអនុប្រធានាធិបតីអាមេរិក បានបង្ហាញក្តីសង្ឃឹមដោយវិជ្ជមានថា ចាប់ពីថ្ងៃផ្តើមរដូវបួសតបអាហាររ៉ាម៉ាដន អាមេរិក ការតា និងអេហ្ស៊ីប សហការធ្វើការញាប់ដៃញាប់ជើងជាមួយភាគីពាក់ព័ន្ធ ដោយរំពឹងនឹងអាចបានកិច្ចព្រមព្រៀង ដោះដូរអ្នកទោស និងបទឈប់បាញ់មួយ។
រីឯ ជំហររបស់ថ្នាក់ដឹកនាំអ៊ីស្រាអែល ទាមទារឲ្យដោះលែងចំណាប់ថ្នូរ ដែលក្រុមហាម៉ាសចាប់ឃុំជាច្រើនខែមកហើយ។ ក៏ប៉ុន្តែ មានសញ្ញាណថ្មីដែលអាចរំខានដល់ដំណើរព្រមព្រៀងបទឈប់បាញ់ គឺ នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ អះអាង ពីថ្ងៃសុក្រ ជាថ្មីម្តងទៀតថា កងទ័ពអ៊ីស្រាអែលត្រៀមខ្លួនជាស្រេចដើម្បីជម្លៀសប្រជាជនក្នុងតំបន់រាហ្វាហ៍ ទាំងជាង១លាននាក់។
គម្រោងជម្លៀសមនុស្សដ៏សន្ធឹកនេះ ទាំងអង្គការសហប្រជាជាតិ សហរដ្ឋអាមេរិក និងសហគមអន្តរជាតិជាច្រើនប្រទេស បានជំទាស់។ អ្នកនាំពាក្យក្រុមប្រឹក្សាសន្តិសុខជាតិអាមេរិក លោក ចន ឃឺប៊ី បញ្ជាក់ថា សហរដ្ឋអាមេរិក មិនគាំទ្រគម្រោងជម្លៀសប្រជាជនប៉ាឡេស្ទីននេះឡើយ ហើយនិងចង់មើលពិនិត្យផែនការលម្អិតរបស់អ៊ីស្រាអែល ជាមុនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ