សន្និសីទអន្តរជាតិ ប្រមូលជំនួយបាន ជាង៦ពាន់លានអឺរ៉ូ សម្រាប់ស្ថាបនាអ៊ុយក្រែនឡើងវិញ
នៅថ្ងៃព្រហស្បតិ៍ ទី ៥ឧសភា សហគមន៍អន្តរជាតិបានបង្ហាញសាមគ្គីភាពជាមួយអ៊ុយក្រែន ដោយបានរៀបចំបើកសន្និសីទអន្តរជាតិនៃក្រុមប្រទេសអ្នកផ្តល់ជំនួយនៅទីក្រុងវ៉ាសូវី។ សន្និសីទប្រមូលមូលនិធិបានសរុបជាង៦ពាន់លានអឺរ៉ូ សម្រាប់យកទៅជួយអ៊ុយក្រែនជាបន្ទាន់ភ្លាម និងសម្រាប់ជួយស្ថាបនាអ៊ុយក្រែនឡើងវិញ។ នេះបើតាមសេចក្តីប្រកាសរបស់លោកនាយករដ្ឋមន្ត្រីប៉ូឡូញ។
ចុះផ្សាយនៅថ្ងៃ៖
ស្តាប់ - ០២:០៦
“នៅពេលរុស្ស៊ីធ្វើឱ្យមនុស្សស្លាប់ ប្រទេសក្នុងពិភពសេរី ត្រូវពាំនាំជំនួយដល់អ៊ុយក្រែន។ សន្និសីទអន្តរជាតិថ្ងៃនេះជាការសម្តែងសាមគ្គីភាពដ៏ធំធេងចំពោះអ៊ុយក្រែន”។ នេះជាប្រសាសន៍របស់លោកនាយករដ្ឋមន្ត្រីប៉ូឡូញ ក្នុងសន្និសីទកាសែតរួមជាមួយសមភាគីស៊ុយអែត។ បើតាមលោកនាយករដ្ឋមន្ត្រីប៉ូឡូញដដែល សន្និសីទអន្តរជាតិនៃក្រុមប្រទេសអ្នកផ្តល់ជំនួយនៅទីក្រុងវាសូវី ដែលសហរៀបចំឡើងដោយប្រទេសប៉ូឡូញនិងស៊ុយអែត ដោយមានការចូលរួមចំណែកពីសហភាពអឺរ៉ុប និងអង្គការសហប្រជាជាតិ ប្រមូលបានថវិកាចំនួន ៦១៥០លានអឺរ៉ូ ក្នុងទម្រង់ជាកិច្ចសន្យាផ្តល់ជំនួយឱ្យអ៊ុយក្រែន និងអ្នកគាំទ្រអ៊ុយក្រែន សម្រាប់យកទៅប្រើប្រាស់ជាបន្ទាន់ភ្លាមប្រឈមនឹងការឈ្លានពានរបស់រុស្ស៊ី និង សម្រាប់គាំទ្រទស្សនវិស័យនៃការស្ថាបនាប្រទេសឡើងវិញ។
អ៊ុយក្រែនមិននៅម្នាក់ឯងទេ អឺរ៉ុបនៅជាមួយជានិច្ច និងជួយស្ថាបនាប្រទេសនិងសេដ្ឋកិច្ចរបស់អ៊ុយក្រែន ឱ្យបានរុងរឿងនិងមានស្ថិរភាពនាពេលអនាគត ដោយចាប់ផ្តើមពីថ្ងៃនេះតែ ម្តង។ នេះជាប្រសាសន៍របស់លោកប្រធានក្រុមប្រឹក្សាសហភាពអឺរ៉ុបនៅពេលបើកសន្និសីទ។ ហើយគឺប្រធានគណៈកម្មការអឺរ៉ុប លោកស្រី វ៉ុនដឺលីយ៉ែន Ursula von der Leyen ជាអ្នកប្រកាសបញ្ចេញកញ្ចប់ថវិកាអឺរ៉ុបចំនួន ២០០លានអឺរ៉ូ បន្ថែមឱ្យអ៊ុយក្រែនសម្រាប់ចាត់ចែងជាជំនួយមនុស្សធម៌។ ជាសរុបជំនួយហិរញ្ញវត្ថុរបស់សហភាពអឺរ៉ុបសម្រាប់អ៊ុយក្រែនបានឡើងដល់៤ពាន់លានអឺរ៉ូ គិតចាប់តាំងពីរុស្ស៊ីចូលឈ្លានពានអ៊ុយក្រែនថ្ងៃទី ២៤កុម្ភៈ២០២២មក។
ជាងនេះទៅទៀត បារាំងក៏បន្ថែមជំនួយឱ្យអ៊ុយក្រែនដែរ។ ថ្លែងទៅកាន់សន្និសីទអន្តរជាតិតាមប្រព័ន្ធវីដេអូ លោកប្រធានាធិបតីបារាំង អេម៉ាណុយអែល ម៉ាក្រុង បានប្រកាសដំឡើងជំនួយហិរញ្ញវត្ថុ សេដ្ឋកិច្ច និងមនុស្សធម៌ ចំនួន ៣០០លានដុល្លារបន្ថែម ដើម្បីឱ្យឡើងគ្រប់ដល់២ពាន់លានដុល្លារតែម្តង។ ជំនួយបន្ថែមនេះ មិនពាក់ព័ន្ធនឹងជំនួយយោធាទេ។ បារាំងបានផ្តល់ជំនួយមនុស្សដល់អ៊ុយក្រែនតាំងពីថ្ងៃដំបូងភ្លាម ចំនួន ១០០លានអឺរ៉ូ និងសម្ភារៈបរិក្ខារចំនួន ៨០០តោន និងថវិកាជំនួយរួម ១៧០០លានសម្រាប់ទ្រទ្រង់ថវិការដ្ឋអ៊ុយក្រែន និងការវិនិយោគ។ ប្រធានាធិបតីបារាំងក៏បានថ្លែងអំណរគុណក្រុមប្រទេសអឺរ៉ុបជិតខាងអ៊ុយក្រែន មានជាអាទិ៍ប៉ូឡូញ ហុងគ្រី រូម៉ានី ស្លូវាគី ... ដែលបានសម្តែងសាមគ្គីភាពគ្មានប្រៀបជួយអ៊ុយក្រែនដោយផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ